Proverbios 15

1Llamp'u simiwan kutichikuqqa phiñakuytan thasnun, k'arak simin ichaqa astawan phiñachin. 2Yachayniyoqkunaq rimasqanqa yachaytan sumaqchan, mana yuyayniyoqkunan ichaqa yanqakunata rimarqarin. 3Señor Diosqa hinantin pachatan rikushan, allin runatapas mana allin runatapas qhawashanmi. 4Llamp'u simiwan rimayqa kawsarichinmi, waqllisqa k'arak rimaymi ichaqa sonqota k'irin. 5Mana yuyayniyoqqa taytanpa kunaykusqantan pisichan, anyaykusqata hap'ikuqmi ichaqa allin yuyayniyoq. 6Chanin runaqa wasinpi askha kaqniyoqmi, millay runapaqmi ichaqa tarisqankunapas uma nanaylla. 7Yachayniyoqkunaq siminqa yachaytan mast'arin, mana yuyayniyoqkunaqa manan chhaynatachu mast'arin. 8Señor Diosqa millay runakunaq sacrificio haywasqantan millakun, chanin runa mañakuqtinmi ichaqa kusikun. 9Señor Diosqa millay runakunaq imaynachus kawsasqantan millakun, pichus chanin kawsaqtan ichaqa munakun. 10Allin ñanta saqeqtaqa k'arak simiwanmi anyana, anyaykusqata mana uyarikuqqa wañunqan. 11Wañuy-pachatapas Ukhu-pachatapas Señor Diosqa sut'itan qhawashan, ¿chaychu runakunaq sonqontaqa mana rikunman? 12Uma hoqariqqa manan phiñariqninta munakunchu, manallataqmi yachayniyoqkunatapas tapurikunchu. 13Kusisqa sonqoqa uyatan sumaqchan, llakisqa sonqotaq uyata unphuyachin. 14Reparaq sonqoqa yachaytan maskhan, mana yuyayniyoqkunan ichaqa yanqa simikunawan saksaykun. 15Llakisqa sonqoyoqpaqqa sapa p'unchaypas sasakaman, kusisqa sonqoyoqpaqmi ichaqa sapa p'unchaypas kusikuyllapuni. 16Aswan allinqa wakcha kaspa Señor Diosta manchakuymi, qhapaq kaspa llakipakuymantaqa. 17Aswan allinqa munakuypa kasqanpi yuyu mikhuymi, cheqnikuypa kasqanpi wira waka aycha mikhuymantaqa. 18T'impuq sonqo runaqa ch'aqwatan sayarichin, mana usqhay phiñakuqmi ichaqa ch'aqwata thanichin. 19Qellaq ñanninqa khiskawan kanchachasqa hinan, chanin runaq purinanmi ichaqa sumaq ñan hina. 20Yachayniyoq churiqa taytantan kusichin, mana yuyayniyoq runan ichaqa mamanta pisichan. 21Mana yuyayniyoqqa zonzo-kayninwanmi kusikun, yuyayniyoqmi ichaqa chaninllatapuni kawsayta munan. 22Yuyaychaq mana kaqtinqa, imachus yuyaykusqakunan qollupun, askha yuyaychaqkuna kaqtinmi ichaqa yuyaykusqakunaqa hunt'akun. 23Runaqa kusikunmi allin tupasqata kutichisqanwan, tiemponpi rimasqapas may allinmi. 24Yachayniyoqqa kawsayman pusaq ñannintan purin, manan wañuyman pusaq ñannintachu purin. 25Señor Diosqa uma hoqariqpa wasintan raqayman tukuchin, viudaq hallp'antan ichaqa mana qechuchinchu. 26Señor Diosqa millakunmi millay runakunaq yuyaykusqankunataqa, sumaq sonqowan rimasqakunan ichaqa ch'uyakama. 27Suwakuyman k'askakuqqa wasintan sasaman tanqaykun, lluk'iykuyta cheqnikuqmi ichaqa kawsanqa. 28Chanin runaqa allintan yuyaykun kutichinanpaq, millay runan ichaqa millaykunata rimarqarin. 29Señor Diosqa millay runakunamantan karunchakun, chanin runakunaq mañakusqantan ichaqa uyarin. 30Munakuywan qhawariyqa sonqotan kusirichin, allin willakuyqa wakmantan kallpachallantaq. 31Sonqo kawsarichiq anyaykuyta uyariqqa yachayniyoqkunaq qayllanpin kusisqa kashanqa. 32Wanaykachiyta pisichaqqa pay kikintan pisichakun, anyaykusqata uyarikuqqa allin yuyaytan tarin. 33Señor Diosta manchakuqqa yachayniyoq-kaytan yachaqan, k'umuykukuq runaqa hatunchasqan kanqa.

will be added

X\