Proverbios 13

1Yachayniyoq churiqa taytanpa anyaykusqantan chaskikun, k'ankaykachaqmi ichaqa anyaykusqanta mana uyarikunchu. 2Allin runaqa rimasqanman hinan saminchata chaskin, rimasqankuta mana hunt'aqkunan ichaqa maqarqoyllatapuni munan. 3Siminta waqaychakuqqa pay kikintan waqaychakun, hawan-ukhunta rimaqmi ichaqa payllatataq waqllichikun. 4Qellaqa munapakunmi, manataqmi imatapas tarinchu, k'uchi runakunan ichaqa ima munasqankuta tarinku. 5Chanin runaqa llullakuytan cheqnikun, millay runan ichaqa chiqnichikun, p'enqaypitaq rikukun. 6Chanin-kayqa waqaychanmi mana huchachana kawsaq runataqa, mana chanin-kaymi ichaqa huchasapata urmaykachin. 7Kanmi mana imayoq kashaspa qhapaqman tukuqkuna, kallantaqmi askha kaqniyoq kashaspa wakchaman tukuqkuna. 8Qhapaqqa qhapaq kayninwanmi kawsayninta qespichin, wakchatan ichaqa mana pipas manchapachinchu. 9Chanin runakunaqa lliphipishaq k'anchay hinan, millay runakunaq k'anchayninmi ichaqa wañupushan. 10Uma hoqariyqa ch'aqwaytapunin paqarichin, yuyaychaykuyta chaskikuyqa yachayniyoq-kaytan rikuchin. 11Qonqaylla qhapaqyayqa manan unaypaqchu, pisi-pisimanta huñuqmi ichaqa qhapaqyan. 12Runaqa suyakusqan mana hunt'akuqtinmi llakikun, munasqan hunt'akuqtinmi ichaqa sonqon kawsarin. 13Kamachisqa simita pisichaqqa llakipin rikukunqa, kamachisqa simita kasuqmi ichaqa saminchasqa kanqa. 14Yachayniyoqpa yachachikuyninqa kawsay pukyun, wañuy toqllamantan qespichin. 15Allin yuyaywan ruwaqqa sumaq qhawarisqan, siminkuta mana hunt'aqkunan ichaqa chinkapunqaku. 16Yuyayniyoq runaqa yachaywanmi ruwan, mana yuyayniyoqmi ichaqa mana yuyayniyoq-kayninta rikuchin. 17Mana allin willaqqa uma nanaykunatan paqarichin, hunt'aq willaqmi ichaqa allinkaqta paqarichin. 18Kunaykusqata pisichaqqa wakchayanqan, p'enqaypin rikukunqa, anyaykusqata kasukuqmi ichaqa hatunchasqa kanqa. 19Munasqa hunt'akuqtinqa sonqon kusikun, mana yuyayniyoqkunan ichaqa mana munanchu millaykaqta saqeyta. 20Yachayniyoqkunawan puriqqa yachayniyoqmi kapunqa, mana yuyayniyoqkunawan puriqmi ichaqa waqllipunqa. 21Huchasapakunataqa mana allin-kaymi qatiykachan, chanin runakunan ichaqa allinkaqta chaskinqaku. 22Allin runaqa nietonkunamanmi herenciata saqenqa, huchasapaq qhapaq kaynintan ichaqa chanin runa chaskinqa. 23Wakchakunaq chakranqa askha mikhunatan rurun, ichaqa mana chanin ruwaqkunan chay rurusqata qechupun. 24Wawanta mana wanachiqqa wawantan cheqnikun, wawanta munakuqmi ichaqa sumaqta wanachin. 25Chanin runaqa askha mikhunayoqmi, millay runan ichaqa yarqachikushallan.

will be added

X\