Proverbios 12

1Wanachiyta munakuqqa yachaytan munakun, anyaykuyta cheqnikuqmi ichaqa mana yuyayniyoq. 2Allin runataqa Señor Diosmi sumaqta qhawarin, millay yuyaykuq runatan ichaqa huchachan. 3Manan pipas mana allin-kaywanqa allinta sayanchu, chanin runakunan ichaqa qaqata sayanku. 4Ancha allin warmiqa qosanpaqqa corona hinan, millay warmin ichaqa tullukunapi ismuriy hina. 5Chanin runakunaq yuyaykusqankunaqa chaninmi, millay runakunaq yuyaykusqankunan ichaqa llullakama. 6Millay runakunaq siminqa wañuna toqllan, chanin runakunaq rimayninmi ichaqa kikinkuta qespichin. 7Millay runakunaqa urmapunkuñan, manan kapunkuñachu, chanin runakunaq mirayninmi ichaqa kashallanqapuni. 8Yuyayniyoq kasqanman hinan runaqa hatunchasqa kanqa, waqllisqa sonqoyoqmi ichaqa pisichasqa kanqa. 9Aswan allinmi pisipaq hap'isqa allin llank'aq runaqa, hatunchakuq mana mikhunayoq runamantaqa. 10Chanin runaqa uywankunatan allinta rikun, millay runakunaq sonqonmi ichaqa mana khuyapayakuq. 11Chakranta llank'aqqa askha mikhunayoqmi, hanraykachaspa puriqmi ichaqa mana yuyayniyoq. 12Millay runakunaqa millaykunaq qechusqankunatan munapakunku, chanin runakunan ichaqa allinta saphichakunku. 13Millay runaqa llullakusqankunallawantaqmi mayt'uykusqa rikukun, chanin runan ichaqa llakipakuymanta allinta lloqsin. 14Sapankan rimasqankunaman hina chaskin, sapankan ruwasqankunaman hina chaskin. 15Mana yuyayniyoqqa ruwasqankunatan allin kasqanpaq yuyan, yachayniyoqmi ichaqa kunaykusqakunata kasukun. 16Mana yuyayniyoqqa phiñakunpachan, allin yuyayniyoqmi ichaqa k'amisqata mana kasurparinchu. 17Cheqaqkaqta rimaqqa chaninkaqllatapunin sut'inchan, llulla testigon ichaqa llullakuyllatapuni riman. 18Hawan-ukhunta rimaqqa espadawan hinan k'irin, yachayniyoqkunaq rimasqanmi ichaqa hampi. 19Cheqaqkaqta rimaqqa wiñaypaqmi sayan, llullan ichaqa huk ratollapaq. 20Mana allinkaqta yuyaykuqkunaqa paykuna kikinkutan q'otukunku, sumaq kawsayta yuyaykuqkunan ichaqa kusikunqaku. 21Chanin runaqa allillanpunin kanqa, millay runakunan ichaqa mana allinkunapipuni rikukunqaku. 22Señor Diosqa llullakuqkunatan cheqnikun, cheqaqkaqta rimaqkunatan ichaqa kusisqa qhawarin. 23Yuyayniyoq runaqa yachaynintan pakaykun, mana yuyayniyoqmi ichaqa mana yuyayniyoq-kayninta riqsichikun. 24Llank'aqqa kamachikunqan, qellan ichaqa kamachina kapunqa. 25Llakipakuyqa runatan ñit'iykun, sumaq simin ichaqa kusichin. 26Chanin runaqa runamasintan allinta pusan, millay runakunan ichaqa pantachin. 27Qella runaqqa manan chakusqallanpas kankananpaq kanchu, k'uchi runapaqmi ichaqa ch'iti-kaynin qhapaq kay hina. 28Chaninkaq ñanqa kawsaymanmi pusan, mana chanin-kaymi ichaqa wañuyman pusan.

will be added

X\