Proverbios 11

1Señor Diosqa waqllisqa balanzatan cheqnikun, chanin balanzan ichaqa Diosta kusichin. 2Pipas anchaykachaqqa p'enqachisqan kapunqa, k'umuykukuqmi ichaqa yachayniyoq kapunqa. 3Chanin runakunataqa chanin-kaynillankutaqmi pusan, mana hunt'aqkunatan ichaqa iskay yuyaywan rimasqallankutaq waqllichin. 4Qhapaq kaykunaqa juicio p'unchaypi manan imapaqpas valenqachu, chanin-kaymi ichaqa wañuymanta qespichin. 5Chanin runaq ñannintaqa chanin-kayninmi kuskachan, millay runatan ichaqa millay-kaynillantaq urmaykachin. 6Chanin runakunataqa chanin-kaymi qespichin, mana hunt'aqkunatan ichaqa munapakuynillantaq wataykun. 7Millay runa wañuqtinqa suyakuyninpas chinkapunmi, qhapaq kaykunapi yuyarayasqanpas chinkapunmi. 8Chanin runaqa llaki-phutiymantan horqosqa kapun, millay runataq rantinpi haykun. 9Mana iñiyniyoq runaqa siminwanmi runamasinta k'irin, chanin runakunan ichaqa yachayninkuwan qespichikunku. 10Chanin runakuna allinyaqtinqa llaqtan kusikun, millay runakuna wañuqtinmi ichaqa, llaqta kusisqa qaparin. 11Chanin runakunaq saminchanwanmi llaqta wiñarin, millay runakunaq simintaq llaqtata thunin. 12Mana yuyayniyoq runaqa runamasintan pisichan, allin reparaq runan ichaqa upallakun. 13Simi apa runaqa pakalla willasqakunatan willakun, confiakuna runan ichaqa pakalla willasqakunata sonqollanpi hap'in. 14May suyupichus mana allin kamachikuy kaqtinqa, suyuqa waqllinmi, askhaq yuyaychayninwanmi ichaqa suyuqa allinta sayan. 15Llakiq ñit'isqanmi rikukunqa mana reqsisqapaq fiakuq runaqa, fiayta mana munaqmi ichaqa mana llakipakuspa kawsan. 16Sumaq sonqo warmiqa hatunchasqan kanqa, mana khuyapayakuq runakunan ichaqa qhapaq kaykunallata tarin. 17Llakipayakuq runaqa pay kikinpaqmi allinta ruwan, sinchi millay runan ichaqa pay kikinpaq mana allinta ruwan. 18Millay runaq ganasqanqa yanqapaqmi, chaninninpi ruwaqmi ichaqa cheqaq samiyoq. 19Chanin-kayta qatikuqqa kawsanqapunin, mana allinkaqta ruwaqmi ichaqa wañunqapuni. 20Señor Diosqa millakunmi waqllisqa sonqoyoqkunata, mana huchachana kawsaqkunatan ichaqa sumaqta qhawarin. 21Cheqaqtapunin millay runaqa muchuchisqa kanqa, chanin runakunan ichaqa qespichisqa kanqa. 22Khuchiq senqanpi qori argolla hinan pisi yuyayniyoq warmiqa, sumaq rikch'ayniyoqña kashan chaypas. 23Chaninkunaq munasqanqa allinkaqllamanpunin tukun, millaykunaq suyakusqanmi ichaqa phiñakuyta sayarichin. 24Kanmi qoykukuq runa, chaywanpas aswan kaqniyoqraqmi payqa, kallantaqmi mich'akuq runa, chaywanpas wakchayapunmi payqa. 25Qoykukuq runaqa t'ikarinqan, hukman saksata ukyachiqqa saksachisqallataqmi kanqa. 26Trigota payllapaq huñuqtaqa runakunan ñakan, trigota vendeqtan ichaqa saminchan. 27Allinkaqta ruwayta munaqqa allin rikusqan kanqa, mana allinkaqta ruwayta munaqmanmi ichaqa, mana allinkaqllataq taripanqa. 28Qhapaq kayninman k'askakuqqa urmaykunqan, chanin runakunan ichaqa raphi hina llanllarinqaku. 29Familianta sasaman churaqqa, mana imayoqmi kapunqa, mana yuyayniyoqqa yachayniyoqpa kamachillanpunin kanqa. 30Chanin runaq kawsayninqa hukkunatan kawsarichin, yachayniyoqqa runakunatan maskhan yanapaykunanpaq. 31Chanin runachus kay pachapi kawsasqanman hina chaskin chayqa, ¡imaynataq huchasapa millay runari muchunanta mana chaskinmanchu!

will be added

X\