Proverbios 10

1Salomonpa rikch'anachisqan simikuna: Yachayniyoq churiqa taytantan kusichin, mana yuyayniyoq churitaq mamanta llakichin. 2Mana chaninpi tarisqa qhapaq kaykunaqa manan allinpaqchu, chaninta kawsaymi ichaqa wañuymanta qespichin. 3Señor Diosqa chanin runataqa manan hinallatachu yarqasqata qhawan, millay runakunaq munapakusqantan ichaqa qolluchinqa. 4Qella kaspan runaqa wakchayan, k'uchi kaspataqmi qhapaqyan. 5Cosecha tiempopi cosechaqqa yuyayniyoq runan, mikhuy hoqariy tiempopi puñuqmi ichaqa mana p'enqakuq runa. 6Chanin runapaqqa saminchakunan chayamun, millay runakunatan ichaqa k'arak rimayninku heq'epachin. 7Chanin runata yuyarispaqa: Allinmi, ninkun, millay runatan ichaqa usqhaylla qonqapunku. 8Yachayniyoqqa kamachikusqakunatan chaskin, yanqa thawtiqmi ichaqa waqllipun. 9Cheqanta puriqqa manan manchapakunchu, waqlliypi puriqmi ichaqa hap'irqosqa rikukun. 10Ñawinwan q'esuykuqqa hukkunatan k'irin, sut'i simiwan anyaykuqmi ichaqa sumaqta kawsachin. 11Chanin runaq siminqa kawsay pukyun, millay runatan ichaqa k'arak rimaynin heq'epachin. 12Cheqnikuyqa ch'aqwatan sayarichin, munakuymi ichaqa llapa huchallikusqakunata pampachan. 13Yachayniyoqqa yachaytan riman, mana yuyayniyoqtaq hasut'isqa kanan. 14Yachayniyoqkunaqa yachasqankutan waqaychakunku, mana yuyayniyoqpa siminmi ichaqa waqllichinan patapiña kashan. 15Qhapaq runataqa qhapaq kayninmi amachaykun, wakcha runataqa wakcha-kayninmi waqllichin. 16Chanin runaq ganasqanqa kawsanapaqmi, millay runaq tarisqanmi ichaqa huchapaq. 17Kunaykuykunata maki uyariqqa kawsaymanmi rin, pichus kunaykuyta mana uyarikuqmi ichaqa chinkayman rin. 18Cheqnikuyta pakaykuqqa llullan, yanqa tumpaykuna ch'eqechiqqa mana yuyayniyoqmi. 19Askha rimasqapiqa kallanpunin pantayqa, upallakuqmi ichaqa allin yuyayniyoq. 20Chanin runaq rimasqanqa ch'uyayachisqa qolqe hinan, millay runaq yuyayninmi ichaqa mana chanin. 21Chanin runaq siminqa askha runatan uywan, mana yuyayniyoqkunan ichaqa mana yuyayniyoq kaspa wañunku. 22Señor Diospa saminchayninqa qhapaqyachinmi, chay saminchayqa manan llakichinchu. 23Mana yuyayniyoqqa, mana allinkunata ruwaspan kusikun, yuyayniyoqmi ichaqa yachaywan kusikun. 24Chanin runaqa imachus munasqantan chaskin, millay runan ichaqa imachus manchapakusqanta chaskin. 25Millay runataqa muyuq wayran aparikapun, chanin runan ichaqa wiñaypaq sayan. 26Imaynan vinagreqa kiruta “chhuk” nichin, imaynan q'osñipas ñawita k'arachin, chay hinan qellaqa kachaqninpa umanta nanachin. 27Señor Diosta manchakuyqa unaytan kawsachin, millay runakunaq kawsayninmi ichaqa pisiyachisqa kanqa. 28Chanin runakunaq suyakuyninqa kusikuymanmi tukupunqa, millay runakunaq suyakuyninmi ichaqa qollupunqa. 29Señor Diosqa waqaychanmi allinkaqta ruwaqkunata, mana allinkaqta ruwaqkunatan ichaqa chinkachin. 30Chanin runaqa manan hayk'aqpas kuyurichisqachu kanqa, millay runakunan ichaqa suyupi mana tiyanqakuchu. 31Chanin runaq siminmantan yachay paqarimun, waqllisqa runaq qalluntan ichaqa kuchunqaku. 32Chanin runaqa tupusqallatan maypipas riman, millay runakunan ichaqa waqllisqallata riman.

will be added

X\