Números 9

1Egipto suyumanta Israel runakunaq lloqsimusqan iskaykaq wata qallariy killapin Señor Diosqa Sinaí ch'inneqpi Moisesta nirqan: 2–Israel runakunaqa tiempollanpin Pascua Fiestata ruwanqaku. 3Qallariy killaq chunka tawayoq p'unchay ch'isintan Pascua Fiestata tiemponpipuni ruwankichis, imaynatachus kamachirqaykichis chay fiestata ruwanapaq chayman hina, nispa. 4Hinan Moisesqa Israel runakunata kamachirqan Pascua Fiestata ruwanankupaq. 5Chaymi Israel runakunaqa chay killaq chunka tawayoq p'unchay ch'isinta Sinaí ch'inneqpi Pascua Fiestata ruwarqanku, Señor Diospa Moisesta kamachisqanman hina lliwta ruwaspanku. 6Ichaqa wakin qharikunan Pascua Fiestata chay p'unchay mana ruwarqankuchu, ayata llamispanku qhelli kasqankurayku. Hinan paykunaqa Moisesman Aaronmanwan chay kikin p'unchay rispa 7Moisesta nirqanku: –Ñoqaykun ayata llamirqayku chaymi qhelli kashayku, ¿hark'asqachu kasaqku unanchasqa p'unchaypi wakin Israel runakunawan kuska Señor Diosman ofrendata haywanaykumanta? nispa. 8Hinan Moisesqa kutichirqan: –Suyariychis imaynatachus ruwanaykichista Señor Diospa niwanankama, nispa. 9Señor Diostaq Moisesta nirqan: –Israel runakunata khaynata kamachiy: 10Llapallanmi qankunapas mirayniykichispas Pascua Fiestataqa ruwankichis. Ayata llamiykusqan hawa qhelli kashaqpas karu puriypi kashaqkunapas, 11iskaykaq killaq chunka tawayoq p'unchay ch'isinpin chay fiestata ruwankichis, borrego kankatan mikhunkichis haya qoratawan mana qonchuyoq t'antatawan. 12Qhepantin p'unchaypaqqa aman chhikantapas puchunkichischu, amataq tulluntapas p'akinkichischu. Pascua Fiestataqa tukuy yachachisqayman hinan ruwankichis. 13Pipas ch'uya kashaspa, mana puriypipas kashaspa Pascua Fiestata mana ruwanqachu chayqa, manan llaqtaypi yupasqañachu kapunqa, unanchasqa p'unchaypi ofrendanta mana haywawasqanrayku. Chay huchanmantataqmi muchuchisqa kanqa. 14Qankunawan tiyaq wak llaqtayoq runakunapas Pascua Fiestata ruwayta munaspaqa, ruwanaykichispaq kamachisqayman hinan ruwanqa. Chay kikin kamachikuyllan kanqa wak llaqtayoqkunapaqpas Israel runakunapaqpas, nispa. 15Dioswan Tupana Karpata sayarichisqanku p'unchaymi karpata phuyu pakaykurqan. Ch'isinmantapacha illarimuykamataq chay phuyuqa nina hina rikhurirqan. 16Ahinan sapa p'unchay mana kuyuriq karqan, p'unchaymi karpata phuyu pakaykurqan, tutataq nina rawray hina karqan. 17Karpa patamanta phuyu puririqtinmi Israel runakunaqa astakurqanku, hinaspa maypichus phuyu sayaykusqan cheqaspi karpakurqanku. 18Israel runakunaqa Señor Dios kamachiqtinmi astakurqankupas, Señor Dios kamachiqtinmi karpakurqankupas. Karpa patapi phuyu sayashaqtinqa Israel runakunaqa manan puririrqankuchu. 19Karpa patapi unayta phuyu sayashaqtinqa, Israel runakunaqa Señor Diosta kasukuspankun mana puririrqankuchu. 20Pisi p'unchaykunalla karpa patapi phuyu sayaqtinmi ichaqa, Señor Diospa kamachisqanman hina astakurqankupas, Señor Diospa kamachisqanman hina karpakurqankupas. 21Mayninpiqa huk tutallan phuyu chaypi sayaq, tutamantataq puriripuq, chaymi Israel runakunapas astakullaqkutaq tutapas p'unchaypas phuyu puririqtinqa paykunapas astakullaqkutaqmi. 22Karpa patapi phuyu sayaq iskay p'unchaytapas, huk killatapas, huk watatapas chayqa, chaypin Israel runakunaqa qhepakuqku, manataq astakuqkuchu. Phuyu puririqtinmi ichaqa, astakurqanku. 23Paykunaqa Señor Dios kamachiqtinmi karpakurqankupas, Señor Dios kamachiqtinmi astakurqankupas. Tukuy chaykunapiqa Señor Diosta kasukuspa servispallapunin kasharqanku, Señor Diospa Moiseswan kamachisqanman hina.

will be added

X\