Números 8

1Señor Diosmi Moisesta nirqan: 2–Aaronta niy: Candeleroq qanchis lamparachankunata k'allman pataman churaspaqa, ñawpaqen ladoman k'anchananpaq hinapunin churanki, nispa. 3Hinan Aaronqa Señor Diospa Moiseswan kamachisqanta hunt'arqan, chaymi lamparachakunata ñawpaqen ladoman k'anchananpaq churarqan. 4Candeleroqa qorimanta takaspa ruwasqan karqan chakinmanta lamparacha churanakama. Señor Diospa Moisesman rikuchisqan rikch'ayman hinan candeleroqa ruwasqa karqan. 5Señor Diosmi Moisesta nirqan: 6–Leví runakunata Israel runakuna ukhumanta t'aqaspaykin ch'uyanchanki. 7Kay hinatan paykunata ch'uyanchanki: Ch'uyanchana unuwanmi paykunata ch'aqchunki. Paykunataq cuerpo suphunkuta llapanta k'isukunqaku, p'achankutapas t'aqsakunqaku, ahinapin ch'uya kapunqaku. 8Chaymantataq paykunaqa huk torillota hap'inqaku ruru ofrendantinta, chay ofrendaqa aceitewan ñut'u hak'uwan pitusqan kanqa. Qantaq huk torillota hap'inki hucha pampachay sacrificiopaq. 9Hinaspa Leví runakunata Ñoqawan Tupana Karpaman qayllaykuchinki, llapan Israel runakunatataq huñuykunki. 10Chaymantataq Leví runakunata ñawpaqeyman asuykachimunki, Israel runakunataq paykunaq uman pataman makinkuta churaykunqaku. 11Aaronmi Leví runakunata t'aqapuwanqa Israel runakunaq ofrendanta hina. Ahinapin Leví runakunaqa ñoqata serviwanankupaq t'aqasqa kanqa. 12Hinamantataq Leví runakunaqa torillokunaq uman pataman makinkuta churanqaku, chaymi huknin torillo hucha pampachay sacrificio haywasqa kanqa, hukkaq torillotaq ruphachina sacrificio haywasqa kanqa, Leví runakuna ch'uyanchasqa kananpaq. 13Hinallataq Aaronman churinkunamanwan Leví runakunata qayllaykachinki, hinaspan paykunata haywawanki ñoqapaq ofrendata hina. 14Ahinapin Leví runakunata t'aqanki Israel runakuna ukhumanta ñoqapaq kanankupaq. 15Ch'uyanchasqayki sapaqchasqayki qhepatataq paykunaqa Ñoqawan Tupana Karpapi llank'aq hamunqaku. 16Llapan Israel runakuna ukhupiqa paykunan ñoqapaq t'aqasqapuni kanku. Ñoqaqa Israel runakunaq llapan phiwi churinpa rantinpin Leví ayllu runakunataqa akllakurqani, 17ñoqamanmi tupawan Israel runakunaq llapan phiwi churinkunaqa, hinallataq uywankuq llapan ñawpaq wachay uñankunapas. Egipto suyu runakunaq phiwi churinkunata wañuchishaspaymi, Israel runakunaq phiwi churinta ñoqapaq t'aqakurqani, 18paykunaq rantinpitaqmi Leví runakunata akllakurqani. 19Leví ayllutaqa Israel ayllukuna ukhumanta t'aqaspaymi Aaronman churinkunamanwan qokuyta hina qorqani Israel runakunaq rantinpi Ñoqawan Tupana Karpapi llank'anankupaq, Israel runakuna karpaq ch'uya kanchanman asuykuspa muchuchisqa kanankuta hark'anankupaqwan, nispa. 20Hinan Moisesqa Aaronpiwan llapan Israel runakunapiwan Leví runakunamanta Señor Diospa kamachisqanta hunt'arqanku, Señor Diospa Moisesta kamachisqanman hina. 21Leví runakunan ch'uyanchakurqanku, p'achankutapas t'aqsakurqanku, hinan Aaronqa ofrendata hina paykunata Señor Diosman qorqan, hinaspataq hucha pampachay sacrificiota haywarqan paykuna ch'uyanchasqa kanankupaq. 22Tukuy chaykuna qhepatataq Leví runakunaqa Dioswan Tupana Karpata rirqanku llank'anankupi llank'aq, kamachiqninkutaq karqan Aaronwan churinkunapiwan. Señor Diospa Moisesta kamachisqanman hinan Leví ayllu runakunawan ruwarqanku. 23Señor Diosmi Moisesta nirqan: 24–Leví runakunaqa iskay chunka phisqayoq watayoq kashaspanmi Ñoqawan Tupana Karpapi llank'ayta qallarinqaku, 25samapunqakutaq llank'anankumanta phisqa chunka watayoq kashaspa. 26Chay qhepataqa llank'aq-masinkunata yanapanmanmi llank'anapi, ichaqa manan llank'aq churasqa hinañachu llank'anqa. Ahinatan Leví runakunaq llank'anantaqa wakichinki, nispa.

will be added

X\