Números 6

1Señor Diosmi Moisesta nirqan: 2–Israel runakunata niy: Huk qharipas warmipas Nazareo runa kananpaq prometekuspa Señor Diosman sapaqchakunqa chayqa, 3manan ukyanqachu vinotapas, ima machachikuq ukyanatapas, uvasmanta ch'irwasqa ima ukyanatapas. Manallataq mikhunqachu hoq'o uvastapas ch'aki uvastapas. 4Señor Diospaq t'aqasqa kashasqan tiempopiqa manan uvas yuramanta chhikallantapas mikhunqachu, manallataq muhuntapas ch'illpintapas mikhunqachu. 5Chukchantapas manan rutuchikunqachu, aswanpas hinallatan wiñachikunqa. Nazareo runa kashasqan tiempopiqa ch'uyan kanqa. 6Señor Diospaq t'aqasqa kashasqan tiempopiqa manan ayamanpas qayllaykunqachu. 7Manapunin taytanña mamanña wawqenña pananña wañuqtinpas qayllaykunqachu, ama qhellichasqa kananpaq. Señor Diospaq t'aqasqa kaynintaqa chukchanmi sut'inchan. 8Prometekusqan tiempopiqa Señor Diospaqmi ch'uya kanqa. 9Paypa qayllanpi pipas qonqay wañuqtin Señor Diospaq t'aqasqa-kayninta rikuchiq chukchanta qhellichanqa chayqa, qanchis p'unchay qhepatan chukchanta rutuchikapunqa, hinaspan ch'uya kapunqa. 10Pusaqkaq p'unchaypitaq Dioswan Tupana Karpa punkupi kaq sacerdoteman apanqa iskay kullkuta, mana chayqa iskay malqo urpitapas. 11Hinan sacerdoteqa haywanqa hukkaqta hucha pampachay sacrificiota, hukkaqtataq ruphachina sacrificiota, ahinapi ayata llamiykuspa qhellichakusqanmanta ch'uya kapunanpaq. Chay kikin p'unchaymi wakmanta chukchanta Señor Diospaq t'aqanqa, 12hinaspa Señor Diospaq t'aqasqa prometekusqan tiempota wakmanta qallarinqa, ñawpaq ruwasqanqa manan valepunchu qhellichakapusqan hawa. Chaymantataq Señor Diosman haywachinqa watayoq borregota kutichipuy sacrificiopaq. 13Kaymi Nazareo runapaq kamachikuy: Señor Diosman t'aqakusqan tiempo hunt'akuqtinmi chay runaqa Dioswan Tupana Karpa punkuman rinqa, 14hinaspa Señor Diosman haywachinqa watayoq mana imanasqa borregota ruphachina sacrificiota, watayoq mana imanasqa ovejata hucha pampachay sacrificiota, mana imanasqa anejotataq sumaq kawsay sacrificiota. 15Sapanka sacrificiota haywachinqa ruru ofrendantinta, hich'aykunapaq vino ofrendantinta. Hinallataq chaywan kuskata huk canastapi mana qonchuyoq t'antata aceitewan llusisqa llaphllay-llaphlla t'antata sacerdoteman apanqa. Chay t'antaqa ñut'u hak'umanta aceitewan chapuspa ruwasqan kanqa. 16Hinan sacerdoteqa Señor Diosman haywanqa hucha pampachay sacrificiota, ruphachina sacrificiota, 17Sumaq kawsay sacrificiota, ruru ofrendantinta, hich'aykunapaq vino ofrendantinta. Haywallanqataq canastapi kaq mana qonchuyoq t'antatapas. 18Señor Diospaq t'aqasqa runaqa Dioswan Tupana Karpa punkupin chukchanta rutuchikunqa, hinaspa chay t'aqasqa chukchan rutuchikusqanta sumaq kawsay sacrificiota ruphashaq ninaman wikch'uykunqa. 19Chaymantataq sacerdoteqa chayasqaña kaqtin anejoq qharminta hap'inqa canastapi mana qonchuyoq huk t'antatawan, mana qonchuyoq huk llaphllay-llaphlla t'antatawan, hinaspa Señor Diospaq t'aqasqa runaman llapanta qonqa chukchanta rutuchikusqan qhepataña. 20Sacerdotetaq llapan chaykunata Señor Diospa ñawpaqenpi maywispa haywanqa, ofrenda kasqanrayku. Chaykunaqa ancha ch'uyan, sacerdotemanmi tupan imaynan maywisqa ofrendamanta pechonpas chakanpas tupan hinata. Chay qhepataqa Señor Diospaq t'aqasqa runaqa vinota ukyanmanmi. 21Chaymi kamachikuy kanqa Señor Diospaq t'aqasqa kananpaq prometekuq runapaq. Haywanan kaq ofrendakunamantapas wak ofrendakunata haywananpaq prometekunman chayqa, allinmi. Ichaqa lliw prometekusqantaqa hunt'anqapunin, nispa. 22Señor Diosmi Moisesta nirqan: 23–Aaronta churinkunatawan kamachiy Israel runakunata khaynata saminchanankupaq: 24Señor Diosmi saminchasunkipas waqaychasunkipas, 25Señor Diosmi sumaqta qhawarisunkipas khuyapayasunkipas, 26Señor Diosmi munakusunkipas, thak-kaypipas kawsachisunki, nispa. 27Sacerdotekunan Israel runakunata sutiywan saminchanqaku, ñoqataq paykunata saminchasaq, nispa.

will be added

X\