Números 5

1Señor Diosmi Moisesta nirqan: 2–Israel runakunata kamachiy llapan lepra onqoyniyoq runakunata, q'eya hisp'aq runakunata, wañusqata llamispa qhellichakuq runakunatapas karpa-karpa chawpimanta hawaman wikch'unankupaq. 3Warmipas qharipas kachun karpa-karpa chawpimanta hawaman wikch'uchunku. Ahinapin karpa-karpata mana qhellichanqakuchu, ñoqa paykuna chawpipi tiyasqayrayku, nispa. 4Hinan Israel runakunaqa Señor Diospa Moisesta kamachisqanta kasukuspanku llapan qhelli kaq runakunata karpa-karpa chawpimanta hawaman wikch'urqanku. 5Señor Diosmi Moisesta nirqan: 6–Israel runakunata kamachiy: Mayqen qharipas otaq warmipas Señor Diosta mana kasukuq kaspa runamasinta ima mana allintapas ruwan chayqa, huchachakunmi. 7Chaymi chay huchanta willakunqa, hinaspa runamasinta mana allin ruwasqanmanta pagapunqa, may chhikachus huchallikuspa ruwasqan kasqanman hina, chaymantaq phisqa partemanta hukninta yapaykuspa pagapunqa. 8Mayqen runamanchus pagapunan karqan chay runa wañukapunman, manataq qaylla ayllunpas kanmanchu pagapunanpaq chayqa, pagapunanpaq t'aqasqanqa Señor Diospaqmi kapunqa, chaytataq sacerdoteman qopunqa, chay huchata pampachananpaq anejota sacrificiopi haywananqa sapaqmi kanqa. 9Israel runakunaq Señor Diospaq t'aqasqan llapan qokuykunatapas sacerdotemanmi apanqaku, sacerdotekunapaqtaq kanqapas. 10Señor Diospaq tukuy t'aqasqa ofrendakunata sacerdoteman apasqankuqa sacerdotekunapaqmi kanqa, nispa. 11Señor Diosmi Moisesta nirqan: 12–Israel runakunata kamachiy: Mayqen warmipas waqllispa qosanta wasanchanman 13wak qhariwan puñukuspa, qosantaq qhellichakusqanta mana yachanmanchu pakallapi huchallikuqtin mana pipas hap'isqanrayku. 14Hinataq chay warmiq qosanqa celosakuspa payta tumpanman huchallikunmi nispa. Celosakullanmantaqmi mana warmin wasanchashaqtinpas yanqanmanta tumpaspa mana huchallikushaqtin. 15Hinan chay qhariqa mayqenña kaqtinpas warminta sacerdoteman pusanqa, iskay kilo cebada hak'u ofrendatawan apaspa. Chay ofrendaqa huchata sut'inchanapaq celosakuqpa ofrendanmi, chayraykun chay ofrendamanqa mana aceitetapas inciensotapas hich'aykunqachu. 16Sacerdotetaq chay warmita pusaspa Señor Diospa ñawpaqenman qayllaykachinqa. 17Chaymantataq sacerdoteqa k'arpa vasopi ch'uya unuta wisinqa, hinaspa yupaychana karpaq pampanpi kaq ñut'u hallp'ata hoqarispa vasopi ch'uya unuman hach'iykunqa. 18Hinaspan Señor Diospa ñawpaqenpi warmita sayaykachinqa, chukcha watakusqantataq kacharparinqa, huchata sut'inchanapaq ofrendatan makinman hap'iykachinqa, sacerdotetaq hap'inqa ñakaypaq hayaq unuta. 19Hinaspan payqa warmita jurachispa ninqa: Wak qhariwan mana puñukurqankichu, manataq qosaykitapas wasancharqankichu, manallataq qhellichakurqankipaschu wak qhariwan huchallikuspayki chayqa, manan imanasunkipaschu ñakaypaq kay haya unuqa. 20Ichaqa qosaykita wasanchaspa wak qhariwan puñukurqanki, ahinapi huchallikuspataq qhellichakurqanki chayqa, 21Señor Diosmi llaqtayki runakuna ukhupi ñakasqa kasqaykita sut'inchanqa, mana wachakumi kapunki, wiksaykitaqmi punkinqa. 22Chhaynaqa, kay haya unu ukyasqaykin wiksaykita punkichisunki, mana wachakuqtataq ruwasunki, nispa. Hinan warmiqa kutichinqa: Amén, Amén, nispa. 23Sacerdotetaq chay ñakayta huk k'uyupi qelqanqa, chay qelqatataq haya unuwan vasoman maylliykunqa. 24Warmitaq ukyanqa chay haya ñakasqa unuta, wiksanmantaq haya haykunqa. 25Celosakuy ofrendata warmiq makinmanta chaskispan sacerdoteqa, Señor Diospa ñawpaqenpi maywinqa, chaymantataq altarman apanqa. 26Hinaspa huk hapt'ay celosakuy ofrendatawan churaykuspa altarpi ruphachinqa, chayqa yuyarinapaq ofrendan. Chaymantataq ñakaypaq haya unuta warmiman sacerdote ukyachinqa, 27cheqaqtapuni qosanta wasanchaqtintaq chay unuqa warmiq ukhunta hayanqa, wiksantaq punkinqa mana wachakuqtaq kapunqa. Chaymi warmiqa llaqtan ukhupi ñakasqa kapunqa. 28Manataq chay warmi huchallikurqanchu chayqa, manan imapas kanqachu, mana huchayoqtaq kapunqa, aswanpas wachakushallanqapunin. 29Kaymi celosakuymanta kamachikuykuna: Mayqen warmipas qosanta wasanchaspa qhellichakunman, 30otaq chay warmiq qosan celosakuspa yanqanmanta payta tumpanman chayqa, Señor Diospa ñawpaqenmanmi warminta pusanqa, hinan sacerdoteqa chay kamachikuyman hina warmita ruwanqa. 31Qosanqa manan huchachasqachu kanqa, warmin ichaqa cheqaqtapuni wasanchaspaqa muchuchisqa kanqa, nispa.

will be added

X\