1 Señor Diosmi Moisesta Aarontawan nirqan: 2 –Leví ayllu Cohatpa miraynin runakunata yupaychis ayllunkuman hina, familiankuman hina. 3 Ñoqawan Tupana Karpapi llank'ay atiq qharikunata yupankichis kinsa chunka watayoqmanta phisqa chunka watayoqkama. 4 Cohatpa mirayninkunan Ch'uya Cheqaspi kaqkunata waqaychaypi llank'anqaku. 5 Israel runakuna huk cheqasman astakuspa puririqtinmi, Aaronqa churinkunapiwan karpapi Ch'uyay-Ch'uya Cheqasta t'aqaq cortinata horqonqaku, hinaspa chay cortinawan rimanakuy arcata qatanqaku. 6 Chay patamantaq llamp'uy-llamp'u qarakunata churanqaku, hinaspa sani-puka awasqawan qataykuspa wantuna k'aspikunata churanqaku. 7 Hinallataq ñawpaqeypi t'anta churana mesatapas sani-puka awasqawan qatanqaku, hinaspataq chay pataman churanqaku p'ukukunata, pocillokunata, vasokunata, hich'aykuna vino ofrendapaq p'uyñukunata, mesaman tukuy tiempo churana t'antatawan. 8 Llapan chaykuna patamanmi rawraq-puka awasqawan qatanqaku, hinaspa llamp'uy-llamp'u qarawan pakaykuspa wantuna k'aspinkunata churanqaku. 9 Chaymantataq huk sani-puka awasqawan qatanqaku candelerota, lamparachakunata, pábilo allichanakunata, uspha p'ukukunata, aceite churana llapan p'uyñukunatawan. 10 Llapan chaykunatan llamp'uy-llamp'u qarakunawan p'istunqaku, hinaspa wantuna k'aspi pataman churanqaku apanapaq. 11 Qori altar patamanpas sani-puka awasqata mast'anqaku, chay patamantaq llamp'uy-llamp'u qarakunawan p'istunqaku, hinaspa wantuna k'aspikunata churanqaku. 12 Chaymanmi Ch'uya Cheqaspi kaq llapan serviciokunata huñunqaku, hinaspa sani-puka awasqapi p'istuspa llamp'uy-llamp'u qarakunawan p'istunqaku, chaytataq wantuna k'aspi pataman apanapaq churanqaku. 13 Altarpi kaq usphata wiratawan pichanqaku, hinaspa altarta sani-puka awasqawan qatanqaku. 14 Chay patamantaq churanqaku altarpi haywanapaq kaq serviciokunata: –Sansa churanakunata, trinchekunata, lampakunata, puruñakunatawan. Llapan chaykunatan llamp'uy-llamp'u qarakunawan qatanqaku, hinaspa wantuna k'aspikunata churanqaku apanapaq. 15 Yupaychanapaq t'aqasqa hayk'an kaqta llapan serviciokunatawan Aaronqa churinkunapiwan qatayta tukuqtinkun, llapa runakuna puririnanpaq hina kashaqtinkun, Cohatpa mirayninkuna rinqaku tukuy chaykunata apanankupaq. Ichaqa manan ch'uya kaqkunataqa llamiykunqakuchu, ama wañunankupaq. Ñoqawan Tupana Karpapi tukuy kaqkunataqa paykunan astanqaku. 16 Sacerdote Aaronpa churin Eleazartaq makilla qhawanqa candeleroq aceitenta, sumaq q'apaq inciensota, sapa p'unchay haywana ruru ofrendakunata, hawina aceiteta ima. Hinallataq paypa cuentanpi kanqa Ñoqawan Tupana Karpa, chaypi tukuy kaqkuna, llapan ch'uya kaqkuna, serviciokuna ima, nispa. 17 Señor Diosmi Moisesta Aarontawan nirqan: 18 –Aman Cohatpa ayllunta Leví ayllukuna ukhumanta ch'usaqyachinkichischu. 19 Ch'uya kaqkunaman qayllaykuspaqa wañunkumanmi, chhaynaqa, ama wañunankupaq kay hinata ruwankichis: –Ch'uya Cheqasman haykuspanmi Aaronqa churinkunapiwan Cohat ayllu runakunaman willanqa imatachus llank'anankuta, imatachus apanankutapas. 20 Paykunaqa manan ch'uya kaqkunata rikunankuchu, mana chayqa, wañunkumanmi, nispa. 21 Señor Diosmi Moisesta nirqan: 22 –Gersonpa miraynintapas yupallaytaq ayllunkuman hina familiankuman hina, 23 Ñoqawan Tupana Karpapi llank'ay atiq qharikunata yupay kinsa chunka watayoqmanta phisqa chunka watayoqkama. 24 Paykunan kaykunata apaspa llank'anqaku: 25 –Karpata, karpa cortinakunata, karpaq patan qatasqa llamp'uy-llamp'u qarakunata, karpa punku cortinata, 26 karpa kancha muyuriq cortinakunata, karpa kancha punku cortinata, hap'ichina waskhakunata, hayk'an kaq serviciokunata, herramientakunatawan. 27 Aaronmi churinkunapiwan Gersonpa mirayninkunata kamachinqa llank'ananku kaqkunapi astananku kaqkunapiwan. Paykunamanqa qanmi imatachus apanankuta sut'ita rikuchinki. 28 Chaykunan Ñoqawan Tupana Karpapi Gersonpa miraynin ayllukunaq llank'anan kanqa, kamachiqninkutaq Aaronpa churin Itamar kanqa. 29 Merariq mirayninkunatapas yupallaytaq ayllunkuman hina familiankuman hina. 30 Ñoqawan Tupana Karpapi llank'ay atiq qharikunata yupay kinsa chunka watayoqmanta phisqa chunka watayoqkama. 31 Karpapi llank'anankupas astanankupas kaykunan kanqa: –Karpa marcokuna, sayaq k'aspikuna, suskhuq k'aspikuna, k'aspipaq sayanakuna, 32 karpa kancha muyuriq sayaq k'aspikuna, k'aspipaq sayanakuna, takarpukuna, waskhakuna, hayk'an kaq serviciokuna, herramientakuna ima. Qantaq sapankaman sut'ita rikuchinki imakunatachus apanankuta. 33 Chaykunan Ñoqawan Tupana Karpapi Merariq miraynin ayllukunaq llank'anan kanqa, kamachiqninkutaq Aaronpa churin Itamar kanqa, nispa. 34 Chaymi Moisesqa Aaronpiwan llaqta umallikunapiwan Cohatpa mirayninta ayllunkuman hina familiankuman hina yuparqanku. 35 Hinan Dioswan Tupana Karpapi llank'ay atiq qharikuna kinsa chunka watayoqmanta phisqa chunka watayoqkama 36 iskay waranqa qanchis pachak phisqa chunka karqan. 37 Cohatpa mirayninkunan chay chhika karqan, Señor Diospa Moisesta kamachisqanman hina Moisespiwan Aaronpiwan paykunata yupaqtinku. 38 Gersonpa mirayninmi ayllunkuman hina familiankuman hina yupasqa karqan. 39 Dioswan Tupana Karpapi llank'ay atiq qharikunataq kinsa chunka watayoqmanta phisqa chunka watayoqkama 40 iskay waranqa soqta pachak kinsa chunka karqan. 41 Gersonpa mirayninkunan chay chhika karqan, Señor Diospa kamachisqanman hina Moisespiwan Aaronpiwan paykunata yupaqtinku. 42 Merariq mirayninmi ayllunkuman hina familiankuman hina yupasqa karqan. 43 Dioswan Tupana Karpapi llank'ay atiq qharikunataq kinsa chunka watayoqmanta phisqa chunka watayoqkama 44 kinsa waranqa iskay pachak karqan. 45 Merariq mirayninkunan chay chhika karqan Señor Diospa Moisesta kamachisqanman hina Moisespiwan Aaronpiwan paykunata yupaqtinku. 46 Ahinatan llapan Leví ayllu runakunata ayllunkuman hina familiankuman hina yuparqanku Moisespiwan Aaronpiwan Israel umallikunapiwan. 47 Dioswan Tupana Karpapi llank'ay atiq q'epiy atiq qharikuna kinsa chunka watayoqmanta phisqa chunka watayoqkama 48 pusaq waranqa phisqa pachak pusaq chunka karqan. 49 Chay runakunan yupasqa karqan Señor Diospa Moisesta kamachisqanman hina. Chaymantataq Moisesqa sapankaman imatachus llank'anankuta apanankutapas sut'ita rikuchirqan, Señor Dios payta kamachisqanman hina.
