Números 36

1Josepa churin Manasespa churin Maquirpa miraynin Galaad ayllu familia umallikunan Moisesman, Israel ayllu umallikunamanwan 2rispa nirqanku: –Wiraqochayku Moisés, Señor Diosmi kamachirqasunki Israel ayllukunaman sorteopi t'aqaspa hallp'ata rakinaykipaq, hinallataq kamachirqasunki wawqeyku Zelofehadpa hallp'anta ususinkunaman qopunaykipaq. 3Ichaqa paykuna Israel suyuq hukkaq ayllun qharikunawan casarakunqaku chayqa, paykunaq hallp'anqa manañachá ñoqaykuq aylluykuman tupanqañachu, aswanpas mayqen ayllu qharikunawanchus chay warmikuna casarakunqa chay ayllumanchá tupapunqa. Ahinapin tupawaqniyku hallp'ata pisimanta-pisi tinkuyachinqaku. 4Hinallataq Israel llaqtapaq hallp'a kachariy wata chayamuqtin, chay warmikunaq hallp'anqa qosankuq ayllun hallp'aman t'aqasqa kapunqa, manañataq ñoqaykuq aylluyku hallp'apiñachu kapunqa, nispanku. 5Chaymi Moisesqa Señor Diospa kamachisqan kaspa Israel runakunata kamachirqan: –Josepa miraynin ayllu runakunaqa chanintan rimanku. 6Señor Diosmi kamachin Zelofehadpa ususinkunata pi munasqanku qhariwanpas casarakunankuta, ichaqa kikin ayllunku qharikunallawan. 7Sapanka Israel aylluman tupaq hallp'aqa manan huk ayllumanta huk aylluman t'aqasqa kananchu, llapan Israel ayllukunaqa sapankan chaskisqanku hallp'ata hap'ishallanqaku. 8Mayqen ayllu warmipas hallp'ata herencianta hina chaskinqa chayqa, kikin ayllu qhariwanmi casarakunqa. Ahinapin sapanka Israel runakuna taytankumanta chaskisqanku hallp'ata hap'ishallanqakupuni. 9Manan mayqen herencia hallp'apas huk ayllumanta huk aylluman t'aqasqa kananchu. Sapanka Israel ayllun tupaqnin hallp'ataqa mana kacharispa hap'inqa, nispa. 10Chaymi Zelofehadpa ususinkunaqa Señor Diospa Moisesta kamachisqanman hina kasukurqanku. 11Paykunan karqan: Maala, Tirsa, Hogla, Milca, Noapiwan primonkuwantaq casarakapurqanku. 12Chay qharikunan karqanku Josepa churin Manasespa mirayninmanta, ahinapin chay warmikunaq herencian hallp'aqa taytankuq ayllullanpipuni qhepapurqan. 13Señor Diosmi chay kamachikuyninkunata unanchayninkunatawan Moiseswan Israel runakunaman willachirqan Jericó llaqta qhaway Jordán mayu qaylla Moab suyu pampapi.

will be added

X\