Números 35

1Jericó qhaway Jordán mayu qaylla Moab pampapin Señor Diosqa Moisesta nirqan: 2–Israel runakunata kamachiy hap'ikapusqanku suyupi llaqtakunata muyuriqninpi uywa michina campokunatawan Leví runakunaman qonankupaq. 3Chay llaqtakunapin Leví runakuna tiyanqaku, uywa michina campokunapitaq llapan uywakunata michinqaku. 4Uywa michina campokunaqa llaqta muyuriq perqa qhepamanta hawa ladoman tawa pachak phisqa chunka metron kanqa. 5Chay uywa michinan tawa ladoyoq kanqa, sapanka ladotaq sayaypura isqon pachak metrokama kanqa. Llaqtataq chay uywa michina campo chawpipi kanqa. 6Leví runakunaman qonkichis chay llaqtakunamantan pakakuna llaqtaqa soqta kanqa, chaypin pakakunman runamasinta wañuchiq mayqen runapas. Chaymantapas qollankichistaq tawa chunka iskayniyoq llaqtakunata. 7Chaymi Leví runakunaman llapanpi qonkichis tawa chunka pusaqniyoq llaqtakunata uywa michina campoyoqtakama. 8Israel runakunaq hap'ikapusqan suyupi llaqtakunata Leví runakunaman qoqtiykichisqa, sapanka ayllun qonqa may chhikachus hallp'a tupasqanman hina, hatun hallp'akunamantaqa askha llaqtakunatan qonkichis, huch'uy hallp'akunamantataq pisi llaqtakunata qonkichis, nispa. 9Señor Diosmi Moisesta nirqan: 10–Israel runakunata niy, Canaán suyuman haykunaykichispaq Jordán mayuta chimpaspaykichisqa, 11wakin llaqtakunata pakakuna llaqta kananpaq akllankichis, runamasinta mana yuyaypichu wañuchiq runa chaypi pakakunanpaq. 12Chaypin qespikunqa wañuqpa vengakuq ayllun payta wañuchinanmanta, manataq wañunqachu chay llaqta runakunaq huñunakuyninpi chaninchasqa kanankama. 13Qosqaykichis llaqtakunamantan pakakunapaq soqta llaqtata qonkichis. 14Kinsa llaqtakunan kanqa Jordán mayu inti lloqsimuy ladopi, kinsa llaqtakunataq Canaán suyupi kanqa. 15Chay soqtantin llaqtakunan kanqa pakakuna llaqtakuna Israel runakunapaq, hinallataq qankunawan tiyaq otaq purikuqlla wak llaqtayoq runakunapaqpas. Chay llaqtakunapin pakakunqaku runamasinta mana yuyaypichu wañuchiq runakunaqa. 16Pipas runamasinta fierrowan takarqonman, hinataq chay takasqa runa wañunman chayqa, takaq runaqa runa wañuchiqmi, chayrayku payqa wañunanpaq huchachasqa kanqa. 17Pipas runamasinta rumiwan takarqonman, hinataq chay takasqa runa wañunman chayqa, takaq runaqa runa wañuchiqmi, chayraykun payqa wañunanpaq huchachasqa kanqa. 18Pipas runamasinta k'ulluwan takarqonman, hinataq chay takasqa runa wañunman chayqa, takaq runaqa runa wañuchiqmi, chayraykun payqa wañunanpaq huchachasqa kanqa. 19Wañuqpa vengakuq ayllunmi chay wañuchiq runataqa wañuchinanpuni, chaymi maypichus tupasqanpi wañuchinqa. 20Pipas runamasinta cheqnikuspa tanqarparinman otaq mana allinta yuyaykuspa imawanpas waqtarqonman, 21mana chayqa cheqnikuspapas makinwan k'irinman, hinataq chay k'irisqa runa wañunman chayqa, k'iriq runaqa runa wañuchiqmi, chayraykun payqa wañunanpaq huchachasqa kanqa. Wañuqpa vengakuq ayllunmi chay wañuchiq runataqa tupaspan wañuchinqa. 22Huk runa runamasinta mana cheqnikushaspa qonqay tanqarparinman, otaq mana yuyaypichu imawanpas qonqay chanqarqonman, 23otaq mana rikushaspa rumiwanpas qonqay kachaykunman, mana awqan kashaspa, mana k'iriyta munashaspa, hinataq chay runamasin wañunman chayqa, 24huñuykusqa runan juzganqa wañuchiq runatawan wañuqpa vengakuq ayllun runatawan kay kamachikuyman hina. 25Huñuykusqa runaqa waqaychanqan mana yuyaypichu wañuchiq runataqa wañuqpa vengakuq ayllun payta wañurqochinanmanta, chaymi kutichipunqaku mayqen llaqtapichus pakakusharqan chay kikin llaqtaman. Hinan chay wañuchiq runaqa pakakusqan llaqtapi qhepakunqa ch'uya aceitewan hawisqa uma sacerdote wañukapunankama. 26Chay runa pakakuna llaqtamanta karunchanqa chayqa, 27wañuqpa vengakuq ayllunmi llaqta hawapi tupaspa payta wañuchinman, wañuchiqqa manataqmi huchachasqachu kanqa. 28Chayraykun payqa pakakuna llaqtapi qhepakunqa uma sacerdote wañukapunankama. Chay qhepatan ichaqa tiyasqan wasinman kutipunqa. 29Chay unanchaykunan qankunapaqpas mirayniykichispaqpas kikin kamachikuylla kanqa maypiña tiyaqtiykichispas. 30Runa wañuchiqqa iskay kinsa testigoq rimarisqanwanmi wañuchinapaq huchachasqa kanqa. Ch'ulla testigoq rimarisqallanwanqa manan pitapas wañuchinapaq huchachayta atiwaqchischu. 31Huk runa wañuchiq wañunanpaq huchachasqa kashaspa, mana wañunanpaq qolqeta pagayta munaqtinqa, aman chaskinkichischu. Chay runa wañuchiqqa wañuchisqapunin kanqa. 32Hinallataq runa wañuchiq pakakuna llaqtapi pakakushaspa manaraq uma sacerdote wañushaqtin, wasinta kutipuyta munaspa qolqeta pagayta munaqtinqa, aman chaskinkichischu. 33Tiyanaykichis suyutaqa aman runa wañuchiykunawan qhellichankichischu. Runa wañuchiyqa suyutan qhellichan, chay qhellichayqa manan imawanpas ch'uyanchakunmanchu, aswanpas kikin wañuchiq runaq wañusqallanwanmi. 34Ñoqa Señor Diosmi qankuna ukhupi tiyani, chaymi tiyanaykichis suyutaqa ama qhellichankichischu, nispa.

will be added

X\