1 Señor Diosmi Moisesta nirqan: 2 –Israel runakunata kamachiy, Canaán suyuman haykuqtiykichisqa qankunaq hallp'aykichispunin chay suyuqa kapunqa. Kaykunataqmi qorpankuna kanqa: 3 Uray lado qorpanmi kanqa Edom suyu qaylla Zin ch'inneq. Chay qorpaqa qallarinqa Kachi Qochaq ura cantonmanta, 4 hinaspa Nina Q'ara nisqa Q'asanta wichanqa, chaymanta Zin ch'inneqninta Cades-barneakama aysakunqa. Chaymantataq aysakunqa Hasar-adarninta Asmonkama. 5 Asmonmantataq kutirinqa Egipto qorpa mayukama, chaymantataq lamar-qocha patakama aysakunqa. 6 Inti haykuy lado qorpanqa lamar-qocha patantakaman aysakunqa. 7 Wichay lado qorpanmi lamar-qocha patamanta Hor orqokama cheqanta aysakunqa, 8 Hor orqomantataq Hamat Q'asakama, chaymantataq Zedadkama, 9 Zedadmantataq Zifronkama, Zifronmantataq Hazar-enankama. 10 Inti lloqsimuy lado qorpantaq Hazar-enanmanta Sefankama cheqanta aysakunqa, 11 Sefanmantataq Ainpa inti lloqsimuy ladon Harbelkama, chaymantataq Cineret qocha inti lloqsimuy lado qhatanta aysakunqa, 12 hinaspa Jordán mayunta uraykapunqa Kachi Qochakama. Chay hinan kanqa suyuykichispa qorpankuna, nispa. 13 Moisesmi Israel runakunata kamachirqan: –Chay suyutan qankuna sorteopi t'aqanakunkichis, Señor Diosmi kamachikurqan chay suyuta isqon ayllu kuskanniyoqman rakinapaq. 14 Rubén ayllu, Gad ayllu, Manasés kuskan ayllupiwanqa ñan chaskirqankuña tupaqninku hallp'ata ayllunkuman hina. 15 Iskay ayllu kuskanninqa Jericó qhaway Jordán mayu inti lloqsimuy ladopin ayllunkuman hina chaskirqanku tupaqninkuta, nispa. 16 Señor Diosmi Moisesta nirqan: 17 –Hallp'ata t'aqaspa ayllukunaman rakiqmi kanqa sacerdote Eleazarwan Nunpa churin Josuewan. 18 Churallaychistaq sapanka ayllumanta huk umallita paykunata yanapananpaq. 19 Chay umallikunan kaykuna: Judá ayllumanta Jefoneq churin Caleb, 20 Simeón ayllumanta Amiudpa churin Semuel, 21 Benjamín ayllumanta Quislonpa churin Elidad, 22 Dan ayllumanta Jogliq churin umalli Buqui, 23 Josepa churin Manasés ayllumanta Efodpa churin umalli Haniel, 24 Josepa churin Efraín ayllumanta Siftanpa churin umalli Kemuel, 25 Zabulón ayllumanta Parnacpa churin umalli Elizafán, 26 Isacar ayllumanta Azanpa churin umalli Paltiel, 27 Aser ayllumanta Selomiq churin umalli Ahiud, 28 Neftalí ayllumantataq Amiudpa churin umalli Pedael, nispa. 29 Chay qharikunatan Señor Diosqa kamachirqan Canaán suyuta t'aqaspa Israel runakunaman rakinankupaq.
