1 Israel runakunan Egipto suyumanta lloqsimurqanku soldado hina t'aqa-t'aqa, Moiseswan Aaronwantaq umallinku karqan. 2 Señor Diospa kamachisqanman hinan Moisesqa qelqarqan mita-mita purimusqanku cheqaskunaq sutinta. Purimusqanku mitakunan kaykuna karqan: 3 Ñawpaqkaq killaq chunka phisqayoq p'unchayninpin, Pascua Fiesta pasay qhepantin p'unchayta Israel runakunaqa Diospa atiyninwan Ramsés llaqtamanta lloqsimurqanku, llapan Egipto runakuna qhawashaqtin. 4 Chaykamataq Egipto runakunaqa Señor Diospa wañurachisqan phiwi churinkuq ayankunata p'ampasharqanku, chaywanmi diosninkutapas muchuchirqan. 5 Israel runakunan Ramsesmanta lloqsimurqanku, hinaspan Sucotpi karpakurqanku. 6 Sucotmanta puririspataq ch'inneq qorpa Etampi karpakurqanku. 7 Etammanta puririspataq kutirirqanku Baal-zefonpa inti lloqsimuy ladonpi kashaq Pi-hahirot cheqasman, hinaspan Migdol qhawaypi karpakurqanku. 8 Pi-hahirotmanta puririspataq Puka Qochata chimparqanku, hinaspa Etam ch'inneqman chayarqanku. Chaypin kinsa p'unchay purirqanku, hinaspan Marapi karpakurqanku. 9 Maramanta puririspataq Elimman chayarqanku, chaypin karqan chunka iskayniyoq pukyukuna qanchis chunka palmera sach'apiwan, hinan chaypi karpakurqanku. 10 Elimmanta puririspataq Puka Qocha patapi karpakurqanku. 11 Puka Qocha patamanta puririspataq Sin ch'inneqpi karpakurqanku. 12 Sin ch'inneqmanta puririspataq Dofcapi karpakurqanku. 13 Dofcamanta puririspataq Aluspi karpakurqanku. 14 Alusmanta puririspataq Refidimpi karpakurqanku, chaypin runakunaq ukyanankupaq unu mana karqanchu. 15 Refidimmanta puririspataq Sinaí ch'inneqpi karpakurqanku. 16 Sinaí ch'inneqmanta puririspataq Kibrot-hataavapi karpakurqanku. 17 Kibrot-hataavamanta puririspataq Hazerotpi karpakurqanku. 18 Hazerotmanta puririspataq Ritmapi karpakurqanku. 19 Ritmamanta puririspataq Rimón-perespi karpakurqanku. 20 Rimón-peresmanta puririspataq Libnapi karpakurqanku. 21 Libnamanta puririspataq Rissapi karpakurqanku. 22 Rissamanta puririspataq Ceelatapi karpakurqanku. 23 Ceelatamanta puririspataq Sefer orqopi karpakurqanku. 24 Sefer orqomanta puririspataq Haradapi karpakurqanku. 25 Haradamanta puririspataq Macelotpi karpakurqanku. 26 Macelotmanta puririspataq Tahatpi karpakurqanku. 27 Tahatmanta puririspataq Tarapi karpakurqanku. 28 Taramanta puririspataq Mitcapi karpakurqanku. 29 Mitcamanta puririspataq Hasmonapi karpakurqanku. 30 Hasmonamanta puririspataq Moserotpi karpakurqanku. 31 Moserotmanta puririspataq Bene-jaacanpi karpakurqanku. 32 Bene-jaacanmanta puririspataq Gidgad orqopi karpakurqanku. 33 Gidgad orqomanta puririspataq Jotbatapi karpakurqanku. 34 Jotbatamanta puririspataq Abronapi karpakurqanku. 35 Abronamanta puririspataq Ezión-geberpi karpakurqanku. 36 Ezión-gebermanta puririspataq Zin ch'inneqpi kaq Cadespi karpakurqanku. 37 Cadesmanta puririspataq Edom qorpa Hor orqopi karpakurqanku. 38 Israel runakunaq Egipto suyumanta lloqsimusqanku tawa chunka wata phisqa killa huk p'unchayniyoq kashaqtinmi, sacerdote Aaronqa Señor Diospa kamachisqanman hina Hor orqoman wicharqan, hinaspa chaypi wañukapurqan. 39 Payqa pachak iskay chunka kinsayoq watayoqmi karqan Hor orqopi wañukapushaspa. 40 Canaán runa Arad reymi Israel runakunaq chayamushasqanta yacharqan, paymi tiyarqan Canaán suyuq Neguev hap'iyninpi. 41 Chaymantataq Israel runakunaqa Hor orqomanta puririspa Zalmonapi karpakurqanku. 42 Zalmonamanta puririspataq Punonpi karpakurqanku. 43 Punonmanta puririspataq Obotpi karpakurqanku. 44 Obotmanta puririspataq Moab suyu qorpapi kashaq Ije-abarimpi karpakurqanku. 45 Ije-abarimmanta puririspataq Dibón-gadpi karpakurqanku. 46 Dibón-gadmanta puririspataq Almón-diblataimpi karpakurqanku. 47 Almón-diblataimmanta puririspataq Nebo orqoq inti lloqsimuy ladon Abarim orqo-orqopi karpakurqanku. 48 Abarim orqo-orqomanta puririspataq Moab suyu pampapi karpakurqanku, chaymi kashan Jericó llaqta qhawaypi Jordán mayu qayllapi. Chaypin qhepakurqanku Ber-jerimitwan Abel-sitimwan tupaypi. 50 Jericó qhaway Jordán mayu qaylla Moab suyu pampapin Señor Diosqa Moisesta nirqan: 51 –Israel runakunata niy, Señor Diosmi nin: Jordán mayuta chimpaspaykichis Canaán suyuman haykuspaykichisqa, 52 chay suyupi tiyaq llapan runakunatan qarqonkichis, hinallataq unuyachispa hich'asqa dioskunata rumimanta ruwasqa idolokunatapas llapanta wikch'unkichis, wak'a dios yupaychana wasikunatapas lliwta thuninkichis. 53 Chay suyuta munaychakuychis, ñoqan chay suyuta hap'ikapunaykichispaq qoykichis. 54 Ichaqa sorteaspan hallp'ata rakinakunkichis llapan ayllukunaq familiankunaman. Askha runakunayoq familiakunamanqa hatun hallp'atan qonkichis, pisi runayoq familiakunamantaq huch'uy hallp'ata qonkichis, sapanka familiakunan suerteq tupasqanman hina chaskinqaku. 55 Manachus qankuna qarqonkichis chay suyupi tiyaq runakunata chayqa, suyupi tiyaykuqtiykichismi chaypi qhepaqkuna muchuchisunkichis, ñawipi k'ullu chhillpa hina, cuerpopi khiska hina. 56 Ñoqapas imatachus paykunata ruway yuyaykusqayta hinan qankunata ruwasqaykichis, nispa.
