Números 32

1Rubén aylluwan Gad aylluwanmi ancha askha uywayoq karqanku, chaymi Jazer llaqta hallp'ata Galaad hap'iyta qhawarispa repararqanku uywa michinapaq kusa kasqanta. 2Hinaspan rirqanku Moisesman, sacerdote Eleazarman, wakin ayllu umallikunamanwan, nirqankutaq: 3–Qhawariychis, kaypin kashan Atarot, Dibón, Jazer, Nimra, Hesbón, Eleale, Seba, Nebo, Beón llaqtakuna. 4Señor Diosmi kay hap'iypi tiyaqkunata atipaspa tiyachiwarqanchis. Chay hallp'akunan uywapaq kusa pastoyoq, ñoqayku kamachiykikunaqtaq uywayku askha. 5Sumaqta qhawariwankiku chayqa, kay hap'iy hallp'akunata qowayku, hinaspa amaña Jordán mayuta chimpachiwaykuchu, nispa. 6Hinan Moisesqa kutichirqan: –Chhaynaqa, ¿kaypichu qankuna qhepakuyta munankichis, llaqtamasi wawqeykichiskuna maqanakuyman rishaqtinku? 7¿Imanaqtintaq Israel runakunata pisi kallpayachiyta munankichis, Señor Diospa qosqan suyuman mana haykunankupaq? 8Chay kikillantan taytaykichispas ruwarqan, Cades-barneamanta suyu qhamiyaqta kacharqani chaypacha. 9Escol wayq'okama rispankun chay suyuta qhamiyarqanku, chaymantataq Israel runakunata pisi kallpayachirqan Señor Diospa qosqan hallp'aman haykunanku kashaqtin. 10Chaymi Señor Diosqa chay p'unchay phiñarikuspa jurarqan: 11–Egipto suyumanta lloqsimuq runakunaqa llapanmi iskay chunka watayoqmanta wichayman mana haykunqakuchu Abrahamman, Isaacman, Jacobmanwan qonaypaq prometesqay suyuman, mana tukuy sonqochu kasuwasqankurayku. 12Aswanpas Cenezpa miraynin Jefoneq churin Calebwan Nunpa churin Josuellawanmi haykunqaku tukuy sonqo kasuwasqankurayku, nispa. 13Señor Diosqa Israel runakuna contra k'arakta phiñakuspanmi tawa chunka wata ch'inneqpi tumaqayachirqan, pay contra mana chanin ruwaq runakuna llapallan wañupunankukama. 14Chhaynaqa, taytaykichis hinallataqmi millay huchasapa runakuna kankichis. ¡Señor Diospa k'arak phiñakuyninta Israel contra wakmanta q'oñirichinkichis! 15Señor Diosmanta t'aqarikunkichis chayqa, aswan unaymi payqa Israel runakunata ch'inneqpi qhepachinqa, qankunataq kay llaqta wañuchisqa kaqtin huchachasqa kankichis, nispa. 16Paykunataq ichaqa Moisesman qayllaykuspa nirqanku: –Ñoqaykuqa uywaykupaq kanchakunata wawaykupaqpas warmiykupaqpas llaqtakunata sayarichiyllatan munashayku. 17Chaymantaqa ñoqayku kikiykun usqhaylla awqa-tinkuypaq wakichikusaqku, hinaspa wakin Israel runakunaq ñawpaqenta risaqku chay suyuta hap'ikapunankukama. Chaykamataq familiaykuqa allin hark'achisqa llaqtakunapi qhepashanqaku, kay hap'iypi tiyaqkunaq phawaykunanmanta waqaychasqa. 18Ñoqaykuqa wakin Israel runakuna chay suyu hallp'ata sapanka hap'ikapuqtinkuñan kutimpusaqku. 19Hinallataq Jordán mayu inti lloqsimuy kay ladopi hallp'ayku kaqtinqa, Jordán mayu inti haykuy ladopi manaña paykunawan hallp'ata chaskisaqkuchu, nispa. 20Hinan Moisesqa paykunaman kutichirqan: –Chhaynaqa, allinmi, rimarisqaykichista hunt'aychis, Señor Diospa ñawpaqenpi wakichikuychis awqa-tinkuypaq. 21Hinaspa llapaykichis Señor Diospa kamachisqan Jordán mayuta chimpaspaykichis chaypi qhepakuychis llapan awqakunata Señor Dios qarqonankama. 22Llapa suyuntinta hap'ikapuqtinkuñan kutimpunkichis, ahinapin Señor Diospaq ruwanaykichistapas Israel llaqtapaq ruwanaykichistapas hunt'apunkichis. Chaymi Señor Diosqa kay hallp'ata hallp'aykichista hina qhawarinqa. 23Manachus nisqaykichista hina ruwankichis chayqa, cheqaqtapunin Señor Dios contra huchallikunkichis, chay huchaykichismantaqa muchuchisqapunin kankichis. 24Chhaynaqa, sayarichiychisyá familiaykichispaq llaqtakunata uywaykichispaqpas kanchakunata ruwamuychis, rimarisqaykichistan ichaqa hunt'ankichispuni, nispa. 25Hinan Gad ayllu runakuna Rubén ayllu runakunapiwan kutichirqanku: –Ñoqayku kamachiykikunaqa kamachiwasqaykikutan ruwasaqku. 26Kay Galaad hap'iy llaqtakunapin warmiyku, wawayku, hayk'an kaq uywaykupiwan qhepakunqaku. 27Ñoqaykutaq maqanakuypaq wakichikusaqku, hinaspa Señor Diospa kamachisqan awqa-tinkuyman risaqku kamachiwasqaykikuman hina, nispa. 28Chaymantataq Moisesqa sacerdote Eleazarta, Josueta, Israel ayllu umallikunatawan kamachirqan: 29–Gad ayllu Rubén ayllu qharikuna awqa-tinkuypaq wakichisqa Señor Diospa kamachisqanman hina qankunapiwan Jordán mayuta chimpaqtinkun chay suyuta hap'ikapuspaykichisña paykunaman qonkichis Galaad suyuta hallp'anku kananpaq. 30Ichaqa awqa-tinkuypi mana yanapakuyta munaspa Jordanta mana chimpanqakuchu chayqa, Canaán suyupi qankunawan kuskan hallp'ata chaskinqaku, nispa. 31Gad ayllu Rubén ayllu runakunataq kutichirqanku: –Ñoqayku kamachiykikunaqa ruwasaqkupunin Señor Diospa kamachiwasqankuta. 32Ñoqaykuqa awqa-tinkuypaq wakichisqan Canaán suyuta risaqku Señor Diosta kasukuspayku, ichaqa Jordanpa kay ladonpin hap'ikapunayku hallp'aqa kanqa, nispa. 33Ahinatan Moisesqa qorqan Gad aylluman, Rubén aylluman, Manasés kuskan ayllumanwan Amor runakunaq reynin Sehonpa suyunta, rey Ogpa Basán suyuntawan llapa llaqtankunantinta camponkunantinta. 34Gad ayllu runakunan wakmanta sayarichirqanku Dibonta, Atarot-ta, Aroerta, 35Atarot-sofanta, Jazerta, Jogbehata, 36Bet-nimrata, Bet-arantawan, hinaspa chay llaqtakunata allinta perqarqanku, hinallataq uywa kanchakunatapas sayarichirqanku. 37Rubén ayllu runakunataq wakmanta sayarichirqanku Hesbonta, Elealeta, Quiriataimta, 38Sibmata, Nebota, Baal-meontawan. Nebota Baal-meontawanqa wak sutiwanmi churarqanku, hinallataq wakin llaqtakunatapas. 39Manasespa churin Maquirpa miraynin runakunan Galaad hap'iyta rirqanku, munaychakuspataq chaypi tiyaq Amor runakunata lliwta qarqorqanku. 40Hinan Moisesqa Maquirpa miraynin runakunaman Galaad hap'iyta qopurqan, paykunataq chaypi tiyapurqanku. 41Manasespa miraynin Jairtaq kap'ikapurqan Amor runakunaq llaqtachankunata, hinaspa suticharqan: Jairpa llaqtachankuna, nispa. 42Nobataq hap'ikapurqan Kenat llaqtata llapan llaqtachakunatawan, hinaspa paypa sutinwan suticharqan: Noba, nispa.

will be added

X\