Números 31

1Señor Diosmi Moisesta nirqan: 2–Madián runakunata muchuchimuy, Israel llaqtayta huchallichisqanmanta, chay qhepatataq wañukapunki, nispa. 3Hinan Moisesqa llaqtata nirqan: –Wakinniykichis awqa-tinkuypaq wakichikuychis, hinaspa Madián runakuna muchuchiq phawaykuychis, Señor Dios contra huchallikusqankumanta. 4Sapanka ayllumantan waranqa qharikunata awqa-tinkuyman kachankichis, nispa. 5Chaymi sapanka ayllumanta akllarqanku waranqa qharikunata, llapanpitaq karqan chunka iskayniyoq waranqa awqa-tinkuypaq wakichisqa qharikuna. 6Moisesqa paykunatan awqa-tinkuyman kacharqan, sacerdote Eleazarpa churin Fineestaq umallinku rirqan. Paymi aparqan Dios yupaychana karpapi kaq ch'uya serviciokunata, awqankuman phawaykunankupaq tocana trompetakunatawan. 7Hinan paykunaqa Señor Diospa Moisesta kamachisqanman hina, Madián runakuna contra maqanakuspa llapan qharikunata wañuchirqanku. 8Madián suyu phisqantin reykunatan wañuchirqanku, Evita, Requimta, Surta, Hurta, Rebatawan. Beorpa churin Balaamtapas wañuchillarqankutaq. 9Hinaspan Israel runakunaqa Madián warmikunata wawankutapas presota aparqanku, uywankutapas tukuy kaqninkutapas lliwta qechurqanku. 10Chaymantataq llapan llaqtankuta karpankutapas lliwta kanaykurqanku. 11Hinaspa llapan llat'anasqankuta uywakunatapas runakunatapas kawsaykunatapas 12Moisesman, sacerdote Eleazarman, Israel llaqtamanwan aparqanku, paykunan karpa-karpapi kasharqanku Jericó qhaway Jordán mayu qaylla Moab suyu pampapi. 13Moisestaq sacerdote Eleazarpiwan llapan ayllu umallikunapiwan karpa-karpamanta lloqsirqanku awqa-tinkuymanta kutimuq soldadokunata chaskiq. 14Hinan Moisesqa phiñakurqan waranqa soldado umallikunapaq pachak soldado umallikunapaqwan, 15nirqantaq: –¿Imanaqtintaq warmikunatari mana wañuchirqankichischu? 16Chay warmikunan riki Balaampa yuyaychasqan kaspa Israel runakunata Señor Dios contra huchallichirqan, Peor nisqa cheqaspi Baal idolotapas yupaychachirqan. Chay hawan Señor Diosqa llaqtanta millay onqoywan muchuchirqan. 17Chhaynaqa, kunanpacha wañuchiychis llapan qhari wawakunata, qhariwan puñuq llapan warmikunatapas. 18Doncella sipaskunallata ama wañuchinkichischu, paykunaqa qankunapaqmi kanqa. 19Hinaspataq hayk'an wañuchiqkuna, wañusqata llamiykuqkunapas karpa-karpamanta sapaqpi qanchis p'unchay qhepakuychis. Hinaspa qankunapas preso apamusqaykichispas ch'uyanchakuychis, kinsakaq p'unchaypiwan qanchiskaq p'unchaypiwan. 20Ch'uyanchakullankichistaq llapan p'achaykichista, qaramanta ruwasqa llapan kaqkunata, cabra millmamanta llapan awasqakunata, k'ullumanta ruwasqa hayk'an kaq serviciokunatapas, nispa. 21Hinan sacerdote Eleazarqa awqa-tinkuyman riq llapan soldadokunata nirqan: –Kayqa Señor Diosmi Moisesta khaynata kamachisqa: 22–Qorimanta, qolqemanta, broncemanta, fierromanta, titimanta otaq estañomanta 23mana ruphaq kaqkunata llapanta ninaman churaspa ch'uyanchaychis, hinaspa ch'uyanchana unupi maylliychis. Wakin ruphaq kaqkunatataq unuwan limpiota maylliychis. 24Qanchiskaq p'unchaytaq p'achaykichista t'aqsakuychis ch'uya kanaykichispaq. Chay qhepataqa karpa-karpaman haykuyta atinkichismi, nispa. 25Señor Diosmi Moisesta nirqan: 26–Qanpiwan sacerdote Eleazarpiwan ayllu umallikunapiwan Madián runakunata llat'anaspa apamusqanku runakunata uywakunatawan yupaychis. 27Hinaspa iskayman t'aqaspa rakiychis huk t'aqata maqanakuyman riq soldadokunapaq, hukkaq t'aqatataq wakin Israel runakunapaq. 28Chaymantataq maqanakuyman riq soldadokunaman tupaq runakunamanta, torokunamanta, asnokunamanta, ovejakunamantawan ñoqapaq t'aqapuwankichis sapa phisqa pachakmanta hukta. 29Hinaspan chaykunata sacerdote Eleazarman qonkichis ñoqapaq ofrendata hina. 30Hinallataq Israel runakunaman tupaq runakunamanta, torokunamanta, asnokunamanta, ovejakunamanta, hayk'an kaq animalkunamantawan t'aqankichis sapa phisqa chunkamanta hukta. Hinaspa chaykunata qonkichis Ñoqawan Tupana Karpata cuidaq Leví runakunaman, nispa. 31Hinan Moisesqa sacerdote Eleazarpiwan Señor Diospa kamachisqanman hina ruwarqanku. 32Israel soldadokunaq llat'anasqankumanta llapan qhepaqmi karqan soqta pachak qanchis chunka phisqayoq waranqa ovejakuna, 33qanchis chunka iskayniyoq waranqa torokuna, 34soqta chunka hukniyoq waranqa asnokuna, 35kinsa chunka iskayniyoq waranqa doncella sipaskunapiwan. 36Chaymi soldadokunaman tupaq t'aqa karqan: Kinsa pachak kinsa chunka qanchisniyoq waranqa phisqa pachak ovejakuna, 37chaykunamantan qorqanku Señor Diospaq ofrendata hina soqta pachak qanchis chunka phisqayoqta. 38Kinsa chunka soqtayoq waranqa toromantataq Señor Diospaq qorqanku qanchis chunka iskayniyoq torokunata. 39Kinsa chunka waranqa phisqa pachak asnokunamantataq Señor Diospaq qorqanku soqta chunka hukniyoq asnokunata. 40Chunka soqtayoq waranqa doncella sipaskunamantataq Señor Diospaq ofrendata hina qorqanku kinsa chunka iskayniyoq sipaskunata. 41Hinan Moisesqa Señor Diospaq chay ofrendakunata sacerdote Eleazarman qorqan, Señor Diospa kamachisqanman hina. 42Moisesqa soldadokunaman tupaq kuskannintan Israel runakunapaq t'aqarqan. 43Chaymi karqan kinsa pachak kinsa chunka qanchisniyoq waranqa phisqa pachak ovejakuna, 44kinsa chunka soqtayoq waranqa torokuna, 45kinsa chunka waranqa phisqa pachak asnokuna, 46chunka soqtayoq waranqa doncella sipaskunapiwan. 47Chay runakunamantan, uywakunamantan Moisesqa T'aqarqan sapa phisqa chunkamanta hukta, hinaspa Dioswan Tupana Karpata cuidaq Leví runakunaman chaykunata qorqan, Señor Diospa kamachisqanman hina. 48Chaymantataq waranqa soldado umallikuna pachak soldado umallikunapiwan Moisesman rirqanku, 49hinaspa payta nirqanku: –Ñoqayku kamachiykikunan kamachisqayku soldadokunata watukuyku, manan hukpas wañunkuchu, llapanmi kashanku. 50Chaymi Señor Diospaq ofrendata apamushayku sapankaq tarisqayku qori alhajakunata, brazaletekunata, makiman walqanakunata, sortijakunata, aretekunata, kunkaman walqanakunatawan. Chaykunatan Señor Diosman haywayku huchaykumanta ch'uyanchasqa kanaykupaq, nispa. 51Hinan Moisesqa Eleazarpiwan llapan chay qori alhajakunata paykunamanta chaskirqanku. 52Chay umallikunaq ofrenda qosqankun pesarqan yaqa pachak isqon chunka kilo hina. 53Sapanka soldadokunan maqanakuypi awqankumanta imallatapas qechuspa paykunapaq apakurqanku. 54Ahinatan Moisesqa Eleazarpiwan umallikunamanta qori alhajakuna apasqankuta chaskirqanku, hinaspa Dioswan Tupana Karpaman aparqanku, Señor Diospa ruwasqankunata Israel runakuna yuyarishanallanpaq.

will be added

X\