Números 30

1Israel ayllu umallikunatan Moisesqa nirqan: –Señor Diosmi kamachikun: 2Mayqen qharipas imata qowananpaqpas prometekun, otaq imamanta waqaychakunanpaqpas juran chayqa, rimarisqantaqa hunt'anqapunin. 3Taytanpa wasinpiraq tiyaq sipas imata qowananpaqpas prometekun, otaq imamanta waqaychakunanpaqpas juran, 4chaykunata yachaspataq taytan mana hark'anchu chayqa, prometekusqantaqa hunt'anqapunin. 5Taytan mana munaqtinmi ichaqa hunt'ananpaq mana kamachisqañachu kanqa. Taytan hark'ashaqtinqa, manan: Hunt'allaypuni, nisaqchu. 6Huk soltera warmi yuyaykukuspapas hawan-ukhunta rimaspapas imata qowananpaqpas prometekun, otaq imamanta waqaychakunanpaqpas juran, chaymantataq casarakapunqa, 7chayta yachaspataq qosan mana hark'anchu chayqa, prometekusqantaqa hunt'anqapunin. 8Qosan mana munaqtinmi ichaqa hunt'ananpaq mana kamachisqañachu kanqa. Manan ñoqaqa: Hunt'allaypuni, nisaqchu. 9Huk viuda warmipas t'aqanakuq warmipas imata qowananpaqpas prometekun chayqa, tukuy prometekusqantaqa hunt'anqapunin. 10Huk casarasqa warmi imata qowananpaqpas prometekun otaq imamanta waqaychakunanpaqpas juran, 11chayta yachaspataq qosan mana hark'anchu chayqa, prometekusqantaqa hunt'anqapunin. 12Qosan mana munaqtinmi ichaqa hunt'ananpaq mana kamachisqañachu kanqa. Qosan hark'akushaqtinqa, manan: Hunt'allaypuni, nisaqchu. 13Qosaqa warminpa prometekusqanta jurasqantapas atinmi hark'ayta otaq: Allinmi, niytapas. 14Manataq qosan ima ninqapaschu p'unchay-p'unchay pasashaqtin chayqa, ch'inlla kasqanwanmi warminpa prometekusqantapas jurasqantapas: Allinmi, nin. 15Qosanchus yachasqan qhepa unaymantaña: Manan allinchu, nispa hark'anqa chayqa, paymi warminpa mana hunt'asqanmanta huchachasqa kanqa, nispa. 16Chay hinatan Señor Diosqa Moisesta kamachirqan casarasqa warmiq prometekusqanmanta, taytanpa wasinpiraq tiyaq sipaspa prometekusqanmantawan.

will be added

X\