Números 3

1Sinaí orqopi Moisesta Señor Diospa rimaykusqan tiempopin, Moisespa Aaronpa mirayninkuna kaykuna karqan: 2–Aaronpa phiwinmi karqan Nadab, qatiqninkunataq Abiú, Eleazar, Itamarpiwan. 3Paykunatan sacerdote kanankupaq aceitewan hawispa churarqanku. 4Nadabwan Abiuwanqa Señor Diospa ñawpaqenpin wañupurqanku, Sinaí ch'inneqpi Señor Diosman mana haywana ninata haywasqankurayku. Paykunaqqa manan churinku karqanchu, chaymi Eleazarpiwan Itamarpiwan taytanku Aarón kawsashaqtin sacerdote karqanku. 5Señor Diosmi Moisesta nirqan: 6–Leví ayllu runakunata huñuy, hinaspa sacerdote Aaronpa kamachinpi llank'anankupaq churay. 7Ñoqawan Tupana Karpapin llank'anqaku Aaronpa kamachisqan, llapan llaqtaq rantinpi lliwta ruwaspanku, 8karpapi llapan serviciokunata waqaychanqaku, Israel runakunaq rantinpi servinqaku. 9Leví runakunataqa Israel runakuna ukhumanta t'aqaspaykin Aaronta churinkunatawan servinankupaq qopunki. 10Sacerdote-kay llank'aymanqa Aaronta churinkunatawanmi churanki. Pipas sacerdote hina llank'anman mana sacerdote kashaspa chayqa, wañuchisqan kanqa, nispa. 11Señor Diosmi Moisesta nirqan: 12–Israel runakuna ukhumantan Leví runakunata akllakurqani sapanka familiaq phiwi churinpa rantinpi, chaymi Leví runakunaqa ñoqaq kapunku, 13llapa phiwi churi ñoqaman tupawasqanrayku. Egipto suyu runakunaq llapan phiwi churinta wañuchishaspaymi, Israel runakunaq llapan phiwi churinta, uywankuq ñawpaq wachay uñantapas ñoqapaq t'aqakurqani. Chayraykun ñoqaman tupawan. Ñoqaqa Señor Diosmi kani, nispa. 14Sinaí ch'inneqpin Señor Diosqa Moisesta nirqan: 15–Leví ayllu runakunata ayllunkuman hina familiankuman hina yupay, llapan qharikunata huk killayoqmanta wichayman, nispa. 16Hinan Moisesqa paykunata yuparqan Señor Diospa kamachisqanman hina. 17Kaykunan karqan Levipa churinkuna: Gersón, Cohat, Meraripiwan. 18Gersonpa miraynin ayllukunan karqan Libnipiwan Simeipiwan. 19Cohatpa miraynin ayllukunan karqan Amram, Izhar, Hebrón, Uzielpiwan. 20Merariq miraynin ayllukunan karqan Mahlipiwan Musipiwan. Chay ayllukunamantan Leví runakunaq llapan familiankuna paqarirqan. 21Gersonpa mirayninkunan karqan Libni ayllupas Semei ayllupas. 22Chay ayllukunapi llapan qharikunan huk killayoqmanta wichayman qanchis waranqa phisqa pachak karqan. 23Paykunan Dioswan Tupana Karpaq qhepanpi inti haykuy ladopi karpakurqanku. 24Umallinkutaq karqan Laelpa churin Elisafat. 25Paykunan Dioswan Tupana Karpapi cuidarqanku karpata, karpaq qara qatanta, karpa punku cortinata, 26karpa kancha punku cortinata, kancha muyuriq cortinakunata, hap'ichina waskhakunata, tukuy kaqninkunatawan. 27Cohatpa mirayninkunan karqan Amram ayllu, Izhar ayllu, Hebrón ayllu, Uziel ayllupiwan. 28Chay ayllukunapi llapan qharikunan huk killayoqmanta wichayman pusaq waranqa kinsa pachak karqan. Paykunan karpa ukhupi kaqkunata cuidarqanku. 29Karpakurqankutaq Dioswan Tupana Karpaq uray ladonpi, 30umallinkutaq Uzielpa churin Elizafán karqan. 31Kaykunatan cuidarqanku: rimanakuy arcata, mesata, candelerota, altarkunata, yupaychaypaq t'aqasqa serviciokunata, t'aqaq cortinata, hayk'an chaypi kaq serviciokunatawan. 32Leví ayllu umallikunaq qollanantaq karqan sacerdote Aaronpa churin Eleazar, paymi Dioswan Tupana Karpa cuidaqkunata kamachirqan. 33Merariq mirayninkunan karqan Mahli ayllu, Musi ayllupiwan. 34Chay ayllukunapi llapan qharikunan huk killayoqmanta wichayman soqta waranqa iskay pachak karqan. 35Umallinkutaq Abihailpa churin Zuriel karqan, Dioswan Tupana Karpaq wichay ladonpitaq karpakurqanku. 36Paykunan cuidarqanku karpa marcokunata, suskhuq k'aspikunata, sayaq k'aspikunata, k'aspipaq sayanakunata, hayk'an chaypi kaq serviciokunata, 37karpa kancha muyuriqpi sayaq k'aspikunata, k'aspipaq sayanakunata, takarpukunata, waskhakunatawan. 38Inti lloqsimuy ladopi Dioswan Tupana Karpaq ñawpaqenpin Moisespiwan Aaronpiwan, Aaronpa churinkunapiwan karpakurqanku, paykunan Karpata cuidarqanku wakin Israel runakunaq rantinpi. Pipas mana sacerdote kashaspa sacerdote hina ruwaqqa wañuchisqan kanqa. 39Moisespiwan Aaronpiwanmi Leví ayllu runakunata yuparqanku, ayllunkuman hina familiankuman hina, Señor Diospa kamachisqanman hina. Chaymi llapa qharikuna huk killayoqmanta wichayman iskay chunka iskayniyoq waranqa karqan. 40Señor Diosmi Moisesta nirqan: –Israel runakunaq llapan phiwi churinkunata huk killayoqmanta wichayman yupay, hinaspa qelqay sutinkuta. 41Chaymantataq Israel runakunaq phiwi churinpa rantinpi Leví runakunata t'aqapuway. Ñoqaqa Señor Diosmi kani. Chhaynallataq Israel runakunapaq uywanpa ñawpaq wachay uñankunaq rantinpipas Leví runakunaq uywanta t'aqapuway, nispa. 42Hinan Moisesqa Israel runakunaq llapa phiwi churinkunata yuparqan, Señor Diospa kamachisqanman hina. 43Chaymi llapan phiwi churikunata huk killayoqmanta wichayman yupaspa sutinkuta qelqarqan, iskay chunka iskayniyoq waranqa iskay pachak qanchis chunka kinsayoq qharikunataq karqanku. 44Hinan Señor Diosqa Moisesta nirqan: 45–Israel runakunaq phiwi churinkunaq rantinpi Leví runakunata t'aqapuway, hinallataq Israel runakunaq uywanpa rantinpi Leví runakunaq uywanta t'aqapuway, Leví runakunaqa ñoqaqmi. Ñoqaqa Señor Diosmi kani. 46Ichaqa Leví runakunamantaqa Israel runakunaq phiwi churinkunaqa aswan askhan kanku, chayrayku iskay pachak qanchis chunka kinsayoq qharikunata horqokapunapaq 47sapanka runamanta phisqa qolqeta cobray, Ñoqawan Tupana Karpapi chanin pesana qolqeman hina, chaymi chunka gramo qolqe. 48Hinaspa chay yapasqa phiwi churikunamanta cobrasqayki qolqeta Aaronman churinkunamanwan qonki, horqokapuy precio kananpaq, nispa. 49Chaymi Moisesqa huñurqan Israel runakunaq iskay pachak qanchis chunka kinsayoqmanta yaparisqa qolqeta phiwi churinkuta horqokapunankupaq. 50Chaskirqantaq waranqa kinsa pachak soqta chunka phisqayoq qolqeta, Dioswan Tupana Karpapi chanin pesana qolqeman hina. 51Chaymantataq chay qolqeta Aaronman churinkunamanwan qorqan, Señor Diospa kamachisqanman hina.

will be added

X\