Números 29

1Qanchiskaq killa qallariy p'unchaypin yupaychawanaykichispaq huñukunkichis, amataq imatapas llank'ankichischu. Chay p'unchaymi waqrakunata tocankichis. 2Ruphachina sacrificiotan haywawankichis mana imanasqa huk torillota, huk anejota, watayoq qanchis borregotawan, chaykunaq sumaq q'apaynin sonqoyman chayaq kananpaq. 3Sapanka torillota haywawankichis ruru ofrendatawan aceitepi pitusqa soqta kilo ñut'u hak'uta, anejota aceitepi pitusqa tawa kilo ñut'u hak'utawan, 4sapanka borregotapas aceitepi pitusqa iskay kilo ñut'u hak'utawan. 5Haywallawankichistaq huk orqo cabrata hucha pampachay sacrificiopaq. 6Chay p'unchaypin mosoq killa rikhuriy sacrificiota sapa p'unchay sacrificiokunatapas tupaqnin ruru ofrendakunantinta, hich'aykunapaq vino ofrendakunantinta kamachikusqayman hina haywallawankichispuni. Chaykunaqa mikhuna ofrendakunan, sumaq q'apaynintaq sonqoyman chayan. 7Qanchiskaq killaq chunkakaq p'unchayninpiqa yupaychawanaykichispaqmi huñukunkichis. Hinaspa chay p'unchay ayunankichis, amataq imatapas llank'ankichischu. 8Ruphachina sacrificiota haywawankichis mana imanasqa huk torillota, huk anejota, watayoq qanchis borregotawan, chaykunaq sumaq q'apaynin sonqoyman chayaq kananpaq. 9Sapanka torillota haywawankichis ruru ofrendatawan aceitepi pitusqa soqta kilo ñut'u hak'uta, anejota aceitepi pitusqa tawa kilo ñut'u hak'utawan, 10sapanka borregotapas aceitepi pitusqa iskay kilo ñut'u hak'utawan. 11Haywallawankichistaq huk orqo cabrata hucha pampachay sacrificiopaq, hinallataq haywawankichis pampachay p'unchaypi sacrificiotapas sapa p'unchay ruphachina sacrificiokunatapas ruru ofrendantinta, hich'aykunapaq vino ofrendantintakama. 12Qanchiskaq killaq chunka phisqayoq p'unchayninpin yupaychawanaykichispaq huñukunkichis, amataq imatapas llank'ankichischu, hinaspa qanchis p'unchay ñoqapaq fiestata ruwankichis. 13Fiesta qallariy p'unchaymi mikhuna ofrendata haywawankichis mana imanasqa chunka kinsayoq torillota, iskay anejota, watayoq chunka tawayoq borregotawan. 14Sapanka torillota ruru ofrendatawan haywawankichis aceitepi pitusqa soqta kilo ñut'u hak'uta, sapanka anejota aceitepi pitusqa tawa kilo ñut'u hak'uta, 15sapanka borregotapas aceitepi pitusqa iskay kilo ñut'u hak'utawan. 16Haywallawankichistaq huk orqo cabrata hucha pampachay sacrificiopaq. Hinallataq haywawankichis sapa p'unchay ruphachina sacrificiota ruru ofrendantinta hich'aykunapaq vino ofrendantintakama. 17Fiestaq iskaykaq p'unchayninpin haywawankichis mana imanasqa chunka iskayniyoq torillota, iskay anejota, watayoq chunka tawayoq borregotawan. 18Hinallataq sapankaman tupaqnin ruru ofrendatapas hich'aykunapaq vino ofrendatapas kamachisqayman hina haywawankichis. 19Haywallawankichistaq huk orqo cabrata hucha pampachay sacrificiopaq. Hinallataq haywawankichis sapa p'unchay ruphachina sacrificiota ruru ofrendantinta hich'aykunapaq vino ofrendantintakama. 20Fiestaq kinsakaq p'unchayninpin haywawankichis mana imanasqa chunka hukniyoq torillota, iskay anejota, watayoq chunka tawayoq borregotawan. 21Hinallataq sapankaman tupaqnin ruru ofrendatapas hich'aykunapaq vino ofrendatapas kamachisqayman hina haywawankichis. 22Haywallawankichistaq huk orqo cabrata hucha pampachay sacrificiopaq. Hinallataq haywawankichis sapa p'unchay ruphachina sacrificiota ruru ofrendantinta hich'aykunapaq vino ofrendantintakama. 23Fiestaq tawakaq p'unchayninpin haywawankichis mana imanasqa chunka torillota, iskay anejota, watayoq chunka tawayoq borregotawan. 24Hinallataq sapankaman tupaqnin ruru ofrendatapas hich'aykunapaq vino ofrendatapas kamachisqayman hina haywawankichis. 25Haywallawankichistaq huk orqo cabrata hucha pampachay sacrificiopaq. Hinallataq haywawankichis sapa p'unchay ruphachina sacrificiota ruru ofrendantinta hich'aykunapaq vino ofrendantintakama. 26Fiestaq phisqakaq p'unchayninpin haywawankichis mana imanasqa isqon torillota, iskay anejota, watayoq chunka tawayoq borregotawan. 27Hinallataq sapankaman tupaqnin ruru ofrendatapas hich'aykunapaq vino ofrendatapas kamachisqayman hina haywawankichis. 28Haywallawankichistaq huk orqo cabrata hucha pampachay sacrificiopaq, hinallataq haywawankichis sapa p'unchay ruphachina sacrificiota ruru ofrendantinta hich'aykunapaq vino ofrendantintakama. 29Fiestaq soqtakaq p'unchayninpin haywawankichis mana imanasqa pusaq torillota, iskay anejota, watayoq chunka tawayoq borregotawan. 30Hinallataq sapankaman tupaqnin ruru ofrendatapas hich'aykunapaq vino ofrendatapas kamachisqayman hina haywawankichis. 31Haywallawankichistaq huk orqo cabrata hucha pampachay sacrificiopaq, hinallataq haywawankichis sapa p'unchay ruphachina sacrificiota ruru ofrendantinta hich'aykunapaq vino ofrendantintakama. 32Fiestaq qanchiskaq p'unchayninpin haywawankichis mana imanasqa qanchis torillota, iskay anejota, watayoq chunka tawayoq borregotawan. 33Hinallataq sapankaman tupaqnin ruru ofrendatapas hich'aykunapaq vino ofrendatapas kamachisqayman hina haywawankichis. 34Haywallawankichistaq huk orqo cabrata hucha pampachay sacrificiopaq, hinallataq haywawankichis sapa p'unchay ruphachina sacrificiota ruru ofrendantinta hich'aykunapaq vino ofrendantintakama. 35Pusaqkaq p'unchaypitaq yupaychawanaykichispaq huñukunkichis, amataq imatapas llank'ankichischu. 36Ruphachina sacrificiota hina mikhuna ofrendata haywawankichis mana imanasqa huk torillota, huk anejota, watayoq qanchis borregotawan sumaq q'apaynin sonqoyman chayaq kananpaq. 37Hinallataq sapankaman tupaqnin ruru ofrendatapas hich'aykunapaq vino ofrendatapas kamachisqayman hina haywawankichis. 38Haywallawankichistaq huk orqo cabrata hucha pampachay sacrificiopaq, hinallataq haywawankichis sapa p'unchay ruphachina sacrificiota ruru ofrendantinta hich'aykunapaq vino ofrendantintakama. 39Chay ruphachina sacrificiokunata ruru ofrendakunata, hich'aykunapaq vino ofrendakunata, sumaq kawsay ofrendakunata unanchasqay fiestakunapi haywawankichis, sapaqmi kanqa prometekusqaykichista hunt'aspa qosqaykichis ofrendakunapas, sumaq sonqo ofrendakunapas, nispa. 40Hinan Moisesqa Israel runakunaman Señor Diospa kamachisqanta lliwta willarqan.

will be added

X\