Números 27

1Josepa churinmi karqan Manasés, Manasespa churintaq Maquir, Maquirpa churintaq Galaad, Galaadpa churintaq Hefer, Heferpa churintaq Zelofehad. Zelofehadpa ususinmi phisqa karqan: Maala, Noa, Hogla, Milca, Tirsapiwan. 2Chay Manasés ayllu phisqa ñaña warmikunan Dioswan Tupana Karpa punkuta rirqanku, Moisesta, sacerdote Eleazarta, umallikunata huñunasqa Israel runakunatawan rimapayanankupaq, hinaspan nirqanku: 3–Taytaykun ch'inneqpi wañukapurqan, ichaqa manan payqa Señor Dios contra huñukuq Corepa t'aqanpichu karqan. Pay kikinpa huchanmantan wañupurqan, manataqmi qhari wawata churiyarqanchu. 4Chaywanpas manan chaninchu taytaykuq sutin ayllu miray qelqamanta pichasqa kanan, mana churiyoq kasqanraykullaqa. Chhaynaqa, taytaykuq wawqenkunaman tupaq hallp'amanta ñoqaykuman hallp'ata qowayku, nispa. 5Hinan Moisesqa chay warmikunaq mañakusqanta Señor Diosman willarqan. 6Chaymi Señor Diosqa Moisesta nirqan: 7–Zelofehadpa ususinkunaqa chanintan mañakunku. Chhaynaqa, taytankuq wawqenkunaman tupaq hallp'amanta hallp'ata qoy, taytankuman tupaq hallp'ata paykunaman qopuy. 8Hinallataq Israel runakunatapas kamachiy: Mayqen runapas mana churiyoq wañupunman chayqa, ususinmanmi hallp'anta saqepunqa. 9Manataq ususinpas kanmanchu chayqa, wawqenkunamanmi hallp'anta saqepunqa. 10Wawqenkunapas manataq kanmanchu chayqa, taytanpa wawqenkunamanmi hallp'anta saqepunqa. 11Taytanpa wawqenkunapas manallataq kanmanchu chayqa, aswan qaylla ayllunmanmi hallp'anta saqepunqa. Chaymi Israel runakunapaq kamachikuy kanqa, Señor Diospa kamachiwasqanman hina, nispa. 12Señor Diosmi Moisesta nirqan: –Kay Abarim orqo-orqoman wichay, hinaspa Israel runakunaman qonay hallp'ata qhawarinki. 13Chay hallp'ata rikusqayki qhepataqa wañukapunkin, Aarón wawqeyki hina. 14Zin ch'inneqpi Meriba qayllapi runakuna ñoqa contra chhuchupakushaqtinmi, qankuna iskayniykichis kamachisqayta mana kasuwarqankichischu, manallataq runakunaq qayllanpipas hatunchawarqankichischu, nispa. Meribaqa Zin ch'inneq Cadespi unu pukyun. 15Hinan Moisesqa Señor Diosta nirqan: 16–Señor Diosníy, qanmi llapa runaman kawsay qoqqa kanki, llaqtaykita umallinanpaq huk umallita akllay, 17maymanña llaqtayki riqtinpas paymi pusanqa, awqa-tinkuytapas paymi umallinqa, ama llaqtayki mana michiqniyoq oveja hina purinanpaq, nispa. 18Chaymi Señor Diosqa Moisesman kutichirqan: –Nunpa churin Josuemi chaypaq hina allin qhari, payta akllaspa uman pataman makiykita churaykuy. 19Chaymantataq sacerdote Eleazarman llapa runakunamanwan pusanki, hinaspa paykunaq ñawpaqenpi umallinkupaq churanki. 20Josuetaqa rantiykipi wakin atiyniykiwan kamachinanpaqmi churanki, ahinapin llapa Israel llaqta payta kasunqaku. 21Josueqa umalliña kaspanmi sacerdote Eleazarwan sapa kuti tapuchiwanqa, Eleazartaq Josuepa sutinpi munayniy tapuna Urimwan ñoqata tapuwanqa. Ahinapin Josueqa Israel runakunata tukuy ima ruwanankupaqpas kamachinqa, nispa. 22Hinan Moisesqa Señor Diospa kamachisqanman hina lliwta ruwaspa, sacerdote Eleazarman llapan Israel runakunamanwan Josueta pusarqan, 23hinaspa paypa uman pataman makinta churaykuspa, rantinpi kamachikunanpaq churarqan, Señor Diospa kamachisqanman hina.

will be added

X\