Números 26

1Israel runakunata millay onqoywan muchuchisqan qhepatataq Señor Diosqa Moisesta sacerdote Aaronpa churin Eleazartawan nirqan: 2–Llapan Israel runakunata ayllunkuman hina iskay chunka watayoqmanta wichayman yupaychis, awqa-tinkuy atiqkunata, nispa. 3Hinan Moisesqa Eleazarpiwan Jericó chimpa Jordán mayu qaylla Moab suyu pampapi Israel runakunata nirqanku: 4–Iskay chunka watayoqmanta wichayman qharikunata yupaychis, Señor Diospa kamachiwasqankuman hina, nispa. Kaykunan karqan Egipto suyumanta lloqsimuq Israel runakuna: 5–Israelpa phiwi churin Rubenpa mirayninmi karqan: Henocpa ayllun, Falupa ayllun, 6Hezronpa ayllun, Carmiq ayllunpiwan. 7Chay ayllukunapi runakunan karqan tawa chunka kinsayoq waranqa qanchis pachak kinsa chunka qharikuna. 8Falupa churinmi Eliab karqan, 9Eliabpa churinkunataq Nemuel, Datán, Abirampiwan karqan. Datanpiwan Abirampiwanqa umallin karqanku, hinaspan Moisés contra Aarón contra sayarirqanku. Chaymantataq Señor Dios contra Coré sayariqtin paywan huñukurqanku. 10Ichaqa paykunatan kinsantinta pampa kicharqokuspa millp'urqan, Corewan huñukuq iskay pachak phisqa chunka qharikunatataq nina ruphapurqan. Chay wañuymi wakin runakunapaq huk anyaykuy karqan. 11Chaywanpas Corepa churinkunaqa manan wañurqankuchu. 12Simeonpa mirayninmi karqan: Nemuelpa ayllun, Jaminpa ayllun, Jaquinpa ayllun, 13Zeraq ayllun, Saulpa ayllunpiwan. 14Chay ayllukunapi runakunan karqan iskay chunka iskayniyoq waranqa iskay pachak qharikuna. 15Gadpa mirayninmi karqan: Zedonpa ayllun, Haguiq ayllun, Suniq ayllun, 16Ozniq ayllun, Eriq ayllun, 17Arodpa ayllun, Areliq ayllunpiwan. 18Chay ayllukunapi runakunan karqan tawa chunka waranqa phisqa pachak qharikuna. 19Judapa churinkunan karqan Erpiwan Onanpiwan, paykunaqa Canaán suyupin wañupurqanku. 20Judapa mirayninmi karqan: Selaq ayllun, Farespa ayllun, Zeracpa ayllunpiwan. 21Farespa mirayninmi karqan Hezronpa ayllun, Hamulpa ayllunpiwan. 22Chay ayllukunapi runakunan karqan qanchis chunka soqtayoq waranqa phisqa pachak qharikuna. 23Isacarpa mirayninmi karqan: Tolaq ayllun, Puaq ayllun, 24Jasubpa ayllun, Simronpa ayllunpiwan. 25Chay ayllukunapi runakunan karqan soqta chunka tawayoq waranqa kinsa pachak qharikuna. 26Zabulonpa mirayninmi karqan: Seredpa ayllun, Elonpa ayllun, Jahleelpa ayllunpiwan. 27Chay ayllukunapi runakunan karqan soqta chunka waranqa phisqa pachak qharikuna. 28Josepa mirayninmi karqan Manasespa ayllun Efrainpa ayllunpiwan. 29Manasespa churinmi karqan Maquir, Maquirpa churintaq karqan Galaad. 30Galaadpa mirayninmi karqan: Jezer ayllu, Helec ayllu, 31Asriel ayllu, Shehem ayllu, 32Semida ayllu, Hefer ayllupiwan. 33Heferpa churin Zelofehadpaqa manan churin karqanchu, aswanpas ususinkunallan, paykunaq sutinmi karqan Maala, Noa, Hogla, Milca, Tirsapiwan. 34Chay ayllukunapi runakunan karqan phisqa chunka iskayniyoq waranqa qanchis pachak qharikuna. 35Efrainpa mirayninmi karqan: Sutelaq ayllun, Bequerpa ayllun, Tahanpa ayllunpiwan. 36Sutelaq mirayninmi karqan Eranpa ayllun. 37Chay ayllukunapi runakunan karqan kinsa chunka iskayniyoq waranqa phisqa pachak qharikuna. Chaykunan Josepa miraynin karqan ayllunkuman hina. 38Benjaminpa mirayninmi karqan: Belaq ayllun, Asbelpa ayllun, Ahirampa ayllun, 39Safufanpa ayllun, Hufanpa ayllunpiwan. 40Belaq mirayninmi karqan Ardpa ayllun, Naamanpa ayllunpiwan. 41Chay ayllukunapi runakunan karqan tawa chunka phisqayoq waranqa soqta pachak qharikuna. 42Danpa mirayninmi karqan Suhampa ayllunkuna. 43Chay ayllukunapi runakunan karqan soqta chunka tawayoq waranqa tawa pachak qharikuna. 44Aserpa mirayninmi karqan: Imnaq ayllun, Isuiq ayllun, Beriaq ayllunpiwan. 45Beriaq mirayninmi karqan Heberpa ayllun, Malquielpa ayllunpiwan. 46Aserpa ususinqa ch'ullallan karqan, Sera sutiyoq. 47Chay ayllukunapi runakunan karqan phisqa chunka kinsayoq waranqa tawa pachak qharikuna. 48Neftalipa mirayninmi karqan: Jahzeelpa ayllun, Guniq ayllun, 49Jezerpa ayllun, Silempa ayllunpiwan. 50Chay ayllukunapi runakunan karqan tawa chunka phisqayoq waranqa tawa pachak qharikuna. 51Llapan Israel runakunan yupasqaman hina karqanku soqta pachak hukniyoq waranqa qanchis pachak kinsa chunka qharikuna. 52Señor Diosmi Moisesta nirqan: 53–Chay ayllukunamanmi hayk'achus kasqankuman hina hallp'ata rakinki hap'ikapunankupaq. 54Askha runayoq ayllukunamanqa hatun hallp'atan qonki, pisi runayoq ayllukunamantaq tinku hallp'ata qonki. 55Chay hallp'ataqa sorteopin rakinki. Sapanka ayllun ayllunkuq sutinman hina hallp'ata chaskinqa. 56Hatun ayllumanpas huch'uy ayllumanpas sorteopin hallp'ataqa rakinki, nispa. 57Levipa mirayninmi ayllunkuman hina yupasqa karqan: Gersonpa ayllun, Cohatpa ayllun, Merariq ayllunpiwan. 58Paykunaq miraynintaq karqan Libni ayllu, Hebrón ayllu, Mahli ayllu, Musi ayllu, Coré ayllupiwan. Amrampa taytanqa Cohatmi karqan. 59Amramqa Levipa ususin Jocabedwanmi casarakurqan, payqa Egipto suyupin nacesqa. Jocabedmi Amram qosanpaq wachakurqan Aaronta, Moisesta, Mariatawan. 60Aaronpa churinkunan karqan Nadab, Abiú, Eleazar, Itamarpiwan. 61Nadabwan Abiuwanqa mana haywana ninata Señor Diospa ñawpaqenpi haywasqanku hawan wañupurqanku. 62Levipa miraynin llapan qharikunaqa huk killayoqmanta wichaymanmi iskay chunka kinsayoq waranqa karqanku. Paykunaqa manan Israel runakunawan kuska yupasqachu karqanku, hallp'ata mana chhikantapas chaskisqanku hawa. 63Chay hinan karqan Jericó qhaway Jordán mayu qaylla Moab suyu pampapi Moisespiwan sacerdote Eleazarpiwan Israel runakunata yupasqanku. 64Sinaí ch'inneqpi Moisespiwan Aaronpiwan yupasqanku Israel runakunaqa manan ch'ullapas kawsarqanñachu. 65Señor Diosmi paykunaman willasqa: Qankunaqa kay ch'inneqpin wañupunkichis, Jefoneq churin Calebpiwan Nunpa churin Josuellapiwanmi mana wañunqakuchu, nispa. Chaymi ñawpa Israel runakunaqa mana ch'ullapas qheparqankuchu.

will be added

X\