1 Israel runakuna Sitimpi tiyashaqtinmi Israel qharikunaqa Moab suyu warmikunawan qhelli hucha ruwayta qallarirqanku. 2 Chay warmikunan paykunata waqyarqan diosninkuman sacrificiota haywanankupaq. Hinan Israel runakunaqa paykunawan mikhurqanku, diosninkutataq yupaycharqanku. 3 Ahinapin paykunaqa Peor nisqa cheqaspi Baal idolota yupaychayta qallarirqanku. Chaymi Señor Diosqa Israel runakuna contra k'arakta phiñakurqan, 4 hinaspan Moisesta nirqan: –Israel llaqta llapan umallikunata huñuy, hinaspa ñawpaqeypi p'unchayraq kashaqtin paykunata seq'oy. Hinan Israel contra mana phiñakusaqñachu, nispa. 5 Chaymi Moisesqa Israel juezkunata kamachirqan: –Sapankaykichispa aylluykichispi Peor nisqa cheqaspi Baal idolota yupaychaq qharikunata wañuchiychis, nispa. 6 Dioswan Tupana Karpa punkupi Israel runakuna huñuykusqa waqashaqtinkutaq, huk Israel qhari Madián warmita karpanman pusasharqan, Moisespas huñuykusqa llapa runakunapas rikushaqtin. 7 Hinan chayta rikuspa sacerdote Aaronpa nieton Eleazarpa churin Fineesqa Israel runakuna huñunasqamanta t'aqarikuspa huk lanzata hap'irqan. 8 Hinaspa chay Israel runaq qhepanta qatiparqan puñunan karpakama, chaypitaq Israel qharita Madián warmitawan wiksankumanta lanzawan sat'irqorqan. Ahinapin Israel runakunata wañuchishaq millay onqoyqa thanipurqan, 9 ichaqa ñan iskay chunka tawayoq waranqa runakunaña wañurqorqan. 10 Hinan Señor Diosqa Moisesta nirqan: 11 –Eleazarpa churin Fineesmi Israel runakuna contra phiñakuyniyta thanichin, imaynan ñoqaqa paykunamanta sientini, chhaynallataqmi Fineesqa ñoqamanta sientin. Chayraykun ñoqallatapuni yupaychawanankuta munaspapas, Fineespa ruwasqan hawa mana paykunata lliwtachu wañuchini. 12 Chhaynaqa Fineesta niy, Señor Diosmi nin: Ñoqan qanwan rimanakuni allillan kawsanaykipaq. 13 Hinallataq qanwan rimanakuni qanpas mirayniykipas wiñaypaq sacerdote kanaykichispaq, ñoqamanta sienteq kaspa Israel runakunata pampachachiwasqaykirayku, nispa. 14 Madián warmiwan kuska wañuchisqa qhariqa Salupa churin Zimrin karqan, Saluqa Simeón ayllupi huk familia umallin karqan. 15 Madián warmiq sutintaq Cozbi karqan, paypa taytan Zurqa Madián runakunaq huk ayllunpa umallinmi karqan. 16 Señor Diosmi Moisesta nirqan: 17 –Madián runakunata phawaykuspa wañuchimuychis. 18 Paykunan awqankuta hina q'oturqasunkichis Peor nisqa cheqaspi Baal ídolo yupaychaywan, Madián umalliq ususin Cozbiq qhellichasqanwan. Baalta yupaychasqa hawa millay onqoy chayamuqtinmi chay Cozbiqa lanzawan wañuchisqa karqan, nispa.
