Números 24

1Balaamqa Israelta saminchananta Señor Diospa munasqanta reparaspanmi, manaña watuq rirqanñachu, imaynan ñawpaqkaq kutikunapi rirqan hinataqa, aswanpas ch'inneq cheqastan qhawarirqan. 2Hinaspa Israel runakunata ayllunkuman hina karpasqata rikuqtin, Diospa Espiritun payman hunt'aykurqan, 3hinan Balaamqa kay hinata profetizarqan: –Ñoqa Beorpa churin Balaammi kayta profetizani, allin rikuq ñawiyoq kaspaymi kayta willani, 4Diospa siminta uyarispan kayta nini, Tukuy-atiyniyoq Diosmi rikhuriypi rikuchiwan, qhawashaq ñawintinmi pampaman wikch'ukuni. 5¡Jacob, ancha sumaqmi karpaykikuna! ¡Israel, sinchi munaymi wasiykikuna! 6Sumaq qheswa uray hinan mast'arikun, mayu cantopi t'ikakuna hinan phanchirin, Señor Diospa plantasqan áloe sach'akuna hinan wiñan, mayu patapi cedro sach'akuna hinan saphirin. 7Israelpa ununqa wisinankunatapas llimp'arinqan, muhunkutapas allin qarpasqapin tarpunqaku. Reyninqa rey Agagmantapas aswan atiyniyoqmi kanqa, paypa munaychakuyninqa ancha mentasqan kanqa. 8Diosmi Egipto suyumanta horqomurqan, payqa kallpasapa salqa toro hinan yanapan. Awqan suyukunatan Israelqa munaychakunqa, paykunaq tulluntan chhallunqa, wach'inanwantaq k'irinqa. 9Samaykuq china leonmanmi rikch'akun, león hinan thallaykun, ¿pitaq rikch'arichiq asuykunman? ¡Israelta saminchaqqa saminchasqa kachun! ¡Diospa llaqtanta ñakaqqa ñakasqa kachun! nispa. 10Hinan Balacqa sinchita Balaampaq phiñakurqan, makinta t'aqllakuspataq nirqan: –¡Ñoqaqa awqaykunata ñakanaykipaqmi waqyachimurqayki, qantaq ichaqa kinsa kutitaña paykunata saminchanki! 11¡Pasay! ¡Ripuy llaqtaykita! Ñoqaqa askhata pagapunaypaqmi prometekurqani, ichaqa Señor Diosmi chayta mana munanchu, nispa. 12Chaymi Balaamqa Balacman kutichirqan: –Kachamuwasqayki willaqkunamanqa allin sut'itan ñoqaqa nirqani: 13–Wasinpi hayk'an kaq qorita qolqetaña llapanta rey Balac qowanman chaypas, manan ñoqaqa Señor Diospa kamachinta p'akispa ñoqaq munayniymanta imatapas rimaymanchu, aswanpas imatachus Señor Dios kamachiwanqa rimanaypaq chayllatapunin rimasaq, nispa. 14Chhaynaqa, kutipusaqmi llaqtayta, ichaqa manaraq ripushaspaymi willaykuyta munayki imaynatachus chay llaqta qanpa suyuykita hamuq p'unchaykunapi ruwanqa chayta, nispa. 15Hinaspan Balaamqa kay hinata profetizarqan: –Ñoqa Beorpa churin Balaammi kayta profetizani, allin rikuq ñawiyoq kaspaymi kayta willani, 16Diospa siminta uyarispan kayta nini, Ancha Hatun Diosmi yachachiwan, Tukuy-atiyniyoq Diosmi rikhuriypi rikuchiwan, qhawashaq ñawintinmi pampaman wikch'ukuni. 17Huk runatan rikushani, payqa hamuq p'unchaykunapin rikhurinqa, sinchi karupin payta rikushani. Payqa ch'aska hinan Jacobpa mirayninmanta lloqsimushan, huk reymi Israelmanta hatarimushan. Moabpa umantan sarunqa, Shet runakunatan llapanta t'ustunqa. 18Edom suyutan atipanqa, Seirpi tiyaqkunan atipasqa kanqa, Israelqa musphanakunatan ruwanqa. 19Jacobmi awqankunata kamachinqa, paymi Ar llaqtapi qhepaqkunata ch'usaqyachinqa, nispa. 20Chaymantataq Balaamqa Amalec suyuta qhawarispa, kay hinata profetizarqan: –Amalec runakunaqa kay pachantinpi atiyniyoqmi karqanku, ichaqa ch'usaqyachisqan tukukunqaku, nispa. 21Rikullarqantaq Cen runakunata, hinaspa khaynata profetizarqan: –Pakakunaykichis wasiqa ancha allinmi, q'esaykichispas qaqa t'oqopin. 22Cen runakuna, q'esaykichismi thunisqa kanqa, Asur runakuna presota apasuqtiykichis, nispa. 23Chaymantataq khaynata profetizarqan: –Ay, ¿pitaq kawsanman tukuy chaykunata Dios ruwashaqtinri? 24Chipre islamantan barcokuna hamunqa, Asurta Hebertawanmi lliwta atipanqa, chay qhepatataq paykunapas atipasqallataq kanqa, nispa. 25Chaymantataq Balaamqa wasinta ripurqan, hinallataq Balacpas wasinta kutipurqan.

will be added

X\