Números 23

1Hinan Balaamqa Balacta nirqan: –Qanchis altarta kaypi sayarichipuway, hinaspataq wakichipuway qanchis torillota qanchis anejotawan, nispa. 2Chaymi Balacqa chayta ruwarqan, hinamantataq iskayninku sacrificiota haywarqanku sapanka altarpi, huk torillota huk anejotawan. 3Chaymantataq Balaamqa Balacta nirqan: –Ruphachina sacrificioyki qayllapi kashay, ñoqataq Señor Dioswan tupaq risaq, ichapaschá ñoqaman hamuspa imatapas niwanman, chaytataq willasqayki, nispa. Hinaspanmi Balaamqa huk q'ara orqota wicharqan. 4Señor Diosmi Balaamman orqopi rikhurirqan, hinan Balaamqa payta nirqan: –Qanchis altartan wakichini, sapanka altarpitaq huk torillota huk anejotawan sacrificiota haywani, nispa. 5Señor Diosmi Balaamta kamachirqan ima simikunatachus rimananpaq, chaymantataq nirqan: –Balacman kutipuspa kamachisqay simikunata willamuy, nispa. 6Balaam kutipuqtintaq Balacqa Moab suyu llapan umallikunapiwan ruphachina sacrificion qayllapi sayasharqan. 7Chaymantataq Balaamqa kay hinata profetizarqan: –Balacqa Aram suyumantan pusamuwarqan, Moab reyqa inti lloqsimuy orqo-orqomantan waqyamuwarqan. Hamuy, Israelta ñakanki, niwarqan. Hamuy, Jacobpa llaqtanta pisichanki, niwarqan. 8¿Imaynataq ñakayman Dios mana ñakashaqtin? ¿Imaynataq pisichayman Señor Dios mana pisichashaqtin? 9K'awchi orqo patamantan paykunata rikushani, loqma orqo patamantan paykunata qhawashani. Chay llaqtaqa t'aqasqa kawsaqmi, wak llaqta runamantapas huk-niraqmi. 10Aqo hinaraqmi kanku, ¿pitaq Jacobpa mirayninta yupayta atinman? ¿Pitaq Israel runakunaq hayk'achus kasqantaqa yachanman? Allinchá kanman ñoqapas chay chanin runakuna hina wañukuyman, tukukuyniypas paykunaq tukukuynin hina kanman, nispa. 11Hinan Balacqa Balaamta nirqan: –¿Imatataq ruwashankiri? Ñoqaqa awqaykunata ñakanaykipaqmi waqyachimurqayki, manan awqaykunata saminchanaykipaqchu, nispa. 12Balaamtaq kutichirqan: –Ñoqaqa imatachus Señor Dios kamachiwan chayllatan rimani, nispa. 13Balactaq nirqan: –Chhaynaqa, hakuyá huk cheqasta, chaymantaqa manan lliw Israel runakunatachu rikunki, aswanpas wakillanta. Hinaspa chaymanta paykunata ñakapuwanki, nispa. 14Chaymantataq Balaamta pusarqan Pisga orqo patapi Qhawana Cheqasman, chaypitaq qanchis altarta sayarichirqan, hinaspa sapanka altarpi huk torillota huk anejotawan sacrificiota haywarqan. 15Chaymi Balaamqa Balacta nirqan: –Ruphachina sacrificioyki qayllapi kashay, ñoqataq Dioswan tupaq haqayneqta rirqosaq, nispa. 16Señor Diostaq Balaamman rikhurirqan, hinaspa ima simikunatachus rimananta kamachispa nirqan: –Balacman kutipuspa kamachisqay simikunata kikillanta willamuy, nispa. 17Balaam kutipuqtintaq Balacqa Moab suyu llapan umallikunapiwan ruphachina sacrificion qayllapi sayasharqan, Balactaq payta tapuykurqan: –¿Imanisunkin Señor Dios? nispa. 18Chaymi Balaamqa kay hinata profetizarqan: –Rey Balac, makilla uyariy nisqayta, Ziporpa churin, uyariy simiykunata. 19Diosqa manan runaq churinchu, Diosqa manan llullakuqchu, yuyaykusqantaqa manan cambianchu. Ruwanpunin imatapas rimarisqantaqa, hunt'anpunin payqa prometekusqantaqa. 20Saminchanaypaq kamachisqan kani, Dios saminchashaqtinqa manan hark'akuyta atiymanchu. 21Israelpiqa manan pipas q'otukuyta tarinchu, Jacobpa llaqtanpiqa manan pipas mana chanin kayta tarinchu. Señor Diosninmi paykunawan kashan, paytan hatunchanku: ¡Reyniykun kanki! nispanku. 22Diosmi Egipto suyumanta horqomurqan, payqa kallpasapa salqa toro hinan yanapan. 23Manan layqapas Israel contraqa valenchu, manan watuqpas Jacob contraqa atinchu. Kunanmi Israelmanta khaynata ninqaku: ¡Qhawariy! ¡Askha milagrotan Diosqa paypaq ruwarqan! nispa. 24Paykunaqa china león hinan hatarin, hap'irqonanpaq león hinan sayarin, manan samaykunqachu hap'isqanta p'atanankama, wañuchisqanpa yawarninta ukyanankama, nispa. 25Chaymi Balacqa Balaamta nirqan: –¡Chay llaqtata manaña ñakayta atinki chaypas, amayá saminchaychu! nispa. 26Hinan Balaamqa kutichirqan: –Ñoqaqa willarqaykiñan, imatachus Señor Dios kamachiwanqa chayllatapunin ruwasaq, nispa. 27Balactaq nirqan: –Chhaynaqa valekuyki, hakuyá huk cheqasta. Ichapaschá Dios munanman chay cheqasmanta chay llaqtata ñakapuwanaykita, nispa. 28Hinaspanmi Balacqa Balaamta pusarqan Peor nisqa orqo pataman, chaymantan llapan ch'inneq cheqas rikukurqan. 29Chaypin Balaamqa Balacta nirqan: –Sayarichipuway qanchis altarta, wakichipuwaytaq qanchis torillota qanchis anejotawan, nispa. 30Balactaq kamachisqanta hina ruwarqan, hinaspa sapanka altarpi huk torillota huk anejotawan sacrificiota haywarqan.

will be added

X\