1 Neguev hap'iypi Arad llaqta reyqa Canaán runan karqan, paymi uyarirqan “Israel runakunan Atarimman riq ñanninta hamushan” nisqata, hinaspan payqa Israel runakunawan maqanakuq rispa wakin Israel runakunata presota aparqan. 2 Chaymi Israel runakunaqa Señor Diosman prometekurqanku: –Señor Diosniyku, qan kay runakunata hap'ichiwankiku chayqa, llapan llaqtankutan thunisaqku, nispa. 3 Hinan Señor Diosqa Israel runakunaq mañakusqanta uyarispa Canaán runakunata paykunaman hap'ichirqan, chaymi Israel runakunaqa llapallanta Canaán runakunata wañuchirqanku, llaqtankutapas llapanta thunirqanku. Chaymi chay cheqasta Horma nispa suticharqanku. 4 Chaymantataq Israel runakunaqa Hor orqomanta puririrqanku Puka Qochaman riq ñanninta Edom suyuta muyurinankupaq. Hinan runakunaqa ñanta purishaspanku phiñakurqanku, 5 hinaspan Dios contra Moisés contra rimarqanku: –¿Imapaqmi Egipto suyumanta horqomuwarqankiku kay ch'inneqpi wañunaykupaq? ¡Manan unupas mikhunapas kanchu! ¡Amikuykuñan kay ima kasqan mikhunawan! nispa. 6 Chaymi Señor Diosqa venenoyoq mach'aqwaykunata rikhurichirqan runakunata picananpaq, hinan askha Israel runakuna mach'aqwaypa picasqan wañurqanku. 7 Runakunataq Moisesman rispa nirqanku: –¡Huchallikuykun Señor Dios contra qan contrapiwan rimaspayku! ¡Mañapuwayku Señor Diosmanta kay mach'aqwaykunata ñoqaykumanta ch'usaqyachinanpaq! nispa. Chaymi Moisesqa Señor Diosmanta mañakurqan Israel runakunata pampachananpaq. 8 Señor Diostaq Moisesta nirqan: –Chay mach'aqwaykunaq rikch'ayninta ruwaspa huk sayaq k'aspiman warkuy, hinan mach'aqwaypa picasqan runaqa k'aspipi warkusqa mach'aqway rikch'ayta qhawarispa qhaliyanqa, nispa. 9 Chaymi Moisesqa broncemanta huk mach'aqway rikch'ayta ruwaspa huk sayaq k'aspiman warkurqan, hinan pipas mach'aqwaypa picasqan kaqkunaqa bronce mach'aqway rikch'ayta qhawarispa qhaliyarqanku. 10 Chaymantataq Israel runakunaqa puririllarqankutaq, hinaspa Obotpi karpakurqanku. 11 Obotmanta puririspataq Moab suyuq inti lloqsimuy lado ch'inneqpi Ije-abarim llaqtapi karpakurqanku. 12 Chaymanta puririspataq Zered wayq'opi karpakurqanku. 13 Zeredmanta puririspataq Arnón mayu chimpa ch'inneqpi karpakurqanku, chay ch'inneqqa Amor runakunaq hallp'ankaman mast'arikun. Arnón mayuqa Moab suyuta Amor runakunaq suyuntawanmi t'aqan. 14 Chayraykun Señor Diospa Awqa-tinkuynin nisqa Qelqapiqa nin: ... Sufa hap'iypi Waheb llaqta, k'aha-k'ahakuna Arnón mayupas, 15 wayq'okunan uraykun Ar llaqtakama, Moab suyu qorpakaman mast'arikun..., nispa. 16 Arnón mayumantataq puririrqanku Beer nisqa p'uytuman, chaypin Señor Diosqa Moisesta nirqan: –Huñuy llapa runakunata, hinan unuta ñoqa qosqaykichis, nispa. 17 Chaymi Israel runakunaqa takirqanku: –¡Phullpumuy, unu p'uytu! ¡Takiychis unu p'uytumanta! 18 Umallikunan t'oqorqanku kamachina varankuwan, llaqta apukunan hasp'irqanku tawnankuwan, nispa. Chaymantataq Israel runakunaqa ch'inneqmanta puririrqanku Matanaman, 19 Matanamantataq Nahalielman, Nahalielmantataq Bamotman, 20 Bamotmantataq Moab suyupi kashaq wayq'oman. Chay wayq'oqa Pisga orqoman wichanapin kashan, chay orqomantan ch'inneq rikukun. (Dt 2.26-37) 21 Israel runakunan willaqkunata kacharqanku Amor runakunaq reynin Sehonta nimunankupaq: 22 –Ama hinachu kay, suyuykita pasarichiwayku. Manan chakra-chakrantachu pasasaqku, manataqmi uvas chakrantapaschu, manallataq pukyuykikunamantapas unuta ukyasaqkuchu, aswanpas hatun ñannillantapunin pasasaqku mana mayman kutirispa, nispa. 23 Amor runakunaq reynin Sehontaq ichaqa suyunta Israel runakunaq pasananta mana munaspa llapan soldadonkunata huñurqospa ch'inneqta pasarqan Israel runakunawan maqanakuq, hinan Jahazaman chayaspa chaypi Israel runakunaman phawaykurqan. 24 Israel runakunataq ichaqa paykunata sinchita atiparqanku, hinaspan hallp'ankuta hap'ikapurqanku, Arnón mayumanta wichay ladopi Jaboc mayukama, Amón runakunaq suyun qorpakama. Chay qorpaqa allin hark'asqan karqan. 25 Ahinapin Israel runakunaqa Amor runakunaq llapan llaqtankuta hap'ikapurqanku, hinallataq Hesbón llaqtata, muyuriqnin llaqtachakunatapas hap'ikapurqanku. 26 Hesbón llaqtaqa Amor runakunaq reynin Sehonpa tiyananmi karqan. Rey Sehonmi Moabpa ñawpaq reyninwan maqanakusqa, hinaspan Sehonqa llapan chay hap'iy hallp'anta qechusqa Arnón mayukama. 27 Chaymi taki kamariqkuna kay hinata nisqaku: –Hesbón llaqtaman hamuychis, wakmanta sayarichisqa kachun, Sehonpa llaqtan allichasqa kachun. 28 Hesbonmantan nina wach'irimurqan, Sehonpa llaqtanmantan nina qallumurqan, Moabpi kashaq Ar llaqtatan ch'usaqyachirqan, Arnón orqo-orqopi tiyaqkunatan ruphaykurqan. 29 ¡Ay, qanmanta Moab llaqta! ¡Quemos diosta yupaychaqkuna chinkasqan kashankichis! Quemosmi churinkunata wikch'upurqan ayqekunankupaq, ususinkunatataq Amor rey Sehonman hap'ichirqan preso kanankupaq. 30 Kunanqa mirayninkunan wañuchisqa, Hesbón llaqtamanta Dibón llaqtakama thunisqa, Medeba qaylla Nofa llaqtakaman paykunaqa ch'usaqyachisqa, nispa. 31 Chhaynatan Israel runakunaqa Amor runakunaq suyunta hap'ikapurqanku. 32 Hinallataq Moisesqa wakin qharikunata Jazer llaqta qhamiyaqta kacharqan, hinan Israel runakunaqa chay llaqtata muyuriqnin llaqtachakunatawan munaychakuspa chaypi tiyaq Amor runakunata qarqorqan. 33 Chaymantataq Israel runakunaqa Basán suyu ladoman kutirqanku, hinan Basán suyu rey Ogqa llapan ejercitonpiwan paykunawan Edreipi maqanakuq rirqan. 34 Señor Diostaq Moisesta nirqan: –Ama paykunata manchakuychu, ñoqan qanman hap'ichisqayki rey Ogta llapa ejercitonta, suyuntawan, chaymi Hesbonpi tiyaq Amor runakunaq reynin Sehonta hina paykunatapas ruwanki, nispa. 35 Hinan Israel runakunaqa wañuchirqanku rey Ogta, churinkunata, llapa ejercitontawan, manan hukllapas qheparqanchu. Hinaspan suyunkuta hap'ikapurqanku.
