Números 20

1Israel runakunan Zin ch'inneqman chayarqanku wata qallariy killapi, hinaspan Cadespi karpakurqanku. Chaypin María wañukapurqan, chaypitaq p'ampapurqanku. 2Llapan Israel runakunan unu mana kaqtin Moisés contra Aarón contrapiwan huñukuspa ch'aqwarqanku, 3hinaspa Moisesta nirqanku: –¡Wakin llaqta-masinchiskuna Señor Diospa qayllanpi wañushaqtin ñoqaykupas wañupuykuman karqan! 4¿Imapaqmi qankuna Señor Diospa llaqtanta kay ch'inneqman pusamunkichis? ¿Ñoqaykutapas uywaykutapas wañunaykutachu munankichis? 5¿Imapaqmi Egipto suyumanta pusamuwarqankiku kay millay cheqasman? ¡Kaypiqa manan wiñanchu trigopas, higospas, uvaspas, granadapas! ¡Manan unullapas ukyanapaq kanchu! nispa. 6Hinan Moisespiwan Aaronpiwan huñuykusqa runakunaq qayllanmanta hatarispa Dioswan Tupana Karpa punkuta rirqanku, hinaspa chaypi uyanpamanta pampaman wikch'ukurqanku. Hinan Señor Diospa lliphlli-kaynin rikhurirqan. 7Señor Diostaq Moisesta nirqan: 8–Tawnata hoqariy, hinaspa wawqeyki Aaronpiwan runakunata huñuychis. Chaymantataq llapa runakunaq qayllanpi qaqata rimaykunki unuta phawachinanpaq. Ahinapi unuta qaqamanta phawachinki, hinan llapa Israel runakunapas uywakunapas ukyanqaku, nispa. 9Moisestaq Señor Diospa ñawpaqenmanta tawnata hoqarirqan, paypa kamachisqanman hina. 10Chaymantataq Moisespiwan Aaronpiwan qaqaq qayllanman runakunata huñurqanku, hinan Moisesqa runakunata nirqan: –Uyariwaychis, k'ullu runakuna, ¿kay qaqamantachu unuta horqosaqku qankunaman ukyachinaykupaq? nispa. 11Chaymantataq Moisesqa iskay kutita tawnawan qaqata waqtarqan, hinan qaqamanta askha unu phawarqan, chaytan Israel runakunapas uywankupas ukyarqanku. 12Señor Diostaq Moisestawan Aarontawan nirqan: –Qankunaqa manan ñoqapi confiakurqankichischu, Israel runakunaq qayllanpipas manan ch'uya-kayniyta respetawarqankichischu, chayraykun Israel runakunataqa paykunaman qonay suyuman mana pusaykunkichischu, nispa. 13Chay cheqaspin Israel runakunaqa Señor Dios contra chhuchupakurqanku, hinan Señor Diosqa ch'uya kasqanta paykunaman rikuchirqan, chaymi chay cheqasqa “Meriba pukyu” nisqa kapurqan. 14Cadesmantapachan Moisesqa Edom suyu reyman willaqkunata kacharqan nimunankupaq: Wawqeyki Israelmi nisunki: Qanqa allintan yachanki tukuy sasachakuykuna taripawasqankuta. 15Ñawpa taytaykun Egipto suyuman rispanku, chaypi unayta tiyamusqaku. Egipto runakunan paykunata muchuchisqa, chay hinallatataqmi ñoqaykutapas muchuchiwarqanku. 16Chaymi Señor Diosmanta mañakurqayku, paytaq waqyakusqaykuta uyarispa angelta kachamuwarqanku, hinaspan Egipto suyumanta horqomuwarqanku. Chaymi qanpa suyuyki qorpa Cades llaqtapi kashayku. 17Chhaynaqa, valekuykikun suyuyki ñanninta pasarichinawaykikuta. Manan chakra-chakrantachu pasasaqku, manataqmi uvas chakrantapaschu, manallataq pukyuykikunamantapas unuta ukyasaqkuchu. Aswanpas hatun ñannillantapunin pasasaqku, suyuykita pasanaykukamaqa manan maymanpas kutirisaqkuchu, nispa. 18Edom reytaq ichaqa kutichirqan: –¡Manan suyuytaqa pasawaqchischu, mana chayqa qankunawan maqanakuqmi hamusaqku! nispa. 19Israel runakunataq nirqanku: –Hatun ñannillantapunin pasasaqku, ñoqaykupas otaq uywaykupas pukyuykikunamanta unuta ukyaykuman chayqa, pagapusqaykikun. Suyuykitaqa purispallan pasasaqku, nispa. 20Edom reytaq ichaqa kutichirqan: –¡Manapunin pasawaqchischu! nispa. Hinaspa Israel runakunawan maqanakuq rirqan allin armasqa atiyniyoq ejercitonpiwan. 21Chaymi Israel runakunaqa wak ñanninta ripurqanku, Edom suyu runakuna mana pasachiyta munasqan hawa. 22Llapa Israel llaqtan Cadesmanta puririrqan Hor orqo cheqasman. 23Hinan Señor Diosqa Edom suyuq qorpan Hor orqopi Moisesta Aarontawan nirqan: 24–Aaronmi wañukapunqa, manan haykunqachu Israel runakunaman qonay hallp'aman, Meriba unu pukyu qayllapi kamachisqayta mana kasuwasqaykichis hawa. 25Qan, Moisés, Aaronta churin Eleazartawan Hor orqo pataman pusay, 26hinaspa chaypi Aaronpa sacerdote p'achanta ch'utispa Eleazarta p'achachimuy. Aaronqa chaypin wañukapunqa, nispa. 27Moisestaq Señor Diospa kamachisqanta hina ruwarqan. Llapa Israel llaqta rikushaqtinmi paykunaqa Hor orqoman wicharqanku. 28Hinan Moisesqa Aaronpa sacerdote p'achanta ch'utispa Eleazarta chay p'achawan p'achachirqan. Aaronmi chay orqo patapi wañukapurqan, chaymantataq Moisesqa Eleazarpiwan orqomanta uraykampurqanku. 29Israel runakunataq Aaronpa wañukapusqanta yachaspanku, huk killa hunt'a Aaronmanta waqarqanku.

will be added

X\