Números 17

1Señor Diosmi Moisesta nirqan: 2–Israel runakunata kamachiy sapanka ayllu umalli huk tawnata apamunankupaq, llapanpiqa chunka iskayniyoq tawnakunan kanqa. Qantaq sutinkuta sapanka tawnapi qelqanki, 3Leví aylluq tawnanpitaq Aaronpa sutinta qelqanki. Sapanka ayllu umallikunaqmi huk tawnan kanqa. 4Chaymantataq Ñoqawan Tupana Karpapi rimanakuy arcaq ñawpaqenman churanki, chay arcaqa qankunawan tupanaymi. 5Akllakusqaypa tawnantan mukmuchisaq, ahinapin Israel runakunaq qankuna contra chhuchupakuyninta chinkachipusaq, nispa. 6Chaymi Moisesqa kikillanta Israel runakunata kamachirqan. Hinan sapanka ayllu umalli huk tawnata qorqan, llapanpitaq huñurqan chunka iskayniyoq tawnakunata. Chay tawnakunawan kuskataq Aaronpa tawnanpas kasharqan. 7Moisestaq karpapi kaq rimanakuy arcaq ñawpaqenman chay tawnakunata churarqan, 8qhepantin p'unchaytaq Moisesqa karpata rispa Leví ayllumanta Aaronpa tawnan mukmushaqta rikurqan, q'omer k'allmayoqta, t'ikashaqta, almendra rurukunapas poqosqaña kashaqta. 9Hinaspan payqa llapan tawnakunata Señor Diospa ñawpaqenmanta hoqarispa lloqsimurqan, Israel runakunamantaq rikuchirqan. Qhawasqanku qhepatataq sapanka umalli tawnankuta hap'ikapurqanku. 10Hinan Señor Diosqa Moisesta nirqan: –Aaronpa tawnantaqa kaqta churaykuy rimanakuy arcaq ñawpaqenman, chay tawnaqa kay mana kasukuq llaqtapaqqa huk señalmi kanqa. Ahinapin chhuchupakuyninkuta ch'inyachinki, manataq uyarisaqñachu, chaymi paykunapas manaña wañunqakuchu, nispa. 11Moisesqa lliwtan ruwarqan Señor Diospa kamachisqanman hina. 12Israel runakunataq Moisesta nirqanku: –¡Chinkasqan kapushayku! ¡Llapaykun wañupusaqku! 13Dioswan Tupana Karpaman llapa qayllaykuqkunan wañunqa. ¿Ahinapichu llapayku wañupusaqku? nispa.

will be added

X\