Números 15

1Señor Diosmi Moisesta nirqan: 2–Israel runakunata niy, Señor Diosmi nin: Hap'ikapunaykichispaq qosqaykichis chay suyuman haykuspaqa, 3ruphachina sacrificiotapas, wak sacrificiotapas haywawankichismanmi torotapas, ovejatapas, prometekusqaykichista hunt'aspa, otaq tukuy sonqoykichismanta ofrendata qospa, otaq fiestapi ofrendata qospapas. Chay haywawasqaykichis mikhuna ofrendaqa ñoqa Señor Diosniykichispa sonqoyman chayaq sumaq q'apaymi kanqa. 4Chay ofrendata ñoqa Señor Diosman apamuqqa ruru ofrendatawanmi apamunqa, iskay kilo ñut'u hak'uta huk litro aceitewan pitusqata, 5huk litro vinotawan apamunqa, chay ruphachina sacrificio haywasqa borrego pataman hich'aykunapaq. 6Huk anejota apaqqa chay sacrificiotawan kuska haywanqa tawa kilo ñut'u hak'uta huk litro yaparisqa aceitewan pitusqata, 7huk litro yaparisqa vinotawan, sacrificio pataman hich'aykunapaq, sonqoyman chayaq sumaq q'apaypuni kananpaq. 8Pipas prometekusqanta hunt'aspa otaq sumaq kawsay sacrificiota haywayta munaspapas huk torillota apanqa ruphachina sacrificiopaqpas wak sacrificiopaqpas chayqa, 9chay sacrificiotawan kuskan haywanqa soqta kilo ñut'u hak'uta yaqa iskay litro aceitewan pitusqata, 10yaqa iskay litro vinotawan, sacrificio pataman hich'aykunapaq, chaymi sonqoyman chayaq sumaq q'apayniyoq ruphachina ofrenda kanqa. 11Ahinatan ruwankichis toro sacrificiotapas, anejo sacrificiotapas, borrego sacrificiotapas, cabra sacrificiotapas haywawankichis chayqa, 12tupaqnin ofrendantintakaman haywankichis hayk'aña animalkuna kaqtinpas. 13Llapan Israel runakunan sonqoyman chayaq mikhuna ofrendata haywashawaspankuqa chay kamachikuyta hunt'anqaku. 14Wak llaqtayoq runakuna, qankuna ukhupi tiyaqpas mana chayqa purikuqllapas, sonqoyman chayaq sumaq q'apayniyoq mikhuna ofrendata ñoqaman haywayta munanqa chayqa, qankunapaq kamachikuy kikin kamachikuyllatataqmi hunt'anqaku. 15Chay kikin ruwaymi qankunapaqpas wak llaqtayoqpaqpas kanqa, ch'ulla kamachikuyllan wiñaypaq kanqa, qankunapaqpas mirayniykichispaqpas. 16Chay kikin kamachikuymi unanchaymi qankunapaqpas wak llaqtayoqpaqpas kanqa, nispa. 17Señor Diosmi Moisesta nirqan: 18–Israel runakunata niy, Señor Diosmi nin: Ñoqa pusaykusqaykichis chay suyuman haykuspa, 19chay hallp'aq rurusqanta mikhuspaykichisqa, ofrenda haywawanaykichispaqmi wakinta t'aqankichis. 20Imaynatachus haywawankichis ñawpaqkaq saruy trigota t'aqaspa chhaynallatataqmi ñawpaqkaq chapusqaykichis masamanta huk tortata ruwaspa haywawankichis. 21Ñawpaqkaq chapusqaykichis masa ofrendataqa qollawankichispunin qankunapas mirayniykichispas. 22Mayqenniykichispas mana yuyaypichu Moiseswan kamachisqay mayqen simiytapas p'akinkichis, 23otaq mirayniykichispas hamuq tiempopi mana yuyaypichu p'akinman, 24llapa llaqtapas mana reparakuspa huchallikuwaqchis chayqa, llapa llaqta huk torillota sonqoyman chayaq sumaq q'apayniyoq ruphachina sacrificiota haywawankichis, chay sacrificiotawan kuskataq ruru ofrendatapas, hich'aykunapaq vino ofrendatapas haywawankichis, hinallataq huk orqo cabratapas hucha pampachay sacrificiota hina. 25Hinan sacerdoteqa chay orqo cabrata haywawanqa llapa Israel runakunaq huchan pampachasqa kananpaq, ñoqataq huchaykichista pampachasqaykichis, mana yuyaypichu huchallikusqaykichisrayku, mikhuna ofrendatapas hucha pampachay sacrificiotapas haywawasqaykichisraykupiwan. 26Llapaykichismi qankunapas qankunawan tiyaq wak llaqtayoqkunapas pampachasqa kankichis, llapa llaqta mana yuyaypichu huchallikusqaykichisrayku. 27Manataq yuyaypichu huk runa huchallikun chayqa, paymi watayoq cabrata hucha pampachay sacrificiopaq apamunqa. 28Chaytan sacerdoteqa ñoqaman sacrificiota haywawanqa chay runaq mana yuyaypichu huchallikusqan pampachasqa kananpaq, hinan ñoqa chay huchata pampachasaq. 29Mana yuyaypichu huchallikuqpaqqa chay kikin kamachikuyllan kanqa, qankunapaqpas qankunawan tiyaq wak llaqtayoqkunapaqpas. 30Ichaqa huk runa yuyaypi huchallikunqa, Israel runapas wak llaqtayoqpas chayqa, ñoqatan sarunchawan. Chayrayku, chay runaqa ayllun ukhupi wañuchisqa kanqa. 31Ñoqa Señor Diospa simiytan pisichan manataq kamachisqayta hunt'anchu, chaymi hukpaqkama ch'usaqyachisqa kanqa, pay kikinmi wañuchinapaq huchallikurqan, nispa. 32Israel runakuna ch'inneqpi kashaqtinmi samana p'unchaypi huk qharita llant'a pallashaqta tarirqanku. 33Hinaspan chay qharita Moisesman Aaronman llapa runakunamanwan aparqanku. 34Chaymi paykunaqa huk karpaman wisq'arqanku, manaraqmi unanchasqachu karqan imaynatachus chay runata ruwanankupaq. 35Hinan Señor Diosqa Moisesta nirqan: –Chay runaqa wañuchinapaq huchachasqan kanqa, llapan Israel runakuna karpa-karpamanta sapaqman horqospa rumiwan ch'aqechunku, nispa. 36Chaymi Israel runakunaqa karpa-karpamanta sapaqman horqospanku, wañunankama ch'aqerqanku, Señor Diospa Moisesta kamachisqanman hina. 37Señor Diosmi Moisesta nirqan: 38–Israel runakunata niy, Señor Diosmi nin: Qankunapas mirayniykichispas p'achaykichispa ch'ullpanpi chhaqchakunata ruwakunkichis. Chay chhaqchapiqa huk sani-puka q'aytun kanqa. 39Chay chhaqchakunata rikuspan qankunaqa tukuy kamachikuyniyta yuyarinkichis, ahinapin hunt'ankichis, amataq kikiykichispa yuyayniykichiswan munayniykichiswanpas waqllinaykichispaq aysachikunkichischu. 40Llapan kamachikuyniykunatan makilla hunt'ankichis, chhaynapin ñoqa Diosniykichispaq t'aqasqa kankichis. 41Ñoqan Señor Diosniykichis kani, Diosniykichis kanaypaqmi Egipto suyumanta horqomurqaykichis. Ñoqaqa Diosniykichis Señor Diosmi kani, nispa.

will be added

X\