1 Hinan Israel runakunaqa qapariyta qallarirqanku, chay tutantinmi waqaspa illarirqanku. 2 Llapallanmi paykunaqa Moisés contra Aarón contrapiwan rimapakuspanku nirqanku: –¡Allinmi kanman karqan Egipto suyupi wañukapuyninchisqa, mana chaytaq kay ch'inneqpi wañukapuyninchispas! 3 ¿Imapaqmi Señor Diosqa kay suyuman pusamuwanchis, maqanakuypi wañunanchispaqchu? ¿Warminchiskunata wawanchiskunata awqanchiskuna hap'ikapunanpaqchu? ¡Aswan allinmi kanman Egipto suyuman kutipusunman chayqa! nispanku. 4 Hukkuna hukkunawantaq ninakurqanku: –Huk umallita churakusun, hinaspa Egiptoman kutipusun, nispa. 5 Hinan Moisesqa Aaronpiwan llapan Israel runakunaq ñawpaqenpi uyampamanta pampaman wikch'ukurqanku. 6 Suyu qhamiyaq riq Nunpa churin Josuetaq, Jefoneq churin Calebpiwan llakikuymanta p'achankuta llik'ikurqanku, 7 hinaspa llapan Israel runakunata nirqanku: –¡Qhamiyaq risqayku hallp'aqa ancha allinpunin! 8 Señor Dioschus sumaqta qhawariwasun chayqa, yanapawasunmi chay hallp'aman haykunanchispaq, payqa qowasunpunin. Chay suyuqa lecheq miel misk'iq askha kanan hallp'an kasqa. 9 Chhaynaqa, ama Señor Dios contra k'ulluchakuychischu, amataq chay suyupi tiyaq runakunatapas manchakuychischu, paykunata atipayqa t'anta mikhuy hinallan kanqa. Paykuna waqaychaqqa manan pipas kanchu, yanapaqninchismi ichaqa Señor Diosninchis. ¡Ama paykunata manchakuychischu! nispa. 10 Chaywanpas runakunaqa ch'aqeytapunin paykunata munarqanku. Chaymi Señor Diospa lliphlli-kaynin Dioswan Tupana Karpapi rikhurirqan llapa Israel runakuna rikushaqtin, 11 hinan Señor Diosqa Moisesta nirqan: –¿Hayk'aqkamataq kay runakunari pisichashallawanqa? Paykuna ukhupi askha milagrokunata ruwashaqtiypas, ¿manapunichu hap'ipakuwanqaku? 12 Huk millay wañuy onqoytan kachamusaq wañunankupaq, ahinapin paykunata ch'usaqyachisaq, qanmantataq ichaqa hatarichisaq huk hatun llaqtata, paykunamanta aswan atiyniyoqta, nispa. 13 Moisestaq ichaqa kutichirqan: –Señor Diosnilláy, qanqa atiyniykiwanmi kay llaqtata Egipto suyumanta horqomurqanki. Egipto runakunaqa ruwasqaykita yachaspankun 14 Canaán suyupi tiyaq runakunaman willanqaku. Señor Diosnilláy, kay llaqta chawpipi kashasqaykitaqa Canaán runakunapas uyarinkun, sut'ita rikuchikusqaykitapas, ñoqayku patapi phuyuyki kashasqantapas, p'unchaypi ñawpaqeykuta sayaq phuyupi rishasqaykitapas, tutataq sayaq ninapi rishasqaykitapas yachankun. 15 Hukpaqkama kay llaqtata wañuchiqtiykiqa, mentasqa kasqaykita yachaq suyukunachá ninqaku: 16 –Señor Diosqa Israel runakunatan qonanpaq prometesqan hallp'aman mana pusaykuyta atirqanchu, chaymi ch'inneqpi wañuchirqan, nispa. 17 Chayrayku, Señor Diosnilláy, valekuyki hatun atiyniykita kunan rikuchinaykipaq, qanmi niwarqankiku: 18 –Ñoqa Señor Diosqa manan usqhaylla phiñakuqchu kani, tukuy tiempo munakuqmi kani, huchallikusqatapas mana kasukusqatapas pampachanin, chaywanpas huchayoqtaqa manapunin hinallatachu qhawani, aswanmi tayta-mamakunaq huchallikusqanmanta muchuchini wawankunata, nietonkunata, nietonpa wawankunata ima, nispayki. 19 Chhaynaqa, tukuy tiempo munakuq kasqaykiman hina kay llaqtaq huchanta pampachaykuy, kay llaqtataqa Egiptomantapachan kaykamaña muchushanki, nispa. 20 Hinan Señor Diosqa kutichirqan: –Allinmi, mañakuwasqaykiman hinan huchankuta pampachani. 21 Ñoqaqa cheqaqtapunin kawsani, cheqaqtapunin lliphlli-kayniypas kay pachaman hunt'aykun, 22 chay hinallataqmi cheqaqtapuni niyki: Qhapaq-atiyniyta rikuqkunapas, Egiptopipas ch'inneqpipas milagro ruwasqaykunata rikuqkunapas, askha kutitaña ch'inneqpi wateqawaqkunapas, kamachikuyniyta mana kasukuqkunapas 23 manan rikunqakuchu ñawpa taytankuman prometesqay hallp'ataqa. Ñoqa pisichawaqniykunaqa manapunin mayqenpas chay hallp'ataqa rikunqachu. 24 Caleb kamachiytan ichaqa qhamiyaq risqan suyuman pusaykusaq, hinaspa paypa miraynin chay suyuta hap'ikapunqa, paypa yuyayninqa manan wakinkunaq hinachu karqan, payqa tukuy sonqon kasuwarqanpas. 25 Chay suyu wayq'okunapiqa Amalec runakunan Canaán runakunapiwan tiyanku, chayrayku qankunaqa paqarin kutiripuychis, ch'inneqman riq ñanninta ripuychis Puka Qocha ladoman, nispa. 26 Chaymantataq Señor Diosqa Moisesta Aarontawan nirqan: 27 –¿Hayk'aqkamataq kay Israel millay runakunaq chhuchupakusqanta muchusaq? Ñoqa contra rimasqankutan uyariniña. 28 Chayrayku, paykunata nimuychis, Señor Diosmi nin: Ñoqaraykun jurani, imaynan rimarqankichis ahinatan qankunata ruwasqaykichis. 29 Iskay chunka watayoqmanta wichayman yupasqa runakunan kaypi wañunkichis ñoqa contra rimasqaykichis hawa, ayaykichispas kay ch'inneqpi wikch'usqan kanqa. 30 Manan mayqenniykichispas haykunkichischu hap'ikapunaykichispaq cheqaqtapuni prometesqay hallp'amanqa, Jefoneq churin Calebwan Nunpa churin Josuellapiwanmi haykunqaku. 31 Aswanpas “awqanchispa makinmanchá urmanqa” nisqaykichis wawaykichistan pusaykusaq pisichasqaykichis suyuman, paykunan chay suyuta hap'ikapunqaku, 32 qankunataq ch'inneqpi wañunkichis. 33 Ichaqa mana hunt'aq k'ullu kasqaykichisraykun wawaykichis muchuspa michipakuq hina purinqaku tawa chunka wata, llapaykichis kay ch'inneqpi wañunaykichiskama. 34 Qhamiyaqkunaqa tawa chunka p'unchaymi Canaán suyuta qhamiyarqanku, ahinallataqmi huchaykichismanta tawa chunka watata muchunkichis, sapa p'unchaymanta huk watata. Ahinapin qankuna contra kashaspay ruwasqayta yachankichis, nispa. 35 Ñoqa Señor Diosmi chayta sut'inchani. Ahinatan ruwasaq ñoqa contra huñukuq kay millay runakunataqa, kay ch'inneqpin wañuyninku taripanqa, nispa. 36 Suyu qhamiyaqta Moisespa kachasqan qharikunan kutipuspanku, suyumanta mana allinta willaspa runakunata chhuchupachirqanku, 37 chaymi Señor Diosqa millay onqoywan wañuchirqan chay runakunata. 38 Llapan chaykunamantaqa Nunpa churin Josuepiwan Jefoneq churin Calebllapiwanmi kawsarqanku. 39 Señor Diospa nisqan simikunatan Moisesqa Israel runakunaman willarqan, hinan paykunaqa llapanku sinchita llakikurqanku. 40 Qhepantin paqartaq tutallamanta hatarispanku aswan alto orqo-orqoman wicharqanku, paykunaqa ninakurqankun: –Huchallikurqanchismi, chaywanpas haku puririsun Señor Diospa prometewasqanchis cheqasman, nispa. 41 Moisestaq ichaqa nirqan: –¿Imanaqtintaq Señor Diospa kamachisqanta mana kasukunkichischu? ¡Manan atipankichischu! 42 Ama riychischu, awqaykichismi atipamusunkichis. Señor Diosqa manan qankunawanñachu, aswanpas t'aqarikapunñan. 43 Amalec runakunan Canaán runakunapiwan chaypi kashanku, qankunataq maqanakuypi wañunkichis. Qankunaqa Señor Diostan saqerparirqankichis, chaymi Señor Diosqa mana qankunawanñachu, nispa. 44 Paykunataq ichaqa mana chaytapas kasukuspa aswan alto orqo-orqoman wicharqanku, ichaqa Señor Diospa rimanakuynin arcapas Moisespas manan karpa-karpamanta kuyurirqanchu. 45 Hinan orqo-orqopi tiyaq Amalec runakunaqa Canaán runakunapiwan paykuna contra uraykamurqanku, hinaspan Israel runakunata sinchita atipaspanku Hormakama qatirqanku.
