Números 13

1Señor Diosmi Moisesta nirqan: 2–Sapanka ayllumanta huk kamachikuqta akllay, hinaspa paykunata kachay Canaán suyuta qhamiyamunankupaq, chay suyutan Israel runakunaman qosaq, nispa. 3Hinan Moisesqa Señor Diospa kamachisqanman hina Parán ch'inneqmanta qhamiyaqkunata kacharqan. Llapan chay qharikunaqa Israel ayllukunapi kamachikuqkunan karqanku. 4Sutinkutaq kaykuna karqan: 5Rubén ayllumanta Zacurpa churin Samúa, 6Judá ayllumanta Jefoneq churin Caleb, 7Isacar ayllumanta Josepa churin Igal, 8Efraín ayllumanta Nunpa churin Oseas, 9Benjamín ayllumanta Rafuq churin Palti, 10Zabulón ayllumanta Zodiq churin Gadiel, 11Josepa miraynin Manasés ayllumanta Susiq churin Gadi, 12Dan ayllumanta Gemaliq churin Amiel, 13Aser ayllumanta Micaelpa churin Setur, 14Neftalí ayllumanta Vapsiq churin Nahbi, 15Gad ayllumanta Maquiq churin Geuel. 16Chaykunan karqan Canaán suyuta Moisespa qhamiyaqta kachasqan qharikuna. Nunpa churin Oseastaqa Moisesmi Josué sutiwan churarqan. 17Moisesmi paykunata Canaán suyu qhamiyaqta kachashaspa nirqan: –Neguev ch'inneqninta riychis, hinaspa orqo-orqonta puriychis. 18Imaynachus suyu kasqantaqa allintan qhawamunkichis, hinallataq chaypi tiyaq runakunapas atiyniyoqchus icha pisi kallpachus, askhachus icha pisillachus kanku chaykunatawan qhawamunkichis. 19Llaqtankunatapas allintan qhawamunkichis, karpa-karpapichus tiyanku icha muyuriq perqayoq llaqtapichus tiyanku chaykunata. Tiyasqanku hallp'apas allinchus icha manachus, 20tarpuna hallp'achus icha manachus, sach'akunapas kanchus icha manachus chaykunatawan qhawamunkichis. Kallpachakuychis, ama qonqaychischu chay suyupi wakin rurukunata apamuyta, nispa. Risqanku tiempoqa ñawpaqkaq uvas cosecha hoqariy tiempon karqan. 21Hinan paykunaqa rispanku Canaán suyuta qhamiyarqanku, uray ladopi Zin ch'inneqmanta wichay ladopi Hamat Q'asawan kuska kashaq Rehob llaqtakama. 22Neguevninta rispankun Hebronkama chayarqanku. Chaypin tiyasqaku Anacpa miraynin Ahimán, Sesai, Talmaipiwan. (Hebrón llaqtaqa Egipto suyupi Zoán llaqtamanta qanchis wata ñawpaqtaraqmi sayarichisqa kasqa). 23Escol wayq'oman chayaspankun, huk k'allmata wit'urqanku uvas ruru ch'ampantinta, k'aspiman warkuykuspataq iskaymanta wantupi apamurqanku. Apamullarqankutaq granadakunatapas higostapas. 24Chay wayq'otan suticharqanku Escol nispa, Israel runakuna chaypi uvas ch'ampa k'allmata wit'usqankurayku. 25Chaymantataq suyuta tawa chunka p'unchay qhamiyaspaña kutimpurqanku 26Parán ch'inneqpi Cadesman, chaypin kasharqanku Moisespas Aaronpas llapan Israel runakunapas. Hinan qhamiyaq kachasqakunaqa tukuy rikusqankuta paykunaman willarqanku, chay suyumanta apasqanku rurutapas rikuchirqanku. 27Hinaspan Moisesta nirqanku: –Kachawasqaykiku suyutaqa rirqaykun, cheqaqtapunin lecheq miel misk'iq askha kanan hallp'a kasqa, kaymi chay hallp'aq rurun. 28Chaypi tiyaq runakunan ichaqa atiyniyoq kasqaku, llaqtankupas sinchi hatuntaq allin perqasqataq kasqa. Hinallataq rikumurqayku Anacpa miraynin hatuchachaq runakunata. 29Neguev hap'iypin Amalec runakuna tiyasqaku, orqo-orqopitaq Het runakuna, Jebus runakuna, Amor runakunapiwan tiyasqaku, lamar-qocha patapitaq Jordán mayu qayllapiwan Canaán runakuna tiyasqaku, nispanku. 30Hinan Calebqa Moisespa ñawpaqenpi kashaq runakunata ch'inyachispa nirqan: –¡Haku puririsun, hap'isunmi chay suyuta, ñoqanchisqa paykunata atipasunpunin! nispa. 31Riqmasin qharikunataq ichaqa kutichirqanku: –¡Manan chay runakunataqa phawaykuyta atisunmanchu! ¡Paykunaqa aswan atiyniyoqmi ñoqanchismantaqa! nispa. 32Hinallataq Israel runakunaman qhamiyaq risqanku suyumanta mana allinta willaspa nirqanku: –Qhamiyaq risqayku hallp'aqa yarqaymanta wañuna hallp'an kasqa, chaypi tiyaq llapan qharikunapas sinchi hatunmi kasqaku. 33Rikumullarqaykutaqmi Anacpa miraynin hatuchachaq runakunatapas. Paykunaq qayllanpi kaspaykuqa t'isku-t'isku hina huch'uylla kasqaykutan reparakurqayku, paykunapas ahinatan qhawariwarqanku, nispanku.

will be added

X\