Números 12

1Mariapiwan Aaronpiwanmi Moisés contra rimarqanku Etiopía suyu warmiwan casarakusqan hawa. 2Nillarqankutaq: –¿Señor Diosqa Moisesllatachu rimaykun? ¿Manachu ñoqanchistapas rimaykullawanchistaq? nispa. Señor Diostaq chayta uyarirqan. 3Moisesqa aswan llamp'u sonqon karqan, kay pachantin qharikunamantapas. 4Qonqayllan Señor Diosqa Moisesta, Aaronta, Mariatawan nirqan: –Qankuna kinsantiykichis Ñoqawan Tupana Karpaman hamuychis, nispa. Hinan kinsantinku karpaman rirqanku. 5Chaymantataq Señor Diosqa sayaq ati-phuyupi uraykamurqan, hinaspa karpa punkupi sayaykuspa Aaronta Mariatawan waqyarqan. Paykuna qayllaykuqtinkutaq 6Señor Diosqa nirqan: –¡Uyariwaychis! Qankuna ukhupi ñoqaq profetay kaqtinqa, ñoqan payman rikhuriypi rikuchikuni, mosqoypitaq rimaykunipas. 7Moisés kamachiywanmi ichaqa mana chhaynatachu ruwani, payqa confiakunay kamachiymi, llaqtay pusaqmi. 8Paywanqa uya-uya pura hinan rimani, ancha sut'itan rimani, manan pakapi hinachu. Rikch'ayniyta Moisés rikushaqtinqa, ¿imaynataq qankunaqa pay contra rimayta mana manchakunkichischu? nispa. 9Señor Diosmi sinchita paykunapaq phiñakurqan, hinaspa ripurqan. 10Karpamanta altoman phuyu suchuriqtintaq, Mariaqa lepra onqoyniyoq karqapurqan, llapan aychanpas rit'i hina. Mariata Aarón qhawariqtintaq, lepra onqoyniyoq kapushasqa. 11Chaymi Aaronqa Moisesta nirqan: –Wiraqocháy, valekuykin, amapuni muchuchiwaykuchu chay huchaykumanta, mana yuyayniyoq hinan rimarqayku. 12Amayá Mariaqa mamanpa wiksanpi wañuspa asnarishaq naceq wawa hinaqa kachunchu, nispa. 13Hinan Moisesqa Señormanta mañakurqan: –Diosníy, valekuykin Mariata kunan qhaliyachinaykipaq, nispa. 14Señor Diostaq kutichirqan: –Paypa taytan uyanpi thuqaykunman chayqa, qanchis p'unchaymi p'enqasqa pakakunman. Chhaynaqa, karpa-karpamanta hawaman qanchis p'unchayta wikch'uychis, chaymantataq karpa-karpaman kutimpunqa, nispa. 15Chaymi Mariaqa karpa-karpamanta hawaman qanchis p'unchayta wikch'usqa karqan. Chaykamataq Israel runakunaqa mana maymanpas puririrqankuchu, karpa-karpaman María kutimunankama. 16Chaymantataq Hazerotmanta puririrqanku, hinaspa Parán ch'inneqpi karpakurqanku.

will be added

X\