Números 10

1Señor Diosmi Moisesta nirqan: 2–Qolqe takasqamanta iskay trompetata ruwakuy, chay trompetakunan kanqa runakunaq huñunakunanta willanaykipaq, astakunankuta willanaykipaqwan. 3Iskaynin trompetata tocaqtiykichismi llapa Israel runakuna ñawpaqeypi huñukunqaku Ñoqawan Tupana Karpa haykunapi. 4Huk kutillata trompetata tocaqtiykichismi ayllu umallikuna ñawpaqeykipi huñukunqaku. 5Trompetakunata p'iti-p'itispa tocaqtiykichisqa inti lloqsimuy lado karpakunapi tiyaq ayllukunan puririnqaku, 6wakmanta p'iti-p'itispa tocaqtiykichistaq uray lado karpakunapi tiyaq ayllukuna puririnqaku. Trompetakunata p'iti-p'itispa tocasqaqa puririnaykichispaq señalmi kanqa. 7Mana p'iti-p'itispa trompetakunata tocayqa runakunaq huñukunanpaq señalmi kanqa. 8Chay trompeta tocaqkunaqa Aaronpa miraynin sacerdotekunan kanqaku. Chaymi qankunapaq wiñay kamachikuy kanqa. 9Hallp'aykichispi qankunata awqaykichis sarunchaqtin paykunawan awqa-tinkuq rinkichis chayqa, trompetakunata p'iti-p'itispa tocankichis. Hinan ñoqa Señor Diosniykichisqa qankunata yuyarisqaykichis, hinaspa awqaykichismanta qespichisqaykichis. 10Chay trompetakunataqa tocallankichistaqmi kusikusqaykichis p'unchaykunapi, unanchasqa p'unchaykunapi, Mosoq Killa Fiestakunapi, ruphachina sacrificiota haywaspa, sumaq kawsay sacrificiota haywaspa ima. Ahinapin qankunata ñoqa yuyarisqaykichis. Ñoqaqa Diosniykichis Señor Diosmi kani, nispa. 11Egiptomanta lloqsimusqanku qhepata iskaykaq wataq iskay killanpa iskay chunka p'unchayninpin Dioswan Tupana Karpa patamanta phuyu hatarirqan. 12Chaymi Israel runakunaqa Sinaí ch'inneqmanta puririrqanku. Hinan phuyuqa Parán ch'inneqpi sayarqan. 13Señor Diospa Moiseswan kamachisqanman hinan puririrqanku: 14Ñawpaqta rirqan Judá ayllu t'aqa banderantin, umallinkutaq karqan Aminadabpa churin Naasón. 15Isacar ayllutan umallirqan Zuarpa churin Natanael. 16Zabulón ayllutan umallirqan Helonpa churin Eliab. 17Chaymantataq Gersonpa mirayninpiwan Merariq mirayninpiwan Dioswan Tupana Karpata paskarqanku, paykunan karpata astanankupaq churasqa karqanku, chaymi paykunaqa aparikuspa puririrqanku. 18Chaymantataq Rubén ayllu t'aqa banderantin puririrqan, umallinkutaq Sedeurpa churin Elisur karqan. 19Simeón ayllutan umallirqan Zurisadaipa churin Selumiel. 20Gad ayllutan umallirqan Reuelpa churin Eliasaf. 21Chaymantataq Cohatpa miraynin rirqan, ch'uya kaqkunata aparikuspa. Paykunaq chayananpaqqa Dioswan Tupana Karpata apaqkunaqa sayarichirqankuñan. 22Chaymantataq Efraín ayllu t'aqa banderantin puririrqan, umallinkutaq Amiudpa churin Elisama karqan. 23Manasés ayllutan umallirqan Pedasurpa churin Gamaliel. 24Benjamín ayllutan umallirqan Gedeoniq churin Abidán. 25Wakin ayllukunaq qhepallantañan rirqan Dan ayllu t'aqa banderantin, umallinkutaq Amisadaipa churin Ahiezer karqan. 26Aser ayllutan umallirqan Ocranpa churin Pagiel. 27Neftalí ayllutan umallirqan Enanpa churin Ahira. 28Chay hinatan Israel ayllukunaqa astakushaspanku t'aqa-t'aqa puririrqanku. 29Huk p'unchaymi Moisesqa Madián runa Reuelpa churin Hobab cuñadonta nirqan: –Qowanankupaq Señor Diospa prometewasqanku suyumanmi ñoqayku ripushayku. Haku ñoqaykuwan, allintan rikusqaykiku, Señor Diosqa Israelta sumaqta rikunanpaqmi prometekurqan, nispa. 30Hinan Hobabqa kutichirqan: –Manan riymanchu, ñoqaqa hallp'aymanmi kutipusaq, aylluykunaq kasqan cheqasman, nispa. 31Moisestaq anchata valepakuspa nirqan: –Amayá ripuychu, qanqa allintan reqsinki ch'inneqpi karpakuna cheqaskunata, chhaynaqa, kusatan pusawankikuman. 32Ñoqaykuwan riqtiykiqa Señor Diospa tukuy qowasqanku kaqkunatan qosqaykiku, nispa. 33Chaymantataq Israel runakunaqa Señor Diospa orqonmanta ripurqanku, hinaspa kinsa p'unchay purirqanku. Señor Diospa rimanakuynin arcatataq paykunaq ñawpaqenta aparqanku, samaykunankupaq huk cheqasta maskhaspanku. 34Sapa p'unchay puririqtinkun Señor Diospa phuyunqa paykunaq altonta rirqan. 35Rimanakuy arcata hoqarishaqtinkun Moisesqa khaynata nirqan: –¡Sayariy, Señor Diosníy! ¡Awqaykikunata ch'eqechiy! ¡Cheqnikuqniykikunatapas qatiriy! nispa. 36Rimanakuy arcata churaykuqtinkutaq Moisesqa nirqan: –¡Kunanqa kutirimuy, Señor Diosníy, waranqa-waranqa Israel llaqtaykiman! nispa.

will be added

X\