Nehemías 6

1Awqayku Sanbalat, Tobías, Arabia runa Gesem, hukkunapiwan Jerusalén perqa sayarichisqayta llapan q'asankunatapas wisq'asqaytaqa yacharqankun. Manaraq punkukunata churashaqtiymi, 2Sanbalatqa Gesempiwan kachamuwarqanku kay hina willaqta: Hamuy Ono pampa nisqapi hukkaq llaqtachapi huñukusun, nispa. Paykunaqa mana allin ruwawanankupaqmi waqyachiwarqanku. 3Chaymi paykunaman willaqkunata kacharqani: Ancha hatun llank'aypin kashani, manan tiempoy kanchu qankunawan huñukunaypaq. Llank'anaymi saqeykuqtiyqa qollunman, nispa. 4Chay hinatan tawa kutita kachamuwarqanku, ichaqa kaqllatapunin kutichirqani. 5Hinan Sanbalatqa phisqa kutitaña kamachinta kachamuwarqan mana wisq'asqa cartatawan apachimuwaspa. 6Chay cartan kay hina qelqasqa kasqa: Qorpanchis suyu runakunan rimashanku, qansi judío runakunapiwan rey contra sayarinaykichispaq wakichikushankichis, chaypaqsi llaqta perqatapas sayarichishankichis. Ahinatan Gesempas willawan. Hinallataqsi reyninku kanaykipaq yuyaykushanki, 7chaypaqsi profetakunatapas churarqanki qanmanta Jerusalenpi willanankupaq: Judá suyupiqa kanmi rey, nispa. Chhaynaqa, paqtan chay rimaykunata rey Artajerjes uyarinman. Chayrayku, hamuy iskayninchis rimanakunanchispaq, nispa. 8Hinan kutichirqani: –Rimasqaykiqa manan cheqaqchu, qanmi chaytaqa sonqoykimanta horqospa rimashanki, nispa. 9Paykunaqa llapankun yuyaykurqanku: Mancharichispa pisi kallpayachisunchis llank'asqankuta ama tukunankupaq, nispanku. Chaymi mañakurqani: Diosnilláy, kallpachaway llank'anaypaq, nispa. 10Chaymantataq Mehetabelpa churin Delaiaq churin Semaiaspa wasinta rirqani, paymi wasinpi wisq'aykukuspa kashasqa. Niwarqantaq: Diospa wasinpi huñukusun, ch'uya cheqasman haykuspa punkuta allinta wisq'akamusun, kunan tutan wañuchiq hamusunkiku, nispa. 11Hinan kutichirqani: –¿Ñoqa hina qhariqa pakakunanpaq ayqekunmanchu? ¿Diospa wasinmanpas haykunmanchu kawsayninta qespichinanpaq? ¡Manan, manan haykuymanchu! nispa. 12Repararqanin profeta Semaiasqa Diospa mana kamachisqanchu rimashasqanta, aswanpas Tobiaspa Sanbalatpa lluk'iykusqan kaspa rimashasqanta. 13Paykunaqa lluk'iykurqanku ñoqata manchachiwaspa huchallichiwanankupaqmi. Chay hinapiqa ñoqa contran rimankuman karqan, pisichawaspankutaq asikunkuman karqan. 14Chaymi mañakurqani: Diosnilláy, ruwasqankumanta Tobiasta Sanbalat-tawan wanachiy, hinallataq profetisa Noadiastapas, ñoqata manchachiyta munaq huk profetakunatapas, nispa. 15Elul killaq iskay chunka phisqayoq p'unchayninpin muyuriq perqa sayarichisqa tukukurqan, phisqa chunka iskayniyoq p'unchaypi. 16Hinan qorpayku suyu runakunapas awqaykupas chayta yacharqanku, chay llank'aypi Diospa yanapawasqankuta reparaspataq qharichakushaspa hina k'umuykakapurqanku. 17Chay tiempopin Judapi allichachaq runakuna Tobiasman askha cartata qelqarqanku, paykunapas Tobiaspa cartantaqa sapa kutillan chaskirqanku. 18Askha Judá runakunan Tobiasta yanapanankupaq rimanakurqanku, Araq churin Secaniaspa qataynin kasqanrayku, Tobiaspa churin Johananpas Berequiaspa churin Mesulampa ususinwan casarakusqanrayku. 19Chaymi qayllaypi Tobiaspa allin ruwasqankunata rimarqanku, ñoqaq rimasqaytapas Tobiasman kaqrato willallarqankutaq. Chay Tobiasmi manchachiwananpaq cartata apachimuwaq.

will be added

X\