1 Chaymantataq wakin qharikuna warminkupiwan wawqenku judío runakuna contra sinchita quejakurqanku. 2 Wakinmi nirqanku: –Ñoqaykuqa askha wawakunayoqmi kayku, chayrayku trigota necesitayku mikhunaykupaq, mana chayqa yarqaymantan wañupusaqku, nispa. 3 Wakintaq nirqanku: –Ñoqaykuqa hallp'aykuta uvas chakraykuta, wasiykutawanmi prendakuyku manaña yarqayta muchuyta atispayku trigota rantikunaykupaq, nispa. 4 Hukkunataq nirqanku: –Qolqetan manukuyku hallp'aykumanta uvas chakraykumanta reyman impuestota paganaykupaq. 5 Ñoqaykupas llaqtamasiykupas ch'ulla mirayllan kayku, wawaykupas kaqkamallan, manan huk-hinachu paykunaq wawankumantaqa. Chaywanpas ñoqaykuqa kamachipaqñan wawaykuta qonayku kashan, kayqa wakin ususiykupas ñan kamachiña. Paykunataqa manan horqokapuyta atiykumanñachu, hallp'aykupas uvas chakraykupas hukkunaq makinpi kasqanrayku, nispa. 6 Tukuy chay quejakuna rimasqankuta uyarispaymi sinchita phiñakurqani. 7 Allinta yuyaykuspaytaq allichachaq runakunata umalli runakunatapas anyarqani: –¿Imanaqtinmi llaqta-masiykichiskunaman manuspa interesninta sik'ishankichis? nispa. Chay hawan huk hatun huñukuyman waqyarqani. 8 Hinaspan paykunata nirqani: –Ñoqaykun atisqaykuman hina judío wawqenchiskunata horqomurqayku wak suyupi kamachi kasqankumanta. Qankunataq ichaqa wawqeykichista wak suyu runakunaman vendenkichis, ñoqaykutaq paykunata wakmanta rantimuqkuna kayku, nispa. Hinan paykunaqa mana ima nispapas kutichiwarqankuchu, aswanpas ch'inllan karqanku. 9 Nillarqanitaq: –Ruwasqaykichisqa manan allinchu. Qankunaqa Diosta manchakuspan kawsanaykichis, mana judío runa awqanchiskunaq ama asikunankupaq. 10 Ñoqapas, wawqeykunapas, runaykunapas trigota, qolqetawanmi manurqayku, ichaqa llapan chay manusqaykutan pampachapusaqku. 11 Chaymi valekuykichis, kunanpacha kutichipuychis hallp'ankuta, uvas chakrankuta, olivos chakrankuta, wasinkutapas, hinallataq qolqeta, trigota, aceiteta, vinotawan manusqaykichistapas pampachapuychis, nispa. 12 Hinan kutichiwarqanku: –Arí, nisqaykita hinan ruwasaqku, kutichipusaqkun manataq imamantapas cobrasaqkuñachu, nispa. Chaymi sacerdotekunata waqyachispa paykunaq ñawpaqenpi rimarisqankuman hina hunt'anankupaq jurachirqani. 13 Hinallataq p'achayta chhaphchispa nirqani: –Llapan kay simita mana hunt'aq runakunata, ahinata Dios chhaphchichun wasinmanta hallp'anmantapas mana imayoq qhepanankama, nispa. Hinan llapan huñuykusqa runakunaqa nirqanku: –¡Amén! nispa. Señor Diostataq yupaycharqanku. Llapan umalli runakunataq rimarisqankuta hunt'arqanku. 14 Rey Artajerjesmi iskay chunkakaq watapi kamachikushaspa, Judá hap'iypi kamachikuqta churawarqan. Hinan kamachirqani reypa kamachikuynin kinsa chunka iskayniyoqkaq watakama. Chay chunka iskayniyoq watapiqa manan hayk'aqpas ñoqapas wawqeykunapas kamachikuqman mikhuna qonataqa mañakurqaykuchu. 15 Ñoqamanta ñawpaqkaq kamachikuqkunan ichaqa runakunata sinchita wakchayachisqa, mikhunankupaq ukyanankupaq cobrakusqaku, tawa chunka qolqetaqa sapaqtan sik'isqaku. Hinallataq kamachinkunapas runakunata muchuchisqaku. Ñoqaqa Diosta manchakuspan mana chay hinatachu ruwarqani, 16 aswanmi perqa sayarichiypi llank'arqani, hinallataq llapan runaykunapas chay llank'aypi yanapakurqanku. Manataq hallp'atapas rantikurqanichu. 17 Chaywanpas wasiypi mikhuq runakunaqa pachak phisqa chunkan karqanku, judío runakuna, oficialkunapiwan, kallarqantaq qaylla suyukunamanta watukamuwaqniykunapas. 18 Sapa p'unchaymi huk torillota, allinnin soqta ovejata, wallpakunata nak'achirqani wayk'unankupaq, sapa chunka p'unchaymantataq askha vinota apachimurqani. Chaywanpas manapunin kamachikuqman llaqtaq mikhuna qonanta mañakurqanichu, runakunapaq sinchi imaymana ruwana kasqanrayku. 19 Mañakurqanitaq: Diosnilláy, yuyarikuy, kay llaqtapaq tukuy allin ruwasqaykunata, allinniypaqtaq kachun, nispa.
