Nehemías 4

1Perqa sayarichisqaykuta yachaspanmi Sanbalatqa sinchita phiñakurqan, sonqonpas rawrarirqanraq, judío runakuna contrataq asikurqan. 2Hinan paywan kashaq kamachikuq-masinkunaman Samaria soldadokunaman rimarqan: ¿Imatataq kay pisi kallpa judío runakunari ruwashanku? ¿Sayarichiyta yuyankuchu? ¿Sacrificiotapas haywanqakuchu? ¿Huk p'unchayllapi tukurqonqakuchu? ¿Chay k'urpa montonmanta ruphasqa rumikunatapas horqonkumanchu? nispa. 3Qayllanpi kashaq Amón suyu runa Tobiastaq nirqan: –Hinalla sayarichishachunku, mayqen atoqllapas seqarqospaqa thunirparinqan, nispa. 4Hinan mañakurqani: ¡Ay! ¡Diosniyku, uyariy khaynata pisichawasqankuta! Paykunaman kutichiy k'amiwasqankuta, wak suyuman kamachi kanankupaq preso apasqa kachunku. 5Llank'asqaykumantan k'amiwanku, chayrayku, ama hinallata qhawaychu kay mana chanin rimasqanta, huchantapas ama pampachaychu, nispa. 6Chaywanpas tukuy sonqon llank'asharqayku, chaymi kuskan perqakama sayarichirqayku. 7Jerusalén perqata usqhaylla sayarichishasqaykuta q'asankunatapas wisq'ashasqaykuta rikuspataq, Sanbalat, Tobías, Arabia runakuna, Amón suyu runakuna, Asdod llaqtayoqkunapiwan sinchita phiñakurqanku. 8Hinaspan llapanku rimanakurqanku huk-nisqalla Jerusalenta phawaykamunankupaq, chaypi kaqkunata musphachiwanankupaq. 9Chaymi Diosniykumanta mañakurqayku, hinaspa tuta-p'unchay awqaykumanta cuidaqkunata churakurqayku. 10Judá runakunataq nirqanku: –K'urpa q'epiq runakunan sayk'urqapunku, askharaqtaq k'urpakunapas kashan, manan muyuriq perqata sayarichiyta atisunmanchu, nispa. 11Awqanchiskunaqa nirqanmi: Paykunaq mana yachasqallan mana rikusqallan haykurqospa wañurqachisunchis, chay llank'ananku qollupunanpaq, nispa. 12Paykuna qayllapi tiyaq judío runakunan ichaqa askha kuti hamuspanku willawarqanku: Muyuriqmantan phawaykusunkichis, nispa. 13Chaymi kamachirqani runakunata aylluntintakama perqa q'asa qhepakunapi espadayoq, lanzayoq, p'eqtayoq makilla qhawanankupaq. 14Manchasqa kasqankuta reparaspaytaq umalli runakunata, allichachaq runakunata, wakin runakunata ima nirqani: –Ama manchakuychischu, yuyariychis Diosninchisqa hatunmi, manchanataq. Chhaynaqa, maqanakuychis warmiykichisrayku, wawaykichisrayku, wawqeykichisrayku, wasiykichisrayku, nispa. 15Awqaykun wakichisqa kashasqaykuta yacharqanku, contraykupi yuyaykusqankutapas Diospa qolluchisqanta repararqanku, chaymi llapayku perqaman kutipurqayku sapanka maychus llank'asqaykuman. 16Chay p'unchaymantaqa kuskan t'aqallan runaykuna ruwanapi llank'arqanku, huk kuskan t'aqataq lanzayoq, escudoyoq, p'eqtayoq, qara unkuyoq ima karqanku. Umalli runakunataq perqa sayarichishaq Judá runakunata tukuypi kallpacharqanku. 17Chaymi perqa sayarichiqkunapas llank'ashallarqankupuni, q'epiqkunapas q'epishallarqankupuni, ichaqa huk makiwanmi llank'arqanku, hukkaq makiwantaq armata hap'irqanku. 18Sapanka perqapi llank'aqkunataq chumpinkupi espadayoqkama llank'arqanku, trompeta tocaqpas qayllaypin kasharqan. 19Hinan umalli runakunata, allichachaq wakin runakunatawan nirqani: –Llank'asqanchisqa sinchi hatunmi, llapan perqa muyuriqpitaq t'aqa-t'aqa sapanka karupikama kashankichis. 20Chhaynaqa, trompeta waqayta uyarispaykichisqa, ñoqaq kasqay cheqasmanmi usqhaylla huñukamunkichis, Diosninchismi ñoqanchisrayku maqanakunqa, nispa. 21Ahinatan llank'arqayku, kuskan t'aqa runakunataq pacha paqariymanta tutayanankama arma hap'intinkama karqanku. 22Chaypachan nirqani: –Sapanka qhari yanapaqnintinkama Jerusalén llaqta ukhupi tuta qhepakuychis, chay hinapi llaqtata tuta makilla qhawasunchis p'unchaytaq llank'asunchis, nispa. 23Chaywanpas ñoqaqa wawqeykunapiwan, runaykunapiwan, qhawaqkunapiwanqa manan puñunaykupaq p'achaykutapas ch'utikurqaykuchu, manallataqmi armaykutapas kacharirqaykuchu, bañakunallaykupaqñan p'achaykutaqa ch'utikurqayku.

will be added

X\