Nehemías 3

1Uma sacerdote Eliasibmi sacerdote-masinkunapiwan Oveja Punku perqata wakmanta sayarichirqanku, chaytan Señor Diospaq t'aqarqanku, hinaspan punkuta churarqanku. Pachak Runaq Torren nisqamanta Hananeel Torre nisqakama perqata sayarichirqanku, hinaspan Señor Diospaq t'aqarqanku. 2Chayman qatiq cheqastataq Jericó qharikuna wakmanta sayarichirqanku. Chayman qatiq cheqastataq Imriq churin Zacur sayarichirqan. 3Senaaq ayllunkunataq Challwa Punkuta sayarichirqanku, punku perqaman kurkukunata churarqanku, hinaspan punkuta churarqanku allin hap'ichisqata p'utiyoqta ima. 4Chayman qatiq cheqastataq Cospa churin Uriaspa churin Meremot allicharqan. Chayman qatiq cheqastataq Mesezabeelpa churin Berequiaspa churin Mesulam allicharqan. Chayman qatiq cheqastataq Baanaq churin Sadoc allicharqan. 5Chayman qatiq cheqastataq Tecoa llaqtayoq qharikuna allicharqanku. Allichachaq runakunataq ichaqa mana llank'ayta munarqankuchu umalli runakunaq llank'anapaq t'aqasqanta. 6Ñawpa Punkutataq Paseahpa churin Joiada, Besodiaspa churin Mesulampiwan allicharqanku, punku perqaman kurkukunata churarqanku. Hinaspan punkuta churarqanku allin hap'ichisqata p'utiyoqta ima. 7Chayman qatiq cheqastataq allicharqanku Gabaón llaqtayoq Melatías, Meronot llaqtayoq Jadón, Gabaón llaqta Mizpa llaqta runakunapiwan. Paykunan Eufrates mayu inti haykuy lado hap'iy kamachikuqpa tiyanan wasikama llank'arqanku. 8Chayman qatiq cheqastataq qolqe takaq Harhaiaq churin Uziel allicharqan, chayman qatiq cheqastataq q'apaq hawina ruwaq Hananías allicharqan, paykunan Jerusalén perqata sayarichirqanku Ancho Perqakama. 9Chayman qatiq cheqastataq Hurpa churin Refaías allicharqan. Paymi karqan Jerusalén kuskan distrito kamachiq. 10Chayman qatiq cheqastataq Harumafpa churin Jedaías wasin chimpata allicharqan. Chayman qatiq cheqastataq Hasabniaspa churin Hatús allicharqan. 11Chayman qatiq cheqastataq Harunpa churin Malquías, Pahat-moabpa churin Hasubpiwan allicharqanku, Hornokunaq Torren nisqatawan. 12Chayman qatiq cheqastataq Halohespa churin Salum ususinkunapiwan allicharqanku. Payqa Jerusalén kuskan distrito kamachiqmi karqan. 13Wayq'o Punkutataq allicharqanku Hanún, Zanoamanta runakunapiwan, sayarichispankutaq punkuta churarqanku allin hap'ichisqata p'utiyoqta ima. Hinallataq paykuna allicharqanku tawa pachak phisqa chunka metro perqata Q'opa Hich'ana Punkukama. 14Chay Q'opa Hich'ana Punkutataq sayarichirqan Recabpa churin Malquías, Bet-haquerem distrito kamachiq, paymi churarqan punkuta allin hap'ichisqata p'utiyoqta ima. 15Colhozeq churin Salummi, Mizpa distrito kamachiq Unu Pukyu Punkuta allicharqan, sayarichispa qatarqan, hinaspan punkuta churarqan allin hap'ichisqata p'utiyoqta ima. Hinallataq reypa huertan qayllapi kashaq Siloé qochana perqatapas allicharqan, Davidpa llaqtanmanta uraykuq pata-patakama. 16Chayman qatiq cheqastataq Bet-sur kuskan distrito kamachiq Azbucpa churin Nehemías allicharqan, Davidpa ayan p'ampana chimpakama, ruwasqa qochana cheqaskama, soldadokunaq wasin cheqaskama ima. 17Chayman qatiq cheqaskunatataq Leví runakuna allicharqan. Baniq churin Rehum qallarirqan. Chayman qatiq cheqastataq Keila distritoq kuskannin kamachiq Hasabías allicharqan distritonpa rantinpi. 18Chayman qatiq cheqastataq allicharqan Henadadpa churin Bavai. Paymi Keila distritoq kuskannin kamachiq karqan. 19Chayman qatiq cheqastataq Mizpa llaqta kamachiq Jesuaq churin Ezer allicharqan, arma waqaychana wasi chimpa perqa muyurinakama. 20Chayman qatiq cheqastataq Zebaipa churin Baruc allicharqan, muyurinamanta uma sacerdote Eliasibpa wasin punkukama. 21Chayman qatiq cheqastataq Cospa churin Uriaspa churin Meremot allicharqan Eliasibpa wasin punkumanta chay kikin wasi tukukuykama. 22Chayman qatiq cheqastataq Jordán mayu pampamanta sacerdotekuna allicharqanku. 23Chayman qatiq cheqastataq Benjaminpiwan Hasubpiwan wasinkuq chimpanta allicharqanku. Chayman qatiq cheqastataq Ananiaspa churin Maasiaspa churin Azarías wasinpa chimpanta allicharqan. 24Chayman qatiq cheqastataq Henadadpa churin Binúi allicharqan Azariaspa wasinmanta perqa muyurinakama. 25Chayman qatiq cheqastataq Uzaipa churin Palal perqa muyurina chimpata allicharqan, hinallataq reypa wasin torretawan, chayqa guardiakunaq pation qayllapin kashan. Chayman qatiq cheqastataq Farospa churin Pedaías allicharqan. 26Ofel nisqa moqo qallariypi tiyaq Diospa wasinpi llank'aqkunataq allicharqanku, Unu Punku inti lloqsimuy lado cheqaskama, hinallataq Diospa wasin rikuna torrekama. 27Chayman qatiq cheqastataq Tecoa llaqtayoq qharikuna Diospa wasin rikuna torre qayllamanta Ofel perqakama allicharqanku. 28Sacerdotekunataq sapanka allicharqanku Caballo Punkumanta wasinkuq chimpantakama. 29Chayman qatiq cheqastataq Imerpa churin Sadoc wasin chimpata allicharqan. Chayman qatiq cheqastataq Inti lloqsimuy Punku qhawaq Secaniaspa churin Semaías allicharqan. 30Chayman qatiq cheqastataq Selemiaspa churin Hananiaspiwan Salafpa soqtakaq churin Hanunpiwan allicharqanku. Chayman qatiq cheqastataq Berequiaspa churin Mesulam wasin chimpata allicharqan. 31Chayman qatiq cheqastataq qolqe takaq Malquías Diospa wasinpi llank'aqkunaq qhatuqkunaq wasinkama allicharqan, chay wasin Huñukuna Punku chimpapi kashan. Hinallataq perqa muyurina patapi wasikama allicharqan. 32Chayman qatiq cheqastataq qolqe takaqkuna qhatuqkunapiwan chay wasimanta Oveja Punkukama allicharqanku.

will be added

X\