Nehemías 2

1Rey Artajerjes iskay chunkakaq watapi kamachikushaqtin, Nisán killapi rey mikhushaqtinmi vinota payman haywarqani. Payqa manan hayk'aqpas ñawpaqenpi llakisqata rikuwarqanchu, 2chaymi tapuykuwarqan: –¿Imanaqtintaq uyaykipas llakisqa p'aki-p'aki kashan? Manamá onqosqachu kashanki, ¿imamantataq sonqoykipi phutikushanki? nispa. Chaymi anchatapuni mancharikuspa 3reyta nirqani: –Reyníy, ¡wiñaypaq kawsay! ¿Imaynan mana llakikuymanchu, tayta-mamaypa ayan p'ampasqa llaqta, thunisqa punkunkunapas ninaq ruphasqan kashaqtin? nispa. 4Hinan reyqa niwarqan: Chhaynaqa, ¿imatataq ruwapusqayki? nispa. Hanaq Pacha Diosmanta mañaykukuspataq 5reyta nirqani: –Allintachus qhawariwanki, chanintaq rikch'akusunkipas chayqa, kachaway Judá suyuta, tayta-mamaypa ayan p'ampasqa llaqtata wakmanta sayarichimunaypaq, nispa. 6Chaymi reinawan kuska tiyashaq reyqa tapuykuwarqan: ¿Hayk'a unaytaq puriwaqri? ¿Hayk'aqtaq kutimpuwaqri? nispa. Kachawananpaq yuyaykukuqtinñataq, hayk'a tiempochus kananta willarqani. 7Nillarqanitaq: –Reyníy, allinchus kanman chayqa, Eufrates mayu inti haykuy lado hap'iypi kamachikuqkunapaq cartakunata qoway, Judaman rina ñanpi ama pipas hark'awanankupaq. 8Hinallataq sach'a-sach'aykita qhawaq Asafpaqpas cartata qoway kurkukunata qowananpaq, Diospa wasin muyuriq perqa punkukunapaq llaqta muyuriq perqapaqwan, tiyanay wasipaqwan ima, nispa. Chaymi reyqa tukuy chaykunata qowarqan, khuyapayakuq Diosniy yanapawasqanrayku. 9Reytaq ejército oficialkunata, caballopi soldadokunatawan ñoqata puriysiwananpaq kamachirqan. Eufrates mayu inti haykuy lado hap'iypi kamachikuqkunaman chayaspataq, reypa cartankunata paykunaman qorqani. 10Ichaqa Beth-horón llaqtayoq Sanbalat, Amón suyu runa oficial Tobiaspiwanmi Israel runakunaq allinninpaq Jerusalenman chayasqayta yachaspanku, sinchita phiñakurqanku. 11Jerusalén llaqtaman chayaspaymi chaypi kinsa p'unchayña kasharqani, 12Hinan tuta puririrqani wakin qharikunapiwan, ichaqa manan mayqen runamanpas willarqanichu, imatachus Jerusalenpi ruwanaypaq Diosniy sonqoyman rimaykuwasqanta. Manan wak silla uywaqa karqanchu, aswanpas sillakusqay asnollan. 13Chay kikin tutan Wayq'o Punkunta lloqsispa Amaru Punkuman rirqani, chaymantataq Q'opa Hich'ana Punkuman. Ahinapin Jerusalén muyuriq perqata, thunisqata punkunkunatapas lliw ruphasqata qhawarirqani. 14Chaymantataq rirqani Unu Pukyu Punkuman, hinallataq Reypa Qochananman, asnoymi ichaqa mana chayninta pasayta atirqanchu. 15Tutallaraqmi karqan, hinan Cedrón wayq'onta wicharqani muyuriq perqata allinta qhawarispa, chaymantataq kutipuspa Wayq'o Punkunta haykupurqani. 16Oficialkunaqa manan yacharqankuchu may risqaytapas ima ruwasqaytapas. Manallataq judío runakunamanpas, sacerdotekunamanpas, allichachaq runakunamanpas, oficialkunamanpas, llank'ay munaq wakin runakunamanpas willarqanichu. 17Chaymantataq paykunata nirqani: –Rikushankichismi mana allinpi kasqanchista, Jerusalenmi lliw thunisqa, punkunkunapas ninaq ruphasqan. Chhaynaqa, wakmantayá Jerusalenpa muyuriq perqanta sayarichisun, amaña astawan pisichasqa kasunchischu, nispa. 18Hinallataq willarqani imaynatachus khuyapayakuq Diosniy yanapawasqanta, kaqllataq reypa nimuwasqantapas. Hinan llapanku nirqanku: –¡Sayarichisunchis, llank'asunchis! nispa. Paykunataq kallpachanakurqanku allin yuyaykusqankuman hina llank'anankupaq. 19Beth-horón llaqtayoq Sanbalat, Amón suyu runa oficial Tobías, Arabia runa Gesempiwan yacharqospankutaq ñoqaykumanta asikurqanku. Pisichawaspankutaq niwarqanku: ¿Imatataq qankunari ruwashankichis? ¿Rey contrachu sayarishankichis? nispa. 20Hinan kutichirqani: –Hanaq Pacha Diosmi tukunaykukama yanapawanqaku, ñoqaykutaq llank'ayta qallarisaqku. Qankunaqqa manan Jerusalenpi hallp'aykichispas kanchu, manallataq rimarinaykichispas kanchu, manan Diospa llaqtanwan hukllachasqapaschu kankichis, nispa.

will be added

X\