Nehemías 1

1Hacaliaspa churin Nehemiasmanta willakuykuna. Rey Artajerjes iskay chunkakaq watapi kamachikushaqtinmi, Quisleu killapi suyuq hatun llaqtan Susapi kasharqani. 2Hinan wawqey Hanani wakin qharikunapiwan Judamanta chayamuspa hamuwarqanku. Tapuykurqanitaq Jerusalén llaqtamanta, kamachi-kayman mana apasqa judío runakunamantawan. 3Hinan niwarqanku: Kamachi-kayman mana apasqakunaqa haqay hap'iypi sinchi wakchan pisichasqan kashanku. Jerusalenpa muyuriq perqanpas thunisqa, punkukunapas ninaq ruphasqanmi kashan, nispa. 4Chayta uyarispaymi tiyaykuspa waqarqani. Iskay-kinsa p'unchay ayunaspa Hanaq Pacha Diosmanta mañakuspa llakisqa nirqani: 5Señorníy, Hanaq Pacha Dios, qanqa hatunmi manchanan kanki. Munakuywan kamachikuyniykikunata kasukuqkunapaqmi, qanqa munakuywan rimanakusqaykita hunt'aqllapuni kanki. 6Señor Diosníy, qhawariway, uyariway. Tuta-p'unchaymi mañakamushayki Israel runa kamachiykikunapaq. Willakamuykin Israel runakunaqa contraykipi huchallikusqaykuta. Ñoqapas aylluypas huchallikullarqaykutaqmi. 7Manan kasukurqaykuchu kamachiyki Moiseswan willachiwasqaykiku kamachikuyniykikunata, unanchay simiykikunata, chaninchayniykikunatapas. Aswanpas sinchi mana allintan contraykipi ruwarqayku. 8Chaywanpas, yuyariy kamachiyki Moisesman nisqayki simita: Huchallikunkichis chayqa, wak suyukunamanmi ch'eqechisqaykichis. 9Ichaqa, ñoqamanchus kutirikamuwankichis, kamachikuyniykunatapas kasuwankichis chayqa, kay pachantinmanña ch'eqechisqa kankichis chaypas, ñoqan wakmanta huñumusqaykichis sutiyta yupaychanapaq akllakusqay cheqasman, nispa. 10Señor Diosníy, paykunaqa kamachiykikunan llaqtaykin kanku, hatun atiyniykiwanmi kallpaykiwanmi paykunata qespichirqanki. 11Chay hinaqa, Señor Diosníy, uyariykuway mañakusqayta, uyarillaytaq qanta hatunchay munaq kamachiykikunaq mañakusqantapas. Yanapaykuway kunan p'unchay reypa allinta qhawariwananpaq, nispa. Ñoqaqa chay tiempopi reypa vino haywaqninmi karqani.

will be added

X\