Nahúm 3

1¡Ay, imaynaraqmi kanki runa wañuchiq llaqta! ¡Llullakuylla-llullakuqmi kanki! ¡Qechuylla-qechuqmi kanki! ¡Suwakushallankipunin! 2¡Uyariychis! Hasut'in ch'ataqeshan, ruedakunan raqhaqeshan, caballokunan q'aqraqeshan, carretakunan phawaspa maywikushan. 3¡Caballerian phawashan! ¡Espadakunan k'anchashan! ¡Lanzakunan lliphipishan! ¡Askhallañan k'irisqakunaqa! ¡Askhallañan ayakunaqa! ¡Mana yupay atinan wañuchisqakunaqa! ¡Puriqkunan ayakunapi misk'akunku! 4Niniveqa sonqo suwaq munaymanmi tukurqan, rabona warmi hinataq millayllaña karqan, kusallaña layqa warmi hinan karqan, qhelli huchapi purisqankunawanmi suyukunaq sonqonta suwarqan, llaqtakunatapas layqakusqankunawanmi kamachi-kayman aparqan, chaymi kunanqa muchuchisqapuni kapushan. 5Tukuy-atiyniyoq Señor Diosmi nin: Ñoqaqa awqaykin kani, uyaykikaman polleraykita q'allpasqayki, hinaspan q'ala ukhuykita hatun suyukunaman rikuchisaq, p'enqayniykitapas llaqtakunamanmi qhawachisaq. 6Qanmanmi qhellikunata wikch'uykusqayki, qhawanapaqmi p'enqayman churasqayki. 7Llapa rikuqniykikunan qanmanta ayqekuspa ninqaku: ¡Nínive llaqtan thunisqa kapusqa! ¿Pin payta llakipayanqa? ¿Pin payta sonqochaykunqa? nispa. 8¿Qanqa Tebas llaqtamanta aswan allinchu kanki? Chay llaqtan Nilo mayu patapi kasharqan, unuwan muyuykusqan kasharqan, hark'aqninqa Nilo mayun karqan, unupas perqa hinan karqan. 9Etiopía suyuq, Egipto suyuq mana tukukuq kallpachayninwanmi ancha atiyniyoqña karqan, Fut runakunan, Libia runakunan payta yanaparqan. 10Chaypas payqa preso apasqan karqan, wak suyumanmi apasqa karqan. Huch'uy wawankupas llapa calle esquinakunamanmi ch'aqesqa karqan, allichachaq runankunapaqmi sortearqanku, kamachikuq runakunatan thunkurqanku. 11Qanpas Nínive llaqta t'ili machasqa hinan kanki, awqamantan pakakunki, awqamanta qespikunaykipaqmi pakakunaykita maskhanki. 12Llapa pukaraykikunan poqosqa higosniyoq sach'a hina, chaykunata chhaphchinku chayqa, mikhuqninpa siminmanmi urmaykun. 13Soldadoykikunaqa warmi t'aqa hinan, suyuykiq punkunkunaqa llapallanmi awqaykikunapaq kicharayashan, punkuykiq p'utinkunataqa ninan ruphaykushan. 14Awqataq muyuykusunki chayqa, unuta huñukuy, pukaraykikunata allinta perqapay, t'uruchay, allinta saruy, ladrillota sik'iy. 15Ichaqa chaypin nina ruphaykusunki, soldadokunan wañuchisunki, langosta kuru hinan tukusunki. Langosta hinaña askhayanki chaypas, t'isku-t'isku hinaña miranki chaypas. 16Negociaqniykikunatan hanaq pacha ch'askakunamantapas astawanraq askhayachirqanki, paykunaqa langosta hinan mikhuyta tukuspa ripunku. 17Qollana runaykikunaqa langostakuna hinan, oficialniykikunapas wakwamuq langostakuna hinan, chiri p'unchaypin kancha patapi tiyarayashanku, inti lloqsimuqtintaq phalaripunku, manataq maymanchus risqanku yachakunchu. 18Yaw, Asiria suyu rey, ¡kamachikuq runaykikunan wañupunku! ¡Allichachaq runaykikunan chinkaripunku! Llaqtayki runakunaqa orqokunamanmi ch'eqeykunku, manataqmi pipas huñuykamuq kanchu. 19Manan k'irisqa kasqaykipaq hampi kanchu, mana hampiy atinan nanayniykiqa. Llapa runan millay sarunchasqaykitaqa muchurqanku, chaymi thunisqa kasqaykimanta uyarispa llapallanku kusisqa t'aqllakunku.

will be added

X\