Nahúm 2

1Yaw, Nínive llaqta, thuniqniykin qan contra phawamushan. ¡Pukarapi soldadoykikunata sayarichiy! ¡Ñanta makilla qhawachiy! ¡Allinta kallpachakuy! ¡Kallpasapaykikunata huñuykuy! 2Qechuqninkunaña llat'anarqanku chaypas, uvas chakrankutaña chaqorqanku chaypas, Señor Diosmi Jacobpa hatun-kayninta wakmanta t'ikarichinqa, Israelpa hatun-kayninta wakmanta rikhurichinqa. 3Awqa soldadokunaq escudonqa pukan, maqanakuqkunaq p'achanqa sansaq pukan. Phawaykunankupaqmi wakichikunku, llusk'achasqa carretankun k'anchaywan lliphipin, caballonkun phawariy-phawariyllaña kashan. 4Carretakunan callekunapi phawaykachan, plazakunapin phawaykachan, hap'ichisqa nina hinan k'anchan, illapa hinan q'enqo-q'enqota phawan. 5Umalliqa allinnin soldadonkunatan waqyan, paykunataqmi tanqarparinakusparaq hamunku, llaqta perqamanmi phawaykunku, patankupin qatana hina escudokuna kashan perqa patamanta ch'aqemusqakunawan mana k'irisqa kanankupaq. 6Mayu hark'achisqakunan q'asarparikun, reypa wasintaq thunirparikun. 7Llaqta reinatan presota apanku, kamachin warmikunan urpi hina khuyayta anchinku, qhasqonkuta takakuspankun waqashanku. 8Nínive llaqtaqa qocharayaq unu hinan, q'asarparisqa qochamanta hinan runankunaqa wakwarqonku. Paykunatan kunkayoqta waqyanku: ¡Sayaykuychis! ¡Kutirimuychis! nispa, manataqmi mayqenpas kutirimunchu. 9¡Qolqeta horqoychis! ¡Qorita qechuychis! ¡Imaymanan hunt'a kasqa! ¡Imaymana illan kasqa! 10¡Thunisqan, llat'anasqan, ch'usaqyachisqan Niniveqa kapushan! Runakunan mancharisqa chiriyanraq, tullunkun mana takyanchu, cuerponkun manchasqa khatatatan, uyankupas q'ellumanraqmi tukun. 11¿Maytaq leonkunaq t'oqon hina Nínive llaqtaqa? Chaypin uña leonkunaman mikhuchirqanku, orqo leonpas, china leonpas, uña leonkunapas chaypin mana imanasqalla tiyarqan. 12Chay leonqa askhatan uñankunapaq wañuchirqan, chinanpaqpas hap'isqanta llik'irqarirqan, t'oqonkunatapas mikhunawan hunt'achirqan. 13Tukuy-atiyniyoq Señor Diosmi nin: Ñoqaqa qan contran kashani, awqa-tinkuna carretaykikunata kanaykuspan q'osñirichisaq, awqa-tinkuypin soldadoykikunata wañuchisaq, manañan hukkunata llat'anankiñachu, manañataqmi hayk'aqpas kachapuriykikunaqa manchachispa rimanqakuñachu, nispa.

will be added

X\