Nahúm 1

1Kaytaqa Diosmi Elcos llaqtayoq Nahumman Nínive llaqtamanta rikuchirqan, chaytan payqa qelqarqan. 2Señor Diosqa sienteq Diosmi, payqa aynita kutichiqmi, sinchi phiñakuqmi. Awqan sayariqkunamanmi aynita kutichin, awqankunapaqmi k'arakta phiñakushallan. 3Señor Diosqa mana usqhaylla phiñakuqmi, payqa ancha atiyniyoqmi, huchallikuqtaqa muchuchinqapunin. Señor Dios puriqtinqa tutuka hatun wayran phawarin, muyuq wayran sayarin, phuyukunapas chakinpi hallp'a q'osñi hinan. 4Paymi lamar-qochata phiñarin, chaymi ch'akipun, llapa mayutapas ch'akichinmi. Basán campopas Carmelo orqopas naq'epunmi, Líbano orqo-orqopi t'ikapas t'awipunmi. 5Orqokunan ñawpaqenpi khatatatan, moqokunan ñawpaqenpi chullurin, hallp'a pachan qayllanpi chhukukukun, teqsimuyupas lliw chaypi tiyaqkunapas chhaphchikunmi. 6Pay phiñakuqtinqa, ¿pitaq ñawpaqenpi sayanman? K'arakta phiñakuqtinqa, ¿pitaq aguantanman? K'arak phiñakusqanqa nina hinan phawarin, paypa qayllanpin qaqakuna ch'eqtakun. 7Señor Diosqa allinmi, llaki-phutiy p'unchaypin llaqtantaqa pakaykun, payman hap'ipakuqkunatan waqaychan. 8Ichaqa millp'uq unuwan hinan awqankunataqa wañuchinqa, awqan sayariqkunataqa laqhayaqmanmi qatiykunqa. 9¿Imatan Señor Dios contra yuyaykushankichis? Payqa llapallaykichistan tukurparisunkichis, manañan sarunchayqa wakmanta kanqañachu. 10Rawisqa khiska chawpipiña kankichis chaypas, t'ili machasqaña kankichis chaypas, ch'akillaña ichhu hinan ruphaykachisqa kankichis. 11Nínive llaqta, qanmantan huk runa sayarirqan, paymi millay kaqkunata Señor Dios contra yuyaykurqan, paymi hukkunata yuyaycharqan mana chaninkaqta ruwanankupaq. 12Señor Diosmi llaqtan runakunata nin: Asiria runakunaña kallpasapa askhallaña kanku chaypas, wañuchisqan kanqaku, chinkapunqakun. Llakichirqaykichisña chaypas, manañan llakichisqaykichisñachu. 13Kunanqa munaychakusqasuykichistan chinkachisaq, watasqasuykichistan p'itisaq, nispa. 14Nínive llaqta, Señor Diosmi qanpaq kamachikun: Mirayniykikunaqa manañan kapunqachu, ahinapin sutiykiqa chinkapunqa, diosniykikunaq wasinpi kaq k'ullu idolokunatapas metalta unuyachispa hich'asqa dioskunatapas ñut'usaqmi. Qanqa mana munanan kanki, chaymi p'ampasqa kanaykipaq t'oqota ruwasaq, nispa. 15¡Qhawariychis, orqo patakunatan chaski hamushan! Payqa allin willakuykunatan apamushan, payqa allillan kawsanankutan willakushan. Judá suyu runakuna, Dios yupaychana fiestaykichiskunata ruwaychis, Diosman prometekusqaykichiskunata hunt'aychis. Manañan hayk'aqpas chay millay runakunaqa suyuykichisman hunt'aykunqakuñachu, llapallanmi wañuchisqa kapunqaku.

will be added

X\