Miqueas 6

1Kunan Señor Diospa rimasqanta uyariychis: ¡Sayariy, orqokunaq qayllanpi ñoqa contra quejakuy, moqokunapas simiykita uyarichun! 2Orqokuna, llaqtanta Señor Diospa huchachasqanta uyariychis, kay pachaq qaqa sayaq teqsinkunapas uyariychis. Señor Diosmi llaqtan contra quejakun, Israel contran ch'atayta mast'arin. 3Señor Diosmi nin: Llaqtalláy, ¿imanarqaykin? Chayri, ¿imapin sayk'uchirqayki? Kutichimuway. 4Ñoqan Egipto suyumanta horqomurqayki, kamachi kashaqtiykin kacharichimurqayki, Moiseswan, Aaronwan, Mariapiwanmi pusachimurqayki. 5Llaqtalláy, kunan yuyariy, ima nispachus Moab suyu rey Balacpa yuyaychasqanta, ima nispataqchus Beorpa churin Balaampa Balacman kutichisqanta. Yuyariy Sitimmanta Gilgalman rishaqtiyki imachus kasqanta, imaynatachus qanta qespichisqayta reparanaykipaq, nispa. 6¿Imantintaq Señor Diosta yupaychaqri asuykusaq? ¿Imantintaq Ancha Hatun Diosta yupaychaqri qayllaykusaq? ¿Paymanqa ruphachina sacrificio apantinchu asuykusaq? ¿Paymanqa watayoq torillokunantinchu chimpaykusaq? 7Señor Diosqa waranqa-waranqa anejotapas, chunka waranqa mayu hina aceitetapas, ¿kusisqachu chaskinqa? ¿Phiwi qhari wawaytachu huchallikusqaymanta qosaq? ¿Ukhuypa rurusqantachu huchallikusqaymanta haywasaq? 8Yaw, runa, Señor Diosmi imachus allin kasqanta willarqasunkiña. ¿Imatataq Señor Diosqa ruwanaykita munan? Chanin kaqllatapuni ruwanaykitan, khuyapayakuqllapuni kanaykitan, Diosniykiq ñawpaqenpi huch'uyyaykukuspa kawsanaykitan, nispa. 9Señor Diosta manchakuqqa yachayniyoqmi. Señor Diosmi llaqtanta waqyashan: Uyariychis, Judá ayllupas llaqtapi huñukuqkunapas. 10¿Hinallatachu qhawayman mana chaninpi tarisqaykichista? Ñoqaqa cheqnikunin waqllisqa tupunaykichista. 11¿Manachu huchachasaq waqllisqa balanzayoqta? ¿Manachu huchachasaq waqllisqa pesokuna churaq runata? 12Kay llaqta qhapaqkunaqa sarunchaqkaman kanku, chaypi tiyaqkunaqa llullakunan q'otuqkunan kanku. 13Chaymi ñoqapas thuniyta qallariyki, huchaykikunamantan purunyachisqayki. 14Mikhunkin, manataqmi saksankichu, aswanpas yarqasqallapunin kashanki. Mikhunatan huñunki, manataqmi imapas kapunqachu, waqaychankiña chaypas awqa-tinkuypin ch'usaqyachipusaq. 15T'akankin, manataqmi ichhunkichu, olivotan kutaspa ch'irwanki, manataqmi chay aceitewan hawikunkichu, uvastan sarunki, manataqmi chay vinota ukyankichu. 16Rey Omriq kamachikusqankunatan hunt'arqanki, hinallataq Ahab aylluq ruwasqankunatapas ruwarqanki, paykunaq purisqanta hinan purirqanki. Chaymi ñoqa purunyachipusqayki, runaykikunatapas asipayachisaqmi, wak llaqtakunataq k'amisunki, nispa.

will be added

X\