Miqueas 5

1Jerusalén llaqta, llat'anaqniykikunan chayarqamusunki, chayrayku llakikuspa cuerpoykita kuchurqarikuy. ¡Awqakunan muyuykuwanchis! ¡Israel suyu kamachikuqtan k'umuykachinqaku! 2Señor Diosmi nin: Qanqa, Belén Efrata Judá llaqtakuna ukhupi huch'uyllaña kanki chaypas, qanmantan Israel suyuta kamachiq paqarimunqa, mirayninqa ñawpaqmantañan rikhurimurqan, nispa. 3Chaymi Señor Diosqa llaqtanta saqenqa wawata suyashaq warmiq wachakunankamalla. Chay qhepatataq wakin wawqenkunaqa Israel llaqta-masinkunawan huñukapuq kutimpunqa. 4Paymi kamachikuq churasqa kaspa Señor Diospa atiyninwan llaqtanta michinqa, Diosnin Señor Diospa munaychakuyninpi kamachikunqa. Teqsimuyuntin llaqtakunan payta anchatapuni hatunchanqa, chaymi llaqtanqa mana manchapakuspa tiyanqa. 5Paymi thak-nisqa kawsayta apamunqa. Suyunchisman Asiria runakuna hunt'aykamuqtin, qhapaq wasinchiskunatapas saruykuqtin, hinan paykuna contra qanchis kamachikuqkunata kachasunchis, hinallataq pusaq umalli runakunatapas. 6Paykunan Asiria suyuta maqanakuypi atipanqaku, Nimrodpa hallp'antan atipanqaku. Hinaspan Asiria runakunamanta kacharichiwasunchis, suyunchisman hunt'aykamuqtinku, qorpanchiskunata saruykuqtinku. 7Jacobpa llaqtanmanta puchuq runakunaqa askha llaqtakuna ukhupin Señor Diospa sullachimusqan sulla hina kanqa, q'achu pataman paramuq para hinan kanqa. Paykunaqa manan runamanchu hap'ipakunku, aswanpas Diosmanmi hap'ipakunku. 8Ahinallataqmi Jacobpa llaqtanmanta puchuqqa hatun suyukuna ukhupi yunka animalkuna ukhupi león hina kanqa, oveja t'aqa ukhupi uña león hina kanqa, chaymi pasaspaqa sarurqarin llik'irqarin, manataqmi pipas kacharichiyta atinchu. 9Chay hinatan Jacobqa awqankunata atipanqa, hinan tukuy awqankunaqa wañuchisqa kanqaku. 10Señor Diosmi nin: Chay p'unchaypin caballoykikunata wañuchisaq, awqa-tinkuy carretaykikunatapas p'akisaq. 11Llaqtaykikunatan raqay-raqayman tukuchisaq, llapa pukaraykikunatan thunisaq. 12Layqaykikunatapas tukusaqmi, watuqniykikunatapas ch'usaqyachisaqmi. 13Idoloykikunatapas yupaychana saywa rumiykikunatapas p'akisaqmi, manañan hayk'aqpas ruwakusqayki dioskunaman k'umuykunkichu. 14Asera diosaykikunatan kumpasaq, llaqtaykikunatapas llapallantan thunisaq. 15K'arakta phiñakuspaymi, sinchita phiñakuspaymi mana kasuwaqniy suyukunaman aynita kutichisaq, nispa.

will be added

X\