Miqueas 3

1Ñoqan nirqani: Jacobpa kurak runankuna, uyariychis, Israel suyupi umallikuna, uyariychis: ¿Manachu qankunaqa imaynachus chaninchay kasqanta qhawanaykichis? 2Chaypas qankunaqa allinkaqtan cheqnikunkichis, mana allinkaqtataq munakunkichis, qarantan ch'utinkichis, aychantataq tullunankichis. 3Llaqtaytan kawsashaqllata mikhunkichis, qarantan ch'utinkichis, tulluntan p'akinkichis, perolpaq hinan kuchurqarinkichis, mankapaq aychata hinan wakichinkichis. 4Chaypachan Señor Diosta waqyakunkichis, ichaqa, manan payqa kutichimusunkichischu. Millaykunata ruwasqaykichisraykun, chay p'unchaykunapi Señor Diosqa mana qhawarimusunkichischu. 5Señor Diosmi llaqta pantachiq profetakunamanta nin: Mikhuchiqninkupaqmi sumaq kawsayta willanku, mana mikhuchiqninkupaqtaqmi ch'aqwata sayarichinku. 6Chaymi chay profetakunapaqqa tutayaykapunqa, rikhuriytaqa manañan rikunqakuñachu, manañan watuytapas atinqakuñachu. Chay profetakunapaqmi inti haykupunqa, p'unchaymi paykunapaq tutayaykapunqa. 7Hinaqtinmi profetakunaqa p'enqakunqaku, watuqkunapas p'enqasqa pukamanraq tukunqaku. Dios mana imatapas kutichimuqtinmi llapallanku usphurayanqaku, nispa. 8Ñoqatan ichaqa Señor Diospa Espiritun hunt'aykuwan atiywan, kuskachaywan, kallpawan ima. Dios contra sayarisqanmanta Jacobta ch'atanaypaq, Israelta huchanmanta huchachanaypaq. 9Jacobpa kurak runankuna, kayta uyariychis, Israel suyupi umallikuna, uyariychis. Qankunan chaninchayta cheqnikunkichis, kuskachaytapas llapantan q'ewinkichis. 10Qankunan runata wañuchispa Sión llaqtata perqankichis, mana chaninta ruwaspan Jerusalenta sayarichinkichis. 11Juezninkuqa lluk'iykusqaraykun juzganku, sacerdotenkutaq qolqerayku yachachinku, profetankupas qolqepaqmi watunku, chaypas Señor Diosmanmi hap'ipakunku: Ñoqanchiswanmi Señor Diosqa kashan, manan ima mana allinpas chayamuwasunchu, nispa. 12Chaymi huchallikusqaykichis hawa Sionqa chakra hina yapusqa kanqa, Jerusalenpas thunisqa soqyan kapunqa, yupaychana wasi orqotaq ch'aphrawan hunt'a kapunqa.

will be added

X\