Miqueas 2

1¡Ay, imaynaraqmi kanqaku mana chaninkaqta yuyaykuqkunaqa! ¡Ay, imaynaraqmi kanqaku puñunanku ukhupi mana allinkaqta yuyaykuqkunaqa! Paqarimuqtinmi yuyaykusqankuta ruwanku, paykuna atiyniyoq kasqankurayku. 2Chakrakunatan munapakunku, hinaspan chaykunata qechunku, wasikunatapas munapakunku, hinaspan chaykunata hap'ikapunku. Runata q'otuspan wasintapas qechunku, hinallataq wasi-masinkunatapas q'otuspa tayta-mamankuq saqesqan chakrakunatapas qechunku. 3Chaymi Señor Diosqa nin: Ñoqapas hatun llakitan chayachimusqaykichis, chaymantaqa manapunin ayqenkichischu, llaki-phutiy tiempon kanqa, chayraykun mana k'ankaykachaspañachu purinkichis. 4Chay p'unchaypin runakunaqa k'amisunkichis, kay llakiy-llaki takiwanmi takipayasunkichis: Imaymananchistan qechupuwanchis, llaqtaypa hallp'anqa rakisqan kapun. ¡Imaynatan Señor Diosqa chakranchiskunata qechupuwarqanchis, wak runakunaman chaykunata qoykapuspa! nispa. 5Chaymi Señor Diospa llaqtan huñunakuqtinqa mana pipas kanqachu sorteaspa hallp'akunata rakinanpaq. 6Paykunan qapariykuwan: ¡Ama rimapayawaykuchu! ¡Ama chaykunata niwaykuchu! ¡Manan hatun llakiqa chayamuwanqakuchu! nispa. 7Yaw, Jacobpa mirayninkuna, ¿allintachu nishankichis: Señor Diosqa manan ñoqaykupaqqa phiñakushanchu, manan payqa chaykunata ruwanqachu, nispa? Chaypas Señor Diospa siminqa chanin runakunapaqqa allinninpaqmi. 8Chaymi Señor Diosqa nin: ¡Qankunaqa llaqtay contran sayarinkichis! ¡Qankunaqa sumaq tiyakushaqkunaq ponchontan ch'utinkichis! Awqa-tinkuymantan soldadokuna kutimunku sumaqta kawsayta munaspa, qankunataq ichaqa imaymanankuta qechunkichis. 9Llaqtay warmikunatan sumaq wasinkumanta qarqonkichis, wawankuman qosqay saminchakunatan wiñaypaq qechupunkichis. 10¡Sayariychis! ¡Puririychis! ¡Manan kay hallp'apiqa samaykuwaqchisñachu! Qankunaqa sinchi qhellin kashankichis, chaymi mana khuyapayaykuspa wañuchisqa kankichis. 11Pipas llullakuyta paqarichispa nisunkichis: vinotapas, machachikuq ukyanatapas, qosqaykichis, nispa chayqa, chaytapunin qankunaqa profetaykichis kananpaq munankichis, nispa. 12Señor Diosmi nin: Jacobpa mirayninkuna, cheqaqtapunin llapallaykichista huñuykamusqaykichis, cheqaqtapunin Israelmanta puchuqta huñuykamusaq. Kanchamanmi ovejakunata hina huñuykamusaq, q'achu-q'achu ukhupi uywa t'aqata hina. Yapamantan hallp'aykichisqa runa hunt'a kapushanqa, nispa. 13Diosmi ñanta kicharispa ñawpaqenkuta rinqa, paykunataq llaqta punkunta lloqsispa kacharisqa kapunqaku, Reyninku Señor Diospas ñawpaqenkutan rinqa.

will be added

X\