Miqueas 1

1Judá suyupi rey Jotam, rey Ahaz, rey Ezequiaspiwan kamachikushaqtinkun, Señor Diosqa Moreset llaqtayoq Miqueasman rimaykurqan. Huk rikhuriypin Samariamantawan Jerusalenmantawan payman rikuchirqan. 2Llapa llaqtakuna, kayta uyariychis, kay pachapi llapa tiyaqkuna, maki uyariychis. Apu Señor Diosmi qankuna contra testigo hina rimanqa, ch'uya wasinmantapachan Señor Diosqa huchachanqa. 3Señor Diosmi maypichus tiyasqanmanta lloqsimushan, uraykamuspan orqo patankunata purimushan. 4Chaki sarunanpin wayq'okunapas ch'eqtakun, orqokunan chullurin ninaman churasqa wira hina, qhatata phaqchaykuq unu hina. 5Señor Diosmi chaykunata ruwan Jacobpa mana kasukusqanrayku, Israel runakunaq huchallikusqanrayku. ¿Imataq Jacobpa mana kasukusqanri? ¡Samaria llaqtapi ruwasqanmi! ¿Imataq Judá runakunaq huchallikusqanri? ¡Jerusalén llaqtapi wak'a diosta yupaychasqankun! 6Chaymi Señor Diosqa nin: Samaria llaqtatan llapanta thunisaq, uvas mallkina chakramanmi tukuchisaq. Ruminkunatan wayq'oman wikch'uykusaq, Teqsi ruminkunataraqmi horqosaq. 7Llapa idolokunan ñut'usqa kanqa, yupaychana wasipi regalokuna huñusqankupas ruphasqan kanqa, lliw rikch'ayninkupas llapallanmi p'akisqa kanqa. Chaykunaqa tarisqa karqan yupaychana wasipi rabona warmikunaq pagachikusqanwanmi, wakmantan rabona warmikunallamantaq chaykunaqa pagasqa kanqa, nispa. 8Chaymi waqasaq anchisaq, chaymi q'ala chakipas mana p'achayoqpas purisaq, chacal animalkuna hinan aullakusaq, suri animal hinan qaparisaq. 9Samaria llaqtaq k'irisqa kasqanqa mana hampiy atiymi, Judá suyupas k'irisqallataqmi kashan. Awqaqa llaqtaypa tiyasqan kikin Jerusalenkaman chayan. 10Ama chaytaqa Gat llaqtapi tiyaqkunaman willaychischu, ama waqaychischu. Bet-le-afra llaqtapi tiyaqkuna, ñut'u hallp'api llakikuymanta qhospaychis. 11Safir llaqtapi tiyaqkuna, q'alalla p'enqasqa kamachi-kayman riychis. Zaanán llaqtapi tiyaqkunaqa manchakuspan mana lloqsimunchu, Bet-esel llaqtapiqa wañuqkunamantan lutokushanku, chayraykun mana yanapaykuyta atisunkichischu. 12Marot llaqtapi tiyaqkunaqa sinchi llakisqan yanapayta suyashanku, Señor Diosqa hatun llakita kikin Jerusalenkamaraq chayachimusqanrayku. 13Laquis llaqtapi tiyaqkuna, caballokunata carretaykichisman wataychis, qankunan Sión llaqtata huchallikuyman tanqarqankichis, qankunawanmi Israel runakunaq huchanqa qallarirqan. 14Moreset-gat llaqtapi tiyaqkunata kacharpariychis. Aczib llaqtaqa Israel reykunatan q'otunqa. 15Maresa llaqtapi tiyaqkuna, huk atipaqmi llaqtaykita hap'ikapunqa. Israel suyupi umalli runakunapas Adulam qaqa wasimanmi pakakuq haykunqaku. 16Munasqaykichis wawaykichiskunamanta llakikuspa chukchaykichista rutukuychis, suweq'ara hina kanaykipaq umaykichista p'aqlakuychis, wawaykichismi kamachi-kayman apasqa kanqaku.

will be added

X\