Levítico 9

1Pusaqkaq p'unchaypin Moisesqa waqyarqan Aaronta churinkunata, Israel kurak runakunatawan. 2Hinaspan Aaronta nirqan: –Mana imanasqa torillota hucha pampachay ofrendapaq hap'iy, mana imanasqa anejotataq ruphachina sacrificiopaq, hinaspa chaykunata Señor Diosman hayway. 3Israel runakunatan ninki: Orqo cabrata hucha pampachay ofrendapaq hap'iychis, hinallataq watayoq mana imanasqa torillotapas watayoq mana imanasqa borregotapas ruphachina sacrificiopaq. 4Hap'illaychistaq sumaq kawsay ofrendapaq huk torota huk anejotawan. Chaykunatan Señor Diosman haywankichis aceiteyoq chapusqa ruru ofrendatawan. Kunanmi Señor Diosqa rikhurisunkichis, nispa. 5Chaymi Moisespa kamachikusqan kaqkunata aparqanku Dioswan Tupana Karpaq ñawpaqenman, llaqtantintaq asuykuspa Señor Diospa ñawpaqenpi sayaykurqanku. 6Hinaqtinmi Moisesqa nirqan: –Señor Diosmi kay hinata ruwanaykichispaq kamachirqasunkichis paypa lliphlli-kaynin rikhurinasuykichispaq, nispa. 7Hinaspan Moisesqa Aaronta nirqan: –Altarman qayllaykuy, hucha pampachay ofrendata hayway, ruphachina sacrificiotapas, huchaykipas llaqtaq huchanpas pampachasqa kananpaq. Haywallaytaq llaqtaq huchan pampachay ofrendatapas, Señor Diospa kamachikusqanman hina, nispa. 8Aaronmi altarman asuykurqan, hinaspan pay kikinpa huchan pampachasqa kananpaq torillota nak'arqan. 9Aaronpa churinkunataq taytankuman yawarta apamurqanku, Aarontaq yawarman dedonta challpuykuspa altar waqrakunata llusiykurqan, wakin yawartataq altar chakiman hich'aykurqan. 10Hinaspan altar patapi ruphachirqan hucha pampachay ofrendaq wiranta, rurunkunata, sullk'a k'ipchantawan, Moisesta Señor Diospa kamachisqanman hina. 11Ichaqa aychatawan qaratawantaq karpa-karpa hawapi kanaykurqan. 12Aaronqa nak'allarqantaqmi ruphachina sacrificiotapas, churinkunataq yawarta payman haywarqanku, chaytan payqa altar muyuriq qhataman hich'aykurqan. 13Chay qhepatataq kuchurqarisqa ruphachina sacrificiota ch'ulla-ch'ullamanta payman haywarqanku, umantapas haywallarqankutaq, paytaq chaykunata altar patapi ruphachirqan. 14Chaymantataq ch'unchulkunatapas chakinkunatapas maqchispa, altarpi ruphachina sacrificio patapi ruphachirqan. 15Haywallarqantaqmi llaqtaq ofrendantapas. Llaqtaq huchan pampachasqa kananpaqqa orqo cabratan hap'irqan, hinaspan chayta nak'aspa ñawpaqkaq sacrificiota hina hucha pampachaypaq haywarqan. 16Chaymantataq ruphachina sacrificiota llaqtapaq haywarqan, maychus ruwanaman hinataq ruwarqan. 17Haywallarqantaqmi ruru ofrendatapas, chaymanta hapt'arikuspataq altar patapi ruphachirqan tutamanta ruphachina sacrificiotawan kuska. 18Hinallataq sumaq kawsay ofrenda torotapas anejotapas llaqtapaq nak'arqan. Churinkunataq payman yawarta haywarqanku, chaytan payqa altar muyuriq qhataman hich'aykurqan. 19Hinaspan toro wirata, anejo wiratawan, chupanta, wiksa llika wirata, rurunkunata, sullk'a k'ipchantawan, 20nak'asqakunaq pechonman churaykurqan, hinaspan payqa altar patapi wirakunata ruphachirqan. 21Señor Diosmantaq pechonkunata paña chakankunatawan hap'ispa Aaronqa maywispa Señor Diospaq haywarqan, chaymi maywisqa ofrenda, Moisesta Señor Diospa kamachisqanman hina. 22Chaymantataq Aaronqa llaqtaman makinta haywarispa samincharqan. Hucha pampachaypaq ofrendata, ruphachina sacrificiota, sumaq kawsay ofrendatapas haywasqa qhepatataq uraykurqan. 23Hinamantataq Moiseswan Aaronwan Karpapi Ch'uya Cheqasman haykurqanku, lloqsispataq llaqtata samincharqanku. Hinan Señor Diospa lliphlli-kayninqa llaqtantinman rikhurirqan. 24Señor Diostaq ninata kachamurqan, hinan altar patapi rupharparirqan ruphachina sacrificiota wirakunantinta. Llaqtallantin chayta rikuspataq kusisqa qaparirqanku, hinaspan pampakama k'umuykurqanku.

will be added

X\