Levítico 3

1Pipas waka t'aqamanta sumaq kawsay ofrendata haywanqa chayqa, orqoña chinaña kaqtinpas, mana imanasqatan Señor Diospa ñawpaqenpi haywanqa. 2Ofrendanpa umanmanmi makinta churaykunqa, hinaspan chayta Dioswan Tupana Karpa punkupi nak'anqa. Aaronpa churin sacerdotekunataq yawarninta altar muyuriq qhataman hich'aykunqaku. 3Hinaspan payqa sumaq kawsay ofrendamanta Señor Diospaq mikhuna ofrendata hina haywanqa llapan wiksa llika wirata, 4iskaynin rurunta, chaykuna qayllapi kaq ñañu wasa wirata, sullk'a k'ipchantawan. 5Aaronpa churinkunataq chayta altar nina patapi kaq ruphachina ofrendatawan ruphachinqaku. Chayqa mikhuna ofrendan, sumaq q'apayninqa Señor Diospa sonqonmanmi chayan. 6Pipas oveja t'aqamanta sumaq kawsay ofrendata Señor Diosman haywanqa chayqa, orqoña chinaña kaqtinpas, mana imanasqatan haywanqa. 7Borregotachus haywanqa chayqa, Señor Diospa ñawpaqenpin chayta haywanqa. 8Ofrendanpa umanmanmi makinta churaykunqa, hinaspan chayta Dioswan Tupana Karpa punkupi nak'anqa. Aaronpa churinkunataq yawarninta altar muyuriq qhataman hich'aykunqaku. 9Chay sumaq kawsay ofrendamantan Señor Diospaq mikhuna ofrendata haywanqa wirata, k'uchunmanta qhorusqa chupata, llapan wiksa llika wirata, 10iskaynin ruruntapas, chaykuna qayllapi ñañu wasa wirata, sullk'a k'ipchantawan. 11Hinaspan sacerdoteqa chayta altar patapi ruphachinqa. Chayqa Señor Diospaq mikhuna ofrendan. 12Ofrendanchus cabra kanqa chayqa, Señor Diospa ñawpaqenpin chayta haywanqa. 13Chaypa umanmanmi makinta churaykunqa, hinaspan chayta Dioswan Tupana Karpa punkupi nak'anqa. Aaronpa churinkunataq yawarninta altar muyuriq qhataman hich'aykunqaku. 14Hinaspataq chaymanta Señor Diospaq mikhuna ofrendata haywanqa llapan wiksa llika wirata, 15iskaynin rurunta, chaykuna qayllapi kaq ñañu wasa wirata, sullk'a k'ipchantawan. 16Hinaspan sacerdoteqa chayta altar patapi ruphachinqa. Chayqa mikhuna ofrendan, sumaq q'apayninqa Señor Diospa sonqonmanmi chayan. Llapa wiran Señor Diospaq. 17Maypiña tiyaqtiykichispas kayqa wiñaypaq kamachikuy simin miray-mirayniykichispaq kanqa. Aman wiratapas yawartapas mikhunkichischu, nispa.

will be added

X\