1 Señor Diosmi Moisesta nirqan: 2 –Israel runakunata nimuy, Señor Diosmi nin: Pipas ñoqata serviwananpaq prometekun, huk runaq valorninta chayqa lloqsinanpaqqa pagananpunin. 3 Yupaychana karpapi tupunaman hinan hayk'atachus runaq valesqanqa chaninchakunqa: Iskay chunka watayoqmanta soqta chunka watayoqkama: qharitan phisqa chunka qolqeman chaninchakunqa, 4 warmitataq kinsa chunka qolqeman. 5 Phisqa watayoqmanta iskay chunka watayoqkama: qharitan iskay chunka qolqeman chaninchakunqa, warmitataq chunka qolqeman. 6 Killayoqmanta phisqa watayoqkama: qharitan phisqa qolqeman chaninchakunqa, warmitataq kinsa qolqeman. 7 Soqta chunka watayoqmanta wichaymantaq: qharitan chunka phisqayoq qolqeman chaninchakunqa, warmitataq chunka qolqeman. 8 Sinchi wakchachus chaninchasqata pagananpaq kanqa chayqa, sacerdotemanmi pusasqa kanqa, chaymi sacerdoteqa prometekuqpa atisqanman hina hayk'achus kananta chaninchanqa. 9 Ñoqa Señor Diosman prometesqakunachus haywana animal kanqa chayqa, chaykunamanta imapas ñoqaman qosqaqa ch'uyapunin kanqa. 10 Manan cambiasqachu kanqa, allinña mana allinña kanqa chaypas. Huk animalchus hukkaqwan cambiasqa kanqa chayqa, chay animalpas, cambianapaq qosqa animalpas, ñoqa Señor Diospaq t'aqasqan kanqa. 11 Ñoqa Señor Diosman prometesqakunachus mana haywana qhelli animal kanqa chayqa, chay animalmi sacerdoteq ñawpaqenpi sayaykachisqa kanqa. 12 Sacerdotetaq hayk'atachus pagananta qhawarinqa imaynachus animalpa kasqanman hina. Sacerdoteq hayk'amanchus chaninchasqanman hinan kapunqa. 13 Prometekuq runa chay animalta horqokapuyta munaspanqa, chaninchasqamanmi phisqa partemanta hukninta yapaykuspa paganqa. 14 Pipas wasinta ñoqa Señor Diospaq t'aqanqa chayqa, sacerdoten hayk'achus valesqanta chaninchanqa imaynachus wasiq kasqanman hina. Sacerdoteq hayk'amanchus chaninchasqanman hinan kapunqa. 15 Wasinta t'aqaqtaq horqokapuyta munanqa chayqa, hayk'amanchus chaninchasqanmanmi phisqa partemanta hukninta yapaykuspa paganqa, hinan wasiqa paypa kapunqa. 16 Pipas wakin chakranta ñoqa Señor Diospaq t'aqanqa chayqa, hayk'a cebada muhuwanchus tarpusqanman hinan sacerdoteqa chaninchanqa, phisqa qolqeta sapa arroba muhupaq. 17 Chakrantachus kacharipuna watamantapacha t'aqanqa chayqa, hayk'amanchus chaninchasqaman hinan churasqa kapunqa. 18 Kacharipuna wata qhepatachus chakranta t'aqanqa chayqa, sacerdoten hayk'a qolqechus valesqanta tanteanqa kacharipuna watakama hayk'a wataraqchus kasqanman hina, chaymi hayk'a watamanchus chaninchasqamanta pisiyachisqa kanqa. 19 Chakranta t'aqaqtaqchus horqokapuyta munanqa chayqa, hayk'achus valesqamanmi phisqa partemanta hukninta yapaykuspa paganqa, hinan chakraqa paypa kapunqa. 20 Paytaqchus chakrata mana horqokapushaspa hukman chayta vendenqa chayqa, manan horqokapunqañachu, 21 aswanpas kacharipuna watapin kacharisqa chakraqa ñoqa Señor Diospaq t'aqasqapuni kapunqa, hinan chay chakraqa sacerdoteq kapunqa. 22 Pipas rantikusqan chakrata ñoqa Señor Diospaq t'aqanqa, manataq herencian chakrachu karqan chayqa, 23 sacerdoten paywan tanteanqa kacharipuna watakama hayk'amanchus chaninchasqata, chay kikin p'unchaypin hayk'amanchus chaninchasqata paganqa ñoqapaq t'aqasqa qolqe kananpaq. 24 Kacharipuna watapin rantikuq runaqa chay chakrata kikin chakrayoqman kutichipunqa. 25 Hayk'amanchus imapas chaninchasqaqa yupaychana wasipi tupunaman hinan tanteakunqa. 26 Manan pipas ñawpaq wachay animalkunataqa ñoqa Señor Diospaq t'aqanmanchu, wakapas, ovejapas cabrapas kachun, chaykunaqa ñoqaqñan. 27 Ñawpaq wachay qhelli uywakunachus kanqa chayqa, hayk'amanchus chaninchasqaman hinan horqokapunqa, hinaspan chay chaninchasqaman phisqa partemanta hukninta yapaykuspa paganqa. Manataq horqokapunqachu chayqa, hayk'amanchus chaninchasqaman hinan vendekunqa. 28 Ichaqa ñoqa Señor Diospaqpunin kanqa piqpapas t'aqapusqanqa, manan vendesqapas horqokapusqapas kanmanchu. Runanpas, uywanpas, chakranpas, imanpas ñoqa Señor Diospaqpuni t'aqasqaqa ch'uyan. 29 Pipas ñoqapaqpuni t'aqasqaqa manan rescatasqachu kanqa, aswanpas wañuchisqapunin kanqa. 30 Tukuy chakra diezmoqa, chakra muhupas sach'a rurupas ñoqaqmi, ñoqapaq t'aqasqañan. 31 Pipas wakin diezmonta horqokapuyta munaqqa, phisqa partemantan hukninta hayk'achus kasqanman yapaykuspa paganqa. 32 Wakatapas ovejatapas cabratapas tawnawan yupashaspaqa, sapa chunkaman chayaspan ñoqa Señor Diospaq t'aqanqa. Chaykunaqa ñoqaqmi. 33 T'aqashaspaqa aman qhawanqachu allinchus mana allinchus kasqantaqa, amallataqmi cambianqapaschu. Cambianqachus chayqa, chay animalpiwanmi t'aqasqa kapunqa, manan cambiasqachu kanqa, nispa. 34 Chay kamachikuykunatan Sinaí orqopi Señor Diosqa Israel runakunapaq Moisesman qorqan.
