1 Aman hallp'aykichispi ruwakunkichischu yanqa dioskunatapas, idolokunatapas, yupaychana saywa rumikunatapas, sumaqchasqa rumikunatapas chaykunaman k'umuykunaykichispaqqa. Ñoqaqa Diosniykichis Señor Diosmi kani. 2 Samana p'unchayniykunata waqaychaychis, ñoqa yupaychana cheqastapas manchakuychistaq. Ñoqaqa Señor Diosmi kani. 3 Unanchayniykunaman hinachus purinkichis, kamachikuyniykunatapas waqaychaspa hunt'ankichis chayqa, 4 ñoqan tiemponpi parachimpusqaykichis, hinan hallp'aqa ruruchinqa, sach'akunapas rurunqa. 5 Uvas pallanaykichis tiempopin trigota saruchishankichisraq, tarpunaykichis tiempopin uvastapas pallashankichisraq. Askha mikhunayoqmi kankichis, hallp'aykichispipas mana llakipakuspan tiyankichis. 6 Ñoqataq chay suyupi sumaqta kawsachisqaykichis, hinan mana piqpa manchachisqan puñunkichis. Suyuykichismanta phiña animaltapas karunchasaqmi, manataqmi suyuykichispi hatun maqanakuy kanqachu. 7 Awqaykichistan qatinkichis, espadawanmi wañuchinkichis. 8 Qankunaqa phisqallan pachakta qatinkichis, pachaktaq chunka waranqata, hinaspa awqaykichiskunata espadawan wañuchinkichis. 9 Ñoqan sumaqta qhawarimusqaykichis, mirachisqaykichismi, askhayachisqaykichismi, qankunawan rimanakusqaytan hunt'asaq. 10 Pasaq wata mikhuyta mikhushaspaykichismi mosoq mikhuyta taqenaykichispaq chay taqeta qasichinkichis. 11 Qankuna ukhupin tiyasaq, manataqmi cheqnikusqaykichischu. 12 Qankunawantaqmi kasaqpas. Diosniykichismi kasaq, qankunataq llaqtay kankichis. 13 Ñoqaqa Diosniykichis Señor Diosmi kani, Egipto suyumantan horqomurqaykichis ama paykunaq kamachin kanaykichispaq. Kamachiqniykichiskunamantan kacharichimurqaykichis, hinaspan mana manchasqatachu purichirqaykichis. 14 Ichaqa qankunachus llapa kamachikusqay simikunata mana uyarinkichischu, mana kasukunkichischu chayqa, 15 rimanakusqaytapas p'akispa, tukuy chay kamachikuyniykunata mana hunt'ankichischu, unanchayniykunatapas qhawarparinkichis, chaninchasqay simikunatapas pisicharparinkichis chayqa, 16 ñoqapas kaytan ruwallasqaykichistaq: Q'aqchasqaykichismi, hap'ichisqaykichismi tisis onqoywan, fiebre onqoypiwan. Ñawiykichispas ñawsayanqan, kallpaykichispas pisiyanqan. Yanqan muhuykichista tarpunkichis, awqaykichiskunan chayta mikhunqa. 17 Qankuna contran sayarisaq, hinan awqaykichiskuna atipasunkichis. Cheqnikuqniykichiskunan munaychakusunkichis, mana pipas qatishasuqtiykichismi ayqekunkichis. 18 Manataq chaykunawanpas uyariwankichischu chayqa, huchaykichiskunamantaqa qanchis kutitawanraqmi muchuchisqaykichis. 19 Chinkachisaqmi sinchi anchaykachayniykichista. Manapunin parapas paramunqachu, hallp'aykichispas ch'akillañan kanqa. 20 Yanqapaqmi llank'ankichis, chakraykichisqa manan rurunqachu, chakraykichispi sach'akunapas manan rurunqachu. 21 Manataqchus kasuwankichis, manataqchus uyariwaytapas munankichis chayqa, huchaykichisman hinan ñoqaqa qanchis kutitawanraq muchuchisqaykichis. 22 Phiña animalkunatapas kachamullasqaykichistaqmi wawaykichista qechunasuykichispaq, uywaykichistapas wañurqarichinanpaq, pisiyachinasuykichispaq ima. Chhaynapin ñanniykichiskunapipas manaña pipas purinqachu. 23 Chaykunawanpas manataq kutirikamuwankichischu, aswanpas contrallaypunitaq kashankichis chayqa, 24 ñoqapas contraykichismi sayarisaq, hinaspan huchaykichismanta qanchis kutitawanraq ñoqa kikiy muchuchisqaykichis. 25 Rimanakusqayta mana kasusqaykichismantan awqa-tinkuyta chayachimusqaykichis. Llaqtaykichis ukhupichus pakakunkichis chayqa, ñoqan qankuna ukhupi onqoyta rikhurichisaq, awqaykichismanpas hap'iykachisqan kankichis. 26 Mikhunata qechupuqtiyqa, chunka warmikunan ch'ulla hornollapi llapaykichispaq t'antata masanqaku, hinaspanmi huk khamuyllataña llapaykichispaq aypachisunkichis, mikhuspaykichistaq mana saksankichischu. 27 Chaywanpas manachus uyariwankichis, aswanpas awqayraq kankichis chayqa, 28 ñoqan k'arak phiñasqa qankuna contra sayarisaq, hinaspan huchaykichismanta qanchis kutitawanraq ñoqa kikiy muchuchisqaykichis. 29 Churiykichispa ususiykichispa aychantan mikhunkichis. 30 Orqopi yupaychanaykichistan thunisaq, incienso q'apachina altarniykichistan ñut'usaq, ayaykichistan mana kawsaq idoloykichiskunaman tawqaykusaq, ñoqa kikiymi millakusqaykichis. 31 Llaqtaykichiskunatan raqayman tukuchisaq, yupaychanaykichis cheqaskunatan purunyachipusaq, manañataqmi sumaq q'apashaq sacrificioykichistapas chaskisaqchu. 32 Hallp'aykichistapas purunyachisaqmi, hinan chaypi tiyaq awqaykichiskunaqa chaymanta utirayanqaku. 33 Awqa-tinkuywanmi muchuchisqaykichis, hinantin suyukunamanmi ch'eqechisqaykichis, hallp'aykichistaq purunyachisqa kapunqa, llaqtaykichispas raqay-raqaymi qhepanqa. 34 Hinaqtinmi llapa purunyachisqa kasqan p'unchaykunapi hallp'aqa samana p'unchayninkunata samakapunqa, awqaykichiskunaq hallp'anpi kashanaykichiskama. 35 Tukuy purunyachisqa kasqan tiempopin hallp'aqa samanqa chaypi tiyashaqtiykichis p'unchaykunapi mana samasqanmanta. 36 Qankunamanta puchuq runakunatataq awqaykichispa suyunpi sonqonkuta manchapachisaq, urmaykuq raphiq “chhaq” nisqallanmi paykunataqa qatirinqa, chaymi awqa-tinkuymanta ayqekuq hina ayqespa mana pipas qatishaqtin kumpakunqaku. 37 Awqa-tinkuypipas kashankuman hinan mana pipas paykunata qatishaqtin sarunakunqaku. Manataqmi awqaykichiskunawan maqanakuyta atinkichischu. 38 Wak suyukuna ukhupin wañunkichis, awqaykichiskunaq suyunpitaq tukukunkichis. 39 Puchuqniykichistaq awqaykichiskunaq hallp'anpi huchallikusqankumanta tayta-mamankuq huchallikusqanmantawan pisipapunqaku. 40 Hinan contrayta huchallikusqankutapas tayta-mamankuq huchallikusqantapas cheqnikuwasqankutapas reqsikuspa willakunqaku. 41 Chay hinata huchallikuqtinkun paykunataqa cheqnikurqani, hinaspan awqankuq suyunman paykunata apachirqani. Chaykunawanchus chay rumi sonqokuna k'umuykukunqaku, huchallikusqankutapas reqsikunqaku chayqa, 42 ñoqan Jacobwan rimanakusqaytapas, Isaacwan rimanakusqaytapas, Abrahamwan rimanakusqaytapas yuyarisaq, hallp'ankutapas yuyarillasaqtaq. 43 Ichaqa hallp'ankutan saqepunqaku, chaymi ch'inta saqepuqtinku samana p'unchayninkunapi hallp'aqa samakunqa. Paykunaqa huchallikusqankumantan muchuchisqa kanqaku kamachikuyniykunata pisicharparisqankurayku, unanchayniy simikunatapas mana munasqankurayku. 44 Chaypas awqankuq hallp'anpi kashaqtinkupas manan ñoqaqa paykunata wikch'usaqchu, hinaña paykunata cheqnikusaq chaypas, manan pasaqtachu ch'usaqyachisaq, paykunawan rimanakusqaytapas manan yanqayachisaqchu. Ñoqaqa Diosninku Señor Diosmi kani. 45 Aswanpas paykunataqa uyarisaqmi ñawpa taytankuwan rimanakusqayrayku, paykunatan suyukunaq rikushasqan Egipto suyumanta horqomurqani Diosninku kanaypaq. Ñoqaqa Señor Diosmi kani, nispa. 46 Chay unanchay simikunatan, kamachikuykunatan, yachachikuy simikunatawan Señor Diosqa Israel runakunapaq Sinaí orqopi Moiseswan churachirqan.
